ބަރަކާތްތެރި ރަމަޟާން މަހުގެ ތަހުނިޔާއާއި ހެޔޮއެދުންތައް، ދިވެހިރާއްޖޭގެ ލޮބުވެތި އެންމެހައި ރައްޔިތުންނަށާއި، މުޅި އިސްލާމީ އުންމަތަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވައިފިއެވެ.
ރަމަޟާން މަހުގެ ތަޙުނިޔާ ފޮނުއްވައި ރައީސުލްޖުމްހޫރިއްޔާ ނެރުއްވި ބަޔާނުގައި ވިދާޅުވީ، ކޮންމެ އިޞްލާޙެއްގެވެސް ފެށުމަކީ ތިމާ ކަމަށެވެ. އާއިލާއަކަށް، މުޖުތަމަޢަކަށް ނުވަތަ ޤައުމަކަށް ހެޔޮ ބަދަލެއް ގެންނަން އެދޭ މީހާ، އެންމެ ފުރަތަމަ އެ ބަދަލެއްގެ ޢަމަލީ ނަމޫނާއަކަށް ވާންޖެހޭނީ އަމިއްލައަށް ކަމަށާއި، އޭރުން އެ ބަދަލު މުޅި ޤައުމަށް ފޯރާނެ ކަމަށް އެމަނިކުފާނު ފާހަގަކުރެއްވިއެވެ.
ރައީސްގެ މެސެޖުގައި މުޖުތަމަޢުން ދެކެން ބޭނުންވާ މުހިންމު ކަންތައްތަކެއްގެ މައްޗަށް އަލިއަޅުއްވާލެއްވިއެވެ. އެގޮތުން “ފަސްވަގުތު ނަމާދުކުރާ، ކުޑަކުދީންގެ ކަރާމާތް ރައްކާތެރިކުރާ، އަދި ބޮޑެތި މީހުންނަށް އިޙްތިރާމުކުރާ މުޖުތަމަޢެއް” ބޭނުންވާކަމަށް ވިދާޅުވިއެވެ. މީގެ އިތުރުން މަސްތުވާތަކެތިން ސަލާމަތްވެފައިވާ، ޞިއްޙީ ގޮތުން ނުރަނގަޅު އާދަތަކަށް ނޫނެކޭ ބުނާ، އަދި އިސްލާމީ އަސްލުތަކާއި ދިވެހިވަންތަ ސަގާފަތް ނަގަހައްޓާ މުޖުތަމަޢެއް ބިނާކުރުމުގެ މުހިންމުކަން ފާހަގަކުރެއްވިއެވެ.
ދިވެހި މުޖުތަމަޢަށް ހެޔޮ ބަދަލެއް ގެނައުމުގައި ރަމަޟާން މަހަކީ ރަނގަޅު މުރުޝިދެއްގެ ގޮތުގައި ސިފަކުރައްވަމުން ރައީސް ވިދާޅުވީ، މި މަހަކީ އަޚްލާޤުގެ އެންމެ މަތިވެރި ފިލާވަޅުތައް އުނގަންނައިދޭ މަހެއް ކަމަށެވެ. ވަގުތަށް ކަމޭހިތުމާއި، ތަޤުވާވެރިވުމާއި، ހިތާއި ރޫޙު ހެޔޮ ކަންކަމުގައި ހޭދަކުރަން މި މަހުން ދަސްކޮށްދޭކަމަށް އެމަނިކުފާނު ވިދާޅުވިއެވެ.
ރައީސްގެ ބަޔާން ނިންމަވާލެއްވީ، މި އަހަރުގެ ރަމަޟާން މަހަކީ ޤައުމަށް ހެޔޮ ބަދަލެއް ގެނައުމަށްޓަކައި، އަމިއްލަ ނަފްސު އެ ބަދަލާ އެއްގޮތަށް ދީނީ އަދި ޤައުމީ އިންތަކުގެ މަތީގައި ތަރުބިއްޔަތުކުރާ މައްސަރަކަށް ހެދުމަށް އިލްތިމާސްކުރައްވަމުންނެވެ. އަދި ރޯދަވީއްލުމާއި ހާރުދަން ފަދަ އިޖުތިމާޢީ ބައްދަލުވުންތަކަކީ އާއިލީ ގުޅުންތަކާއި ކުލުނު އިތުރުކޮށްދޭ މަދަރުސާތަކެއްގެ ގޮތުގައި އެމަނިކުފާނު ސިފަކުރެއްވިއެވެ.