ދިވެހިރާއްޖޭގެ ކުޅިވަރު ނޫސްވެރިކަމުގެ ދާއިރާގައި ފާހަގަކޮށްލެވޭ ޚިދުމަތްތަކެއް ކުރަމުންދާ ޕަބްލިކް ސާވިސް މީޑިއާ (ޕީއެސްއެމް) ނިއުސްގެ ކުޅިވަރު އެޑިޓަރު ސާއިދު އަޙްމަދަށް، ކުޅިވަރަށް ޚިދުމަތްކުރުމުގެ ޚާއްސަ އެވޯޑު އަރުވައިފިއެވެ. ސާއިދުއަށް މި ޝަރަފުވެރި އެވޯޑު އެރުވީ ސޯޝަލް ސެންޓަރުގެ އިންޑޯ ހޯލުގައި ބޭއްވި “މޯލްޑިވްސް ސްޕޯޓްސް އެވޯޑު 2024” ގެ ޚާއްސަ ޙަފްލާގައެވެ.
ކުޅިވަރު ނޫސްވެރިކަމުގެ މައިދާނުގައި ރާއްޖެއަށް އަގުނުކުރެވޭ ފަދަ ޚިދުމަތްތަކެއް ކޮށްފައިވާތީ، ދައުލަތުގެ ފަރާތުން ދެއްވި މި “ސްޕެޝަލް ރެކޮގްނިޝަން އެވޯޑު” ސާއިދުއާ ހަވާލުކޮށްދެއްވީ ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިއުއެވެ. މިއީ ސާއިދު މި ދާއިރާގައި ކުރަމުންދާ ބުރަ މަސައްކަތުގެ އަގު ވަޒަންކުރުމުގެ ގޮތުން ދެވުނު އެވޯޑެކެވެ.
ސާއިދު އޭނާގެ ނޫސްވެރިކަމުގެ ކެރިއަރު ފެށީ 2009 ވަނަ އަހަރު، އުމުރުން އެންމެ 20 އަހަރުގައެވެ. އެންމެ ފުރަތަމަ ދިވެހިރާއްޖޭގެ އަޑުން މަސައްކަތް ފެށި ސާއިދު ވަނީ މި ދާއިރާގައި 17 އަހަރު ހޭދަކޮށްފައެވެ. ފާހަގަކޮށްލެވޭ ގޮތުގައި، އޭނާގެ ކެރިއަރުގެ ފުރަތަމަ 13 އަހަރު މަސައްކަތް ކޮށްފައިވަނީ އެއްވެސް އުޖޫރައަކާ ނުލައި، ކުޅިވަރަށް އޮތް ލޯތްބެއްގެ ބޮޑުކަމުންނެވެ. ޕީއެސްއެމް ނިއުސްއާ އޭނާ ގުޅުނީ 2015 ވަނަ އަހަރު އެސިސްޓަންޓް ޕްރޮޑިއުސަރެއްގެ މަގާމުންނެވެ.
ސާއިދަކީ ހަމައެކަނި ނޫސްވެރިއެއް ނޫނެވެ. އޭނާއަކީ ކުޅަދާނަ ކޮމެންޓޭޓަރެއްގެ އިތުރުން، ކުޅިވަރު އެސޯސިއޭޝަންތަކާއި، އެތުލީޓުން އަދި ކޯޗުންނާ ގާތް ގުޅުމެއް ބާއްވާ ހުނަރުވެރި ޝަހުސިއްޔަތެކެވެ. އޭނާގެ މަސައްކަތްތަކުން ރާއްޖޭގެ ކުޅިވަރުގެ ދާއިރާއަށް ބޮޑެތި ކުރިއެރުންތަކެއް ލިބިފައިވާކަން ގިނަ ބަޔަކު ގަބޫލުކުރެއެވެ.
ސާއިދުގެ ޚިދުމަތްތައް ފާހަގަކޮށްލެވެނީ ހަމައެކަނި އޭނާގެ ހުނަރުގެ ސަބަބަކުން ނޫނެވެ. 2018 ވަނަ އަހަރު ދެ ކިޑްނީ ފެއިލްވުމާއި، އޭގެ ފަހުން ކުރިމަތިވި ކެންސަރުގެ ބަލިމަޑުކަމުގައި ވެސް އޭނާ ދެއްކި ހިތްވަރަކީ ނަމޫނާއެކެވެ. ބަލިހާލަތުގެ ސަބަބުން ކެމެރާ ކުރިމައްޗަށް ނޭރުނު ދުވަސްތަކުގައި ވެސް، ކެމެރާގެ ފުރަގަހުގައި ހުރެގެން އޭނާ ވަނީ މެދުކެނޑުމެއްނެތި ކުޅިވަރުގެ ޚަބަރުތަކާއި މައުލޫމާތު ފެތުރުމުގައި ދެމިހުރެފައެވެ.