އައްޑޫ ސިޓީގައި ޕީއެންސީން ފޯރިއާއެކު ކެމްޕޭން ހަރަކާތްތައް ކުރިއަށް ގެންދަނިކޮށް، އެ ސިޓީގެ އެކި ސަރަހައްދުތަކުގައި ހަރުކޮށްފައި ހުރި ޕީއެންސީ ކެންޑިޑޭޓުންގެ ޕޯސްޓަރުތަކަށް ބަޔަކު ގެއްލުންދީފިއެވެ. މި އަމަލަކީ ވަރަށް ނާތަހުޒީބީ އަމަލެއް ކަމަށް ސިފަކުރައްވައި، މަޖިލިސް މެންބަރު ސިނާ ވަނީ މިކަން ހަރުކަށި އިބާރާތުން ކުށްވެރިކުރައްވާފައެވެ.
މައުލޫމާތު ލިބިފައިވާ ގޮތުގައި ގެއްލުން ދީފައިވަނީ މަރަދޫއާއި ފޭދޫގައި މިއަދު ހުކުރުގެ ފަހުން ހަރުކުރުމަށް ތައްޔާރުކޮށްފައި ހުރި ޕޯސްޓަރުތަކަށެވެ. މަރަދޫގައި ހުރި ޕޯސްޓަރުތަކުގައި ކަޓަރު އަޅައި ހަލާކުކޮށްލާފައިވާއިރު، ފޭދޫގައި ހުރި ޕޯސްޓަރުތަކަށް ވަނީ ކަޅުތެޔޮ ޖަހައި ބޭނުން ނުކުރެވޭ ވަރަށް ގެއްލުން ދީފައެވެ.
ހުވަދޫ މީޑިއާއަށް މައުލޫމާތު ދެއްވަމުން އައްޑޫ އުތުރު ދާއިރާގެ އެމްޕީ ސިނާ ވިދާޅުވީ، މަރަދޫގެ ކެމްޕޭން ޓީމުން މުޅި އައްޑޫ ސިޓީގެ ހުރިހާ ދާއިރާތަކެއްގެ ކެންޑިޑޭޓުންގެ ޕޯސްޓަރުތައް ހައިވޭ ސަރަހައްދުގައި ޖެހުމުގެ މަސައްކަތް ރޭގައި ކުރި ކަމަށެވެ. ނަމަވެސް މަސައްކަތް އެއްކޮށް ނުނިމޭތީ ޕޯސްޓަރުތައް އެ ސަރަހައްދުގައި ބަހައްޓާފައި ދިޔައީ ކަމަށާއި، މިއަދު ހުކުރުން ފައިބައިގެން އައިސް ބެލިއިރު މަރަދޫން ހިތަދުއަށް ފައިބާ ކޮޅުގައި ހުރި ހުރިހާ ޕޯސްޓަރުތަކެއް ހުރީ ހަލާކުކޮށްލާފައި ކަމަށް އޭނާ ވިދާޅުވިއެވެ.
“ކެނޑިޑޭޓުންގެ ޕޯސްޓަރުތަކެއް ޖެހުމަށް ރޭގައި ކުރެވުނު މަސައްކަތުގެ ތެރެއިން ނުނިމި ދެން ޕޯސްޓަރުތައް އެތަނުގަައިބަހައްޓާފަ ދިޔައީ، މިއަދު ހުކުރުން ފައިބައިން އައިސް މަސައްކަތް ފަރަށް ބެލިއިރު މަރަދޫން ހިތަދުއަށް ފައިބާ ކޮޅުގައި ހުރި ހުރިހާ ޕޯޓްސޯތަކެއް ހުރީ ހަލާކުކޮށްލާފަ، ފޭދޫކޮޅުގައި ހުރި ޕޯސްޓަރޔތައްވެސް ހުރީ ހަލާކުކޮށްލާފައި. ކަޅުތެޔޮ ޖަހާ ގެެއްލުންދީފަ،
ފުލުހުންނަށް ވަނީ އަންގާލެވިފަ އެކަމަކު އަދި ވަކި ބަޔެކޭ ވަކިގޮތެކޭ ބުނާ ތަން ނޭނގޭނެ. ދެން ކޮންމެ ބަޔަކު ކުރިޔަސް މި ދުވަސްވަރަކީ އެންޓި ކެމްޕޭން ކުރިޔަސް އަދި އެއްކޮށް ކެމްޕޭން ކުރިޔަސް މިޒާތަށް މިގޮތަށް މިކަންތައް ކުރަންޖެހޭ ދުވަސްވަރެއް ކަމަކަށް އަޅުގަނޑު ޤަބޫލެއް ނުކުރަން. އެހެންވެ އަޅުގަނޑު ހަމަ ވަރަށް ހަރުކަށި އިބާރާތުން މިކަން ކުށްވެރިކުރަން،” އެމްޕީ ސިނާ
މި މައްސަލަ މިހާރު ފުލުހުންނަށް އަންގާފައިވާ ކަމަށާއި، ނަމަވެސް މިކަން ކުރީ ވަކި ކޮން ބަޔަކު ކަމެއް އަދި ސާފުނުވާ ކަމަށް ސިނާ ވިދާޅުވިއެވެ. ކެމްޕޭންގެ ފޯރި ގަދަވެފައިވާ މި ދަނޑިވަޅުގައި މިފަދަ ކަންކަން ކުރިމަތިވުމަކީ ހިތާމަހުރި ކަމެއް ކަމަށް އޭނާ ފާހަގަކުރެއްވިއެވެ.