ދިވެހިރާއްޖޭގެ އަމާޒަކީ ދިގުމުއްދަތުގެ ބައިވެރިވުންތަކަށް ޖާގަދޭ ފަދަ، ދެފުށްފެންނަ، ނަތީޖާ އަންދާޒާކުރަން ފަސޭހަ އަދި ގަވާއިދުތަކެއްގެ މައްޗަށް ބަރޯސާވާ މާލީ ވެއްޓެއް ފޯރުކޮށްދިނުންކަމުގައި ރައީސުލްޖިމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިހެން ވިދާޅުވީ މިހާރު ޖަރުމަނުވިލާތަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ބާލިންގައި ބޭއްވި ‘މޯލްޑިވްސް-ޖަރުމަން ބިޒްނަސް ރައުންޑްޓޭބަލް، ގައި ވާހަކަފުޅު ދައްކަވަމުންނެވެ.
މި ބައްދަލުވުމުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ ޖަރުމަނުވިލާތުގެ ވިޔަފާރި ލީޑަރުންނާ ބައްދަލުކުރެއްވުމަކީ ލިބިވަޑައިގަންނަވާ އުފާފުޅެއްކަން ފާހަގަކުރައްވާފައެވެ. އަދި ޖަރުމަނުގެ ވިޔަފާރިވެރިންނަކީ ދުނިޔޭގެ ވިޔަފާރީގެ މައިދާން ބައްޓަންކުރުމުގައި މުހިންމު ދައުރެއް އަދާކުރާ ބައެއްކަމަށް އެމަނިކުފާނު ވިދާޅުވިއެވެ.
ރާއްޖެއަށް ކުރިމަތިވެފައިވާ ހަކަތައިގެ ރައްކާތެރިކަމާއި އަގުތަކުގެ ގޮންޖެހުންތަކަށް އަލިއަޅުއްވާލައްވަމުން ރައީސް ވިދާޅުވީ، އެނަރޖީ ޓްރާންސިޝަން ނުވަތަ އިއާދަކުރަނިވި ހަކަތައަށް ބަދަލުވުމަކީ ރާއްޖެއަށް ނުހަނު ބޭނުންތެރި ދާއިރާއެއް ކަމަށެވެ. "ސޯލާ ސިޓީ ފަދަ މަޝްރޫޢުތަކުގެ އަމާޒަކީ ހަމައެކަނި ކާބަން ބޭރުކުރާ މިންވަރު މަދުކުރުން ނޫން،" ކަމަށާއި، އޭގެ ބަދަލުގައި ޖަޒީރާ ގައުމުތަކަށް އަތްފޯރާފަށުގެ އަދި ދެމެހެއްޓެނިވި ހައްލުތަކެއް ހޯދައިދިނުމަކީވެސް އަމާޒެއް ކަމަށް އެމަނިކުފާނު ވިދާޅުވިއެވެ.
ރާއްޖޭގެ ޞިއްޙީ ޚިދުމަތް ޒަމާނީކޮށް ފުޅާކުރުމާ ބެހޭގޮތުން ވާހަކަފުޅު ދައްކަވަމުން ރައީސް ވިދާޅުވީ، ރާއްޖޭގައި ޚާއްޞަ ޚިދުމަތްތައް ތަރައްޤީކޮށް، ބޭސްފަރުވާއަށް ރާއްޖޭން ބޭރަށް ދާންޖެހޭ މިންވަރު މަދުކުރުމަކީ ސަރުކާރުގެ ސިޔާސަތެއް ކަމަށެވެ. މި ދާއިރާގައި ޖަރުމަނުވިލާތުގެ ހުރި މާހިރުކަމާއި ތަޖުރިބާގެ ބޭނުން ހިފުމަށް ރާއްޖެއިން ޝައުގުވެރިވާކަން އެމަނިކުފާނު ފާހަގަކުރެއްވިއެވެ.
ފަތުރުވެރިކަމުގެ ދާއިރާއާ ގުޅޭގޮތުން ވާހަކަފުޅު ދައްކަވަމުން ރައީސް ވިދާޅުވީ 2027 ވަނަ އަހަރަކީ "ވިޒިޓް މޯލްޑިވްސް އިއަރ" ކަމުގައި ކަނޑައަޅާފައިވާ ކަމަށާއި، މި ހަރަކާތުގައި ބައިވެރިވުމަށް ޖަރުމަނުގެ ވުނޭރުންނަށް ދަޢުވަތު އަރުވާ ކަމަށެވެ.
ރައީސުލްޖުމްހޫރިއްޔާގެ ވާހަކަފުޅު ނިންމަވާލެއްވީ، ޖަރުމަނުވިލާތަކީ ރާއްޖޭގެ ތަރައްޤީގެ ދަތުރުގައި ލިބޭނެ ތަބީޢީ ބައިވެރިއެއްގެ ގޮތުގައި ސިފަކުރައްވަމުންނެވެ. އެމަނިކުފާނު ވިދާޅުވި ގޮތުގައި ދެ ގައުމުގެ ދެމެދުގައި އޮތް ގުޅުމާއި ހިއްސާކުރާ މަސްލަހަތުތަކުގެ ސަބަބުން، ކުރިއަށް އޮތް ތަނުގައި އިގްތިސާދީ ގޮތުން ބޮޑެތި ކުރިއެރުންތަކެއް ލިބިގެންދާނެއެވެ.