ޅ. އަތޮޅުގެ ދެ ރަށެއް ކަމަށްވާ ނައިފަރާއި ހިންނަވަރުގައި ކުރިއަށް ގެންދިއުމަށް ހަމަޖެހިފައިވާ ތަރައްގީގެ މަޝްރޫއުތަކަށް ބޭނުންވާ ސާމާނު އެ ރަށްތަކަށް ފޮނުވުމުގެ އަމަލީ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން މިއަދު ފަށައިފިއެވެ.
އާރުޑީސީން އެކްސްގައި ހިއްސާކުރި ޕޯސްޓެއްގައި ބުނެފައިވަނީ ނައިފަރާއި ހިންނަވަރުގައި ހިންގުމަށް ހަމަޖެހިފައިވާ މަޝްރޫއުތަކަށް ބޭނުންވާ ސާމާނު އެރަށްތަކަށް ފޮނުވުމުގެ މަސައްކަތް މިހާރު ފަށާފައިވާ ކަމަށެވެ. މިއީ އެ ރަށްތަކުގެ އުމްރާނީ ތަރައްގީއަށް ސަރުކާރުން ކުރިއަށްގެންދާ މުހިންމު މަސައްކަތްތަކެކެވެ.
އާރުޑީސީން ހާމަކުރި ގޮތުގައި މި މަޝްރޫއުތަކަކީ ސަރުކާރުގެ ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) ގެ ދަށުން އެ ރަށްތަކުގައި ހިންގުމަށް ކަނޑައަޅާފައިވާ މަޝްރޫއުތަކެކެވެ. މި މަޝްރޫއުތަކުގެ ސަބަބުން އެ ރަށްތަކުގެ ރައްޔިތުންނަށް ދިމާވެފައިވާ ދަތިތަކަށް ހައްލެއް ލިބިގެންދާނެ ކަމަށް ބެލެވެއެވެ.
މީގެއިތުރުން، އެ ކުންފުނިން ބުނީ މި މަޝްރޫއުތަކަށް ބޭނުންވާ ސާމާނުތައް އެ ރަށްތަކަށް ފޮނުވައި ނިމުނުހާ އަވަހަކަށް، އަމަލީ މަސައްކަތްތައް ރަސްމީކޮށް ފެށިގެންދާނެ ކަމަށެވެ. އާރުޑީސީން އަންނަނީ ރާއްޖޭގެ އެކި ކަންކޮޅުތަކުގައި މަގު ހެދުމާއި އެހެނިހެން އުމްރާނީ ތަރައްގީގެ ގިނަ މަޝްރޫއުތަކެއް ހިންގަމުންނެވެ.