މިސްކިތްތަކަށް ގެއްލުން ދިނުމަކީ ޓެރަރިޒަމްގެ އަމަލެއް ކަމަށް ކަނޑައެޅުމަށްޓަކައި، ޓެރަރިޒަމް މަނާކުރުމުގެ ގާނޫނަށް އިސްލާހު ގެންނަން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލު މަޖިލީހަށް ހުށަހެޅުއްވީ އިދިކޮޅު އެމްޑީޕީގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ.
މިއަދުގެ ޖަލްސާގައި މި ބިލު މަޖިލީހަށް ބަލައިގަތުމަށް ފާސްވީ ވޯޓުގައި ބައިވެރިވެވަޑައިގެންނެވި 59 މެންބަރުންގެ ތެރެއިން 56 މެންބަރުންގެ ތާއީދާއެކުގައެވެ. ބިލު ބަލައިގަތުމާ ގުޅިގެން، އެ ބިލު އިތުރަށް ދިރާސާކުރުމަށްޓަކައި ސަލާމަތީ ހިދުމަތްތަކާބެހޭ ކޮމިޓީ (241 ކޮމިޓީ) އަށް ވަނީ ފޮނުވާފައެވެ.
މި އިސްލާހު ހުށަހެޅުއްވި ސަބަބެއްގެ ގޮތުގައި މެންބަރު މުހައްމަދު އިބްރާހިމް ވިދާޅުވީ، ރާއްޖޭގެ ގާނޫނުއަސާސީގައި ދައުލަތުގެ ދީނަކީ އިސްލާމްދީން ކަމަށް ބަޔާންކޮށްފައިވާއިރު، މިސްކިތްތަކަށް ގެއްލުންދިނުމުގެ އަމަލުތައް ތަކުރާރުވަމުން ދިއުމަކީ މިސްކިތްތަކުގެ ކަރާމާތަށް އުނިކަން ލިބޭ ކަމެއް ކަމަށެވެ. އެހެންކަމުން، މިސްކިތްތަކުގެ ހުރުމަތް ހިފެހެއްޓުމަށްޓަކައި އެފަދަ އަމަލުތަކަކީ ޓެރަރިޒަމްގެ އަމަލުތަކުގެ ތެރޭގައި ހިމެނުން މުހިއްމު ކަމަށް އޭނާ ފާހަގަކުރެއްވިއެވެ.
މި ބިލުގެ ބަހުސްގައި ސަރުކާރު ހިންގާ ޕީއެންސީގެ މެންބަރުން ވެސް ވަނީ ބިލަށް ތާއީދުކުރައްވާފައެވެ. އެގޮތުން މަޖިލީހުގެ މެޖޯރިޓީ ލީޑަރު އިބްރާހިމް ފަލާހު ވިދާޅުވީ، މި ބިލަށް ސަރުކާރުގެ ފުރިހަމަ ތާއީދު އޮތް ކަމަށެވެ.
މި ބިލުގައި ހުށަހަޅާފައިވަނީ ޓެރަރިޒަމް މަނާކުރުމުގެ ގާނޫނުގެ 4 ވަނަ މާއްދާގެ (ށ) ގެ ދަށުން ޓެރަރިޒަމްގެ އަމަލުތައް ބަޔާންކޮށްފައިވާ ލިސްޓަށް “މިސްކިތަށް ގެއްލުން ދިނުން” އިތުރުކުރުމަށެވެ. މިހާރު އެ ގާނޫނުގައި ޓެރަރިޒަމްގެ އަމަލުތަކުގެ ގޮތުގައި ހިމެނެނީ މީހެއްގެ ހަށިގަނޑަށް ބޮޑު އަނިޔާއެއް ދިނުމާއި، މުދަލަށް ބޮޑެތި ގެއްލުން ދިނުމާއި، އުޅަނދުފަހަރު ހައިޖެކްކުރުން ފަދަ ކަންކަމެވެ.