ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިހާބުގެ ކެމްޕެއިން ކުރިއަށްދާއިރު، އެކަކު އަނެކަކަށް ބަދު ބަސް ބުނެ، ފުރައްސާރަ ނުކުރުމަށް އަޒުމް ކަނޑައެޅުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަނބިކަނބަލުން، ފަސްޓްލޭޑީ ސާޖިދާ މުހައްމަދު އިލްތިމާސްކުރައްވައިފިއެވެ.
ޕީއެންސީގެ އަންހެނުންގެ ރޫހުގެ ފަރާތުން އާޓިފިޝަލް ބީޗުގައި ބޭއްވި މާހެފުމުގައި ވާހަކަ ދައްކަވަމުން ސާޖިދާ ވަނީ ބަރަކާތްތެރި ރަމަޟާން މަހާ އެކު އަޅުކަމުގައި ހޭދަކުރާ ވަގުތު އިތުރު ކުރުމަށް ރައްޔިތުންނަށް ނަސޭހަތްތެރިވެވަޑައިގެންފައެވެ. ހަމައެއާކު، ދިވެހިންގެ ކުރިމަތީގައި މުހިންމު އިންތިހާބެއް އޮތް އިރު، ރަމަޟާން މަހުގެ ތެރޭގައި އެ އިންތިހާބުގެ ކެމްޕެއިނަށް ވެސް ކޮންމެވެސް ވަގުތުކޮޅެއް ހުސްކޮށް ދެއްވުމަށް އެކަމަނާ އެދިވަޑައިގެންނެވިއެވެ.
އިސްލާމް ދީނަކީ ވަރަށް ފުރިހަމަ ދީނެއްކަން ފާހަގަ ކުރައްވައި ސާޖިދާ ވިދާޅުވީ ހުރިހާ ކަމެއް ވެސް ހަމަހަމަކަމާއެކީގައި ކުރަން ޖެހޭ ކަމަށެވެ. އެހެންވީމަ ދީނީ އަގީދާ ވަރުގަދަ ކުރުމާ އެކީގައި ހަވާލުވެފައިވާ ޒިންމާތައް ވެސް އަދާކުރުމުގެ މުހިންމުކަން އެކަމަނާ ފާހަގަ ކުރެއްވިއެވެ. ސާޖިދާ ވިދާޅުވީ އިންތިހާބަކާ ކުރިމަތިލާއިރު، އެކަކު އަނެކަކަށް ބަދުބަސް ބުނުމާއި ފުރައްސާރަކުރުމުން އެންމެހާ ފަރާތްތަކުން ރައްކާތެރިވާން ޖެހޭ ކަމަށެވެ.
“މިއީ ވެސް ކުރެވޭ އަޅުކަމެކޭ. މިކަންކަން ވެސް އަޅުކަމެއްގެ ގޮތުގައި ބަލަމާ ހިނގާށޭ. އަޅުގަނޑުމެން އަހުލާގު ރަނގަޅުކޮށް، މީހުންނާ މުއާމަލާތުކުރާއިރު އަދަބު އިހުތިރާމު އަދާކުރުމަކީ ދީނީ ގޮތުން އަޅުގަނޑުމެންނަށް ވަރަށް މުހިންމު ކަންކަން،” ސާޖިދާ ވިދާޅުވިއެވެ.
މީގެ އިތުރުން އެކަމަނާ ވިދާޅުވީ މިއަދު އަޒުމް ކަނޑައަޅަންވީ އަހުލާގު ރަނގަޅު، އެހެން މީހުންނަށް އިހްތިރާމް ކުރާ، އަދި އެހެން މީހުންނަށް ފުރައްސާރަ ނުކުރާ ބައެއް ކަމުގައި ވުމަށް ކަމަށެވެ. އަދި ކެމްޕެއިންގެ ހަރަކާތްތައް ވެސް އެގޮތުގައި ކުރިއަށް ގެންގޮސް ކާމިޔާބު ކުރަން މަސައްކަތް ކުރުމަށް އެދިވަޑައިގަތެވެ.
ސާޖިދާ ވަނީ ކުރިއަށް އޮތް ކެމްޕެއިނުގެ ހަރަކާތްތައް އިސްލާމީ ހަމަތަކާއި ރިވެތި އުސޫލުތަކުގެ މަތިން ގެންގޮސް ކާމިޔާބު ކުރުމަށް ޕީއެންސީގެ ކެންޑިޑޭޓުންނަށް އިލްތިމާސްކުރައްވައިފައެވެ. ވާހަކަފުޅު ނިންމަވާލައްވަމުން އެކަމަނާ ވަނީ ކުރިއަށް އޮތް އިންތިހާބުގައި ޕީއެންސީގެ ކެންޑިޑޭޓުންނަށް ކާމިޔާބު ދެއްވުމަށް އެދި ދުއާ ކުރައްވާފައެވެ.