މޯލްޑިވްސް ސްޕޯޓްސް އެވޯޑަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަރިކަލުން މުހައްމަދު އުމައިރު ނޮމިނޭޓުކުރުމާ ގުޅިގެން މީސްމީޑިއާގައި އަމާޒުވަމުންދާ ފާޑުކިއުންތަކަށް ރައީސް އޮފީހުގެ މިނިސްޓަރު އަލީ އާރިފް ރައްދު ދެއްވައިފިއެވެ. އަލީ އާރިފް ވިދާޅުވީ ރާއްޖޭގައި ތިބި ހުނަރުވެރި ކުދިންގެ ހައްގުތަކަށް އަރައިގަތުމަކީ މިނިވަން ނޫސްވެރިކަމާއި ސިޔާސީ މިނިވަންކަމެއް ނޫން ކަމަށެވެ.
މި މައްސަލައާ ގުޅިގެން އެކްސްގައި ކުރެއްވި ޕޯސްޓެއްގައި އަލީ އާރިފް ވަނީ ސްޕޯޓްސް އެވޯޑަށް އުމައިރު ނޮމިނޭޓްވުމުގެ ކުށަކީ އެއީ ވަކި ބޭފުޅެއްގެ ކުއްޖަކަށް ވުންތޯ ސުވާލު ކުރައްވާފައެވެ. އޭނާ ފާހަގަކުރެއްވި ގޮތުގައި އުމައިރާއެކު އެ ކެޓަގަރީއަށް ނޮމިނޭޓުވި އަނެއް ހަތަރު ކުދިންނަކީ ވެސް ސިޔާސީ ބޭފުޅުންގެ ކުދިންނެވެ. އަދި އެ ކުދިން ނޮމިނޭޓުވީ އުމައިރު ފަދައިން ހުނަރުވެރިވުމުން ކަމަށް ވެސް އޭނާ ވިދާޅުވިއެވެ.
މޯލްޑިވްސް ސްޕޯޓްސް އެވޯޑްސް 2025 ގައި އުމައިރު ނޮމިނޭޓްވެފައި ވަނީ އަހަރުގެ ޒުވާން ކުޅުންތެރިޔާ (ފިރިހެން) ކެޓަގަރީއަށެވެ. މި ކެޓަގަރީއަށް އޭނާ ނޮމިނޭޓްކޮށްފައިވަނީ ޓޭބަލް ޓެނިސް އެސޯސިއޭޝަންގެ ފަރާތުން ޓޭބަލްޓެނިސް ކުޅުންތެރިއެއްގެ ގޮތުގައެވެ. މިއީ ރާއްޖޭގެ ރައީސެއްގެ ބޭފުޅަކު މިފަދަ ގައުމީ އެވޯޑަކަށް ނޮމިނޭޓްވި ފުރަތަމަ ފަހަރުކަން ފާހަގަކޮށްލެވެއެވެ.
މި މައްސަލައިގައި ކުރީގެ ސްޕޯޓްސް މިނިސްޓަރު އަދި މިހާރު ޖަޕާނުގެ ސަފީރު އަހުމަދު މަހުލޫފް ވެސް ވަނީ އުމައިރުގެ ދިފާއުގައި ވާހަކަދައްކަވާފައެވެ. މަހުލޫފް ވިދާޅުވީ “އުމައިރަކީ މޮޅު ޓީޓީ ކުޅުންތެރިއެއް. ހަގީގަތް ނުބަލާ ކުދިންގެ މިފަދަ ބުރަ މަސައްކަތުގެ ކާމިޔާބީ ސިޔާސީކުރުން ހުއްޓާލަންޖެހޭ” ކަމަށެވެ.
މާދަމާ ރޭ ބޭއްވުމަށް ހަމަޖެހިފައިވާ މޯލްޑިވްސް ސްޕޯޓްސް އެވޯޑަކީ 2024 ވަނަ އަހަރު ގައުމީ ޓީމުތަކާއި ކުޅުންތެރިން ހޯދި ކާމިޔާބީތައް ފާހަގަކުރުމަށް ބާއްވާ ހަފްލާއެކެވެ. މި ހަފްލާގައި 18 ކުޅިވަރު އެސޯސިއޭޝަނަކުން މޮޅު ކުޅުންތެރިން ހޮވައި، އަހަރުގެ އެންމެ މޮޅު އެތުލީޓުގެ އިތުރުން ކުޅިވަރުގެ ދާއިރާއަށް ޚިދުމަތްކުރާ ފަރާތްތަކުގެ އަގުވަޒަންކުރުމަށް ވަނީ ހަމަޖެހިފައެވެ.