ޤައުމީ އެއަރލައިން މޯލްޑިވިއަންއިން އަރިއަތޮޅު އުތުރުބުރީ ތޮއްޑޫއަށް ސީޕްލޭންގެ ޚިދުމަތް ރަސްމީކޮށް ފަށައިފިއެވެ.
މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންފައިވާ ވަޢުދެއް ފުއްދުމުގެ ގޮތުން ފެށި ޚިދުމަތެކެވެ. މިކަން ފާހަގަކުރުމަށް ތޮއްޑޫގައި ބޭއްވި ޚާއްސަ ރަސްމިއްޔާތު ޝަރަފުވެރިކޮށްދެއްވީ ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހިމެވެ.
އައިލަންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރ އަލީ ސަލީމް ވިދާޅުވި ގޮތުގައި، މި ދަތުރުތަކުގެ ސަބަބުން ކަނޑުމަގުން ދަތުރުކުރުމުގައި ރައްޔިތުންނާއި ފަތުރުވެރިން އުފުލަންޖެހޭ ތަކުލީފުތަކަށް ބޮޑު ހައްލެއް ލިބިގެންދާނެއެވެ. އަދި ޑިމާންޑަށް ބަލައި ދަތުރުތައް އިތުރުކުރާނެ ކަމުގެ ޔަގީންކަންވެސް އޭނާ ދެއްވިއެވެ.
މޯލްޑިވިއަންގެ ސީޕްލޭން ދަތުރުތައް ތޮއްޑޫއަށް ކުރުމަށް ހަމަޖެހިފައިވަނީ ކޮންމެ ހަފުތާއަކު ދެ ދުވަހުއެވެ. އެއީ ބުރާސްފަތި އަދި ހޮނިހިރު ދުވަހެވެ. މި ދަތުރުތަކަށް ދިވެހިންނަށް ޚާއްސަ ފެއަރއެއްގެ ދަށުން އެއްކޮޅު ޓިކެޓު 799 ރުފިޔާއަށް ލިބޭނެ އިންތިޒާމު ވަނީ ހަމަޖައްސާފައެވެ.
މި ޚިދުމަތް ފެށުމަށްޓަކައި ތޮއްޑޫގައި ސީޕްލޭން ޕްލެޓްފޯމެއް ޤާއިމްކޮށް، ރަށު ކައުންސިލް އިދާރާގައި ޗެކިންގެ ކަންކަން ކުރިއަށް ގެންދެވޭނެ އިންތިޒާމު ވަނީ ހަމަޖައްސާފައެވެ. މީގެ އިތުރުން، މޯލްޑިވިއަންއިން ދަނީ އިތުރު ބޯޓުތައް ހޯދައި، ރިސޯޓުތަކަށް ކުރާ ސީޕްލޭން ދަތުރުތައް ފުޅާކުރުމަށްވެސް މަސައްކަތް ކުރަމުންނެވެ.