ރޭގެ ވަގުތެއްގައި ހުޅުމާލޭގައި ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު ފަސް މީހަކަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ވަގުތީ ބޯހިޔާވަހިކަން ފޯރުކޮށްދީފިއެވެ. މި ހާދިސާ ހިނގާފައިވަނީ ހުޅުމާލެ ފޭސް 1 ގައި ހުންނަ ވަން އެވެނިއުގެ އެޕާޓްމަންޓެއްގައެވެ.
އެންޑީއެމްއޭއިން މައުލޫމާތު ދެއްވާފައިވާ ގޮތުގައި، ރޭ 23:00 ހާއިރު ހިނގި މި ހާދިސާ ހިނގާފައިވަނީ ވަން އެވެނިއުގެ ހަތްވަނަ ފަންގިފިލާގެ އެޕާޓްމަންޓެއްގައެވެ. މި އަލިފާނުގެ ހާދިސާގައި އެ އެޕާޓްމަންޓުގެ ބަދިގެ ވަނީ ބޭނުން ނުކުރެވޭ ވަރަށް އަނދައިގެން ގޮސްފައެވެ.
މި ހާދިސާއާ ގުޅިގެން ވަގުތީ ބޯހިޔާވަހިކަން ފޯރުކޮށްދިން ފަސް މީހުންގެ ތެރޭގައި އުމުރުން ދުވަސްވީ މީހަކާއި ނޭވާހިއްލާ ކުޑަކުއްޖަކު ވެސް ހިމެނޭ ކަމަށް އެންޑީއެމްއޭއިން ވިދާޅުވިއެވެ. ނަމަވެސް، މި ހާދިސާގައި އެއްވެސް މީހަކަށް ޖިސްމާނީ އަނިޔާއެއް ލިބުނު ކަމުގެ ރިޕޯޓެއް ލިބިފައެއް ނުވެއެވެ.
އެ އޮތޯރިޓީން މިހާރު ދަނީ މި ހާދިސާގައި މުދަލަށް ލިބުނު ގެއްލުންތަކުގެ ތަފްސީލު ބެލުމުގެ މަސައްކަތް ކުރަމުންނެވެ. އަދި ހާލުގައި ޖެހުނު ފަރާތްތަކަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް ވެސް ދަނީ ކުރިއަށެވެ.
މިއީ މި ހިނގާ ފެބްރުއަރީ މަހުގެ ތެރޭގައި ހުޅުމާލެ ފުރަތަމަ ފިޔަވަހީގައި ހިނގި ދެވަނަ އަލިފާނުގެ ހާދިސާއެވެ. މި މަހުގެ 1 ވަނަ ދުވަހު ވެސް ފޭސް 1 ގެ ޗަނބޭލީ 5 ގޯޅީގައި ހުރި ގުދަނެއްގައި ރޯވެ، 25 މީހަކަށް ވަގުތީ ބޯހިޔާވަހިކަން ފޯރުކޮށްދޭން ޖެހުނުކަން ފާހަގަކުރެވެއެވެ.