ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދިންގެ ބައިނަލްއަގްވާމީ ދުވަހުގެ މުނާސަބަތުގައި، އީޖާދީ މަސައްކަތްތަކުގައި އަންހެނުންނަށް ހުރި ހުރަސްތައް ނައްތާލައި، ގައުމީ ތަރައްގީގައި ބައިވެރިވުމުގެ ފުރުސަތު ފަހިކޮށްދެއްވާނެ ކަމުގެ ފުރިހަމަ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.
މި ދުވަހާ ގުޅިގެން ރައީސުލްޖުމްހޫރިއްޔާ ދެއްވި މެސެޖުގައި، މޫސުމީ ބަދަލުތަކާއި، ސިއްހީ ދާއިރާ، ސައިބަރ ސެކިއުރިޓީ އަދި އާޓިފިޝަލް އިންޓެލިޖެންސް ފަދަ މުހިންމު ދާއިރާތަކުން ދުނިޔެއަށް ކުރިމަތިވެފައިވާ ގޮންޖެހުންތަކަށް ހައްލު ހޯދުމުގައި އަންހެނުންގެ ދައުރު ބޮޑުކަން ފާހަގަކުރެއްވިއެވެ. އެމަނިކުފާނު ވިދާޅުވީ، ޢިލްމު ކުރިއެރުވުމުގައާއި އައު އީޖާދުތައް އުފެއްދުމުގައި އަންހެނުން އަދާކުރާ ދައުރަކީ ބަދަލު ނުކުރެވޭނެ ފަދަ މުހިންމު ދައުރެއް ކަމަށެވެ.
ރާއްޖޭގައި ސްޓެމް (STEM) ދާއިރާތަކުން ތައުލީމާއި ތަމްރީނުގެ ފުރުސަތުތައް އެއްވެސް ތަފާތުކުރުމެއް ނެތި ފަހިކޮށްދެއްވާނެ ކަމަށް ރައީސް ވިދާޅުވިއެވެ. މިގޮތުން އިންޖިނިއަރިންގ، އައިސީޓީ އަދި މެރިން ސައިންސް ފަދަ ދާއިރާތަކުން މަތީ ތައުލީމާއި ސްކޮލަރޝިޕްގެ ފުރުސަތުތައް ސަރުކާރުން ފަހިކޮށްދެމުންދާކަމަށާއި އިޖާދީ އަދި އުފެއްދުންތެރި ދާއިރާތަކުން ކުރިއަށްދާން ބޭނުންވާ ކުދިންނަށް ސަރުކާރުން ފުރިހަމަ އެއްބާރުލުން ދޭނެކަމުގެ ޔަގީންކަންވެސް އެމަނިކުފާނު ދެއްވިއެވެ.
ކޮންމެ އަހަރެއްގެ ފެބުރުއަރީ 11 ވަނަ ދުވަހު ފާހަގަކުރާ ސައިންސްގެ ދާއިރާގައި ހަރަކާތްތެރިވާ އަންހެނުންނާއި އަންހެން ކުދިންގެ ބައިނަލްއަގްވާމީ ދުވަހުގެ މައިގަނޑު މަގްސަދަކީ ސައިންސާއި ޓެކްނޮލޮޖީގެ ދާއިރާގައި އަންހެނުންގެ ބައިވެރިވުން އިތުރުކޮށް، އެކަނބަލުންނަށް ހަމަހަމަ ފުރުސަތުތައް ހޯދައިދިނުމެވެ. ރައީސް ވަނީ މި ދާއިރާއިން އަންހެނުންނަށް ކުރިމަތިވާ ހުރަސްތައް ނައްތާލުމަށް މަސައްކަތްކުރާ ފަރާތްތަކުގެ އަގު ވަޒަންކުރައްވާފައެވެ.