ކުރިއަށް އޮތް އިންތިހާބުގެ ވޯޓުލުމަށްޓަކައި ވީހާވެސް ގިނަ އަދަދެއްގެ ރައްޔިތުން ނުކުތުމަށް، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަނބިކަނބަލުން އަދި ފަސްޓްލޭޑީ ސާޖިދާ މުހައްމަދު ގޮވާލައްވައިފިއެވެ. އެކަމަނާ މިކަމަށް ގޮވާލެއްވީ މާފަންނު މެދު ދާއިރާގެ ކެމްޕެއިން ޖަގަހަ ހުޅުވުމަށް ރޭ ބޭއްވި ހަފްލާގައި ވާހަކަދައްކަވަމުންނެވެ.
އެ ހަފްލާގައި ވާހަކަދައްކަވަމުން ފަސްޓްލޭޑީ ފާހަގަކުރެއްވި ގޮތުގައި، ވޭތުވެދިޔަ ލޯކަލް ކައުންސިލް އިންތިހާބުތަކުގައި ވޯޓުލާން ނުކުތް މީހުންގެ ނިސްބަތް ހުރީ ވަރަށް ދަށުގައެވެ. އެގޮތުން މީގެ ކުރިން ބޭއްވުނު އިންތިހާބުތަކުގައި ވޯޓުލާފައިވަނީ ގާތްގަނޑަކަށް 30 އިންސައްތަ މީހުންކަން ފާހަގަކުރައްވައި، މިފަހަރު އެ އަދަދު މައްޗަށް ޖެއްސުމަށް މަސައްކަތް ކުރުމަށް އެކަމަނާ އިލްތިމާސްކުރެއްވިއެވެ.
ވޯޓުލުމުގެ މުހިންމުކަމާ ގުޅޭގޮތުން ވާހަކަދައްކަވަމުން ސާޖިދާ މުހައްމަދު ވިދާޅުވީ، “ވަރަށް ގިނަ ބޭފުޅުން ވިދާޅުވޭ ކީއްކުރަންހޭ ވޯޓު ލަނީ. ކޮންމެ މީހަކު އަޔަސް ތިމަންނަމެންނަށް އެންމެ ރަނގަޅޭ. މިއީ ރަނގަޅު ވާހަކައެއް ނޫން. އަޅުގަނޑުމެން މި ކިޔަނީ ތަރައްގީގެ ވާހަކަ. އަޅުގަނޑުމެން މި ކިޔަނީ ތަމައްދުންގެ ވާހަކަ. މި ހުރިހާ ކަމެއް ކުރުމަށްޓަކައި އަޅުގަނޑުމެން އެބަ ބޭނުންވޭ ސަރުކާރާ އެކުގައި މަސައްކަތް ކުރާނެ ރަނގަޅު ކައުންސިލެއް.”
ސަރުކާރާއެކު މަސައްކަތް ކުރާނެ ކައުންސިލެއް ހޮވުމަށް ވޯޓު ދިނުމަށް ފަސްޖެހިއްޖެނަމަ، ދެން ހޮވޭ މީހުންނަކީ ސަރުކާރުގެ ތަރައްގީއާ ދުރު ހިޔާލު ގެންގުޅޭ ބަޔަކަށް ވެދާނެކަމުގެ ބިރު އޮތްކަން އެކަމަނާ ފާހަގަކުރެއްވިއެވެ. އަދި ރައްޔިތުން ލާ ވޯޓަކީ ސަރުކާރުގެ ތަރައްގީއާއި ރަށުގެ ކުރިއެރުމާއި ދަރިންގެ މުސްތަގުބަލާ ސީދާ ގުޅިފައިވާ ކަމެއްކަމަށްވެސް ވިދާޅުވިއެވެ.
މީގެ އިތުރުން، ރައްޔިތު މީހާ ލާ ވޯޓުގެ ސަބަބުން ރަށަށް އަންނަ ތަރައްގީގެ ފައިދާ ކޮންމެ މީހަކަށްވެސް ލިބޭނެކަން ފާހަގަކުރައްވައި، އެކަމަނާ ވަނީ ވޯޓުލާން ނުކުތުމުގެ މުހިންމުކަން ތަކުރާރުކުރައްވާފައެވެ. މި ހަފްލާ ނިންމަވާލެއްވީ ކުރިއަށް އޮތް އިންތިހާބުގައި ވޯޓުލާ މީހުންގެ އަދަދު އިތުރުކުރުމަށް އެންމެން ގުޅިގެން މަސައްކަތް ކުރުމަށް އެދިވަޑައިގަންނަވަމުންނެވެ.