މި ހިނގާ ރިޔާސީ ދައުރުގެ ފަސް އަހަރުގެ ތެރޭގައި، ރާއްޖޭގައި އިޢާދަކުރުވަނިވި ހަކަތައިން ކަރަންޓް އުފައްދާ މިންވަރު 33 އިންސައްތައަށް މަތިކުރުމުގެ ލަނޑުދަނޑި ހާސިލުކޮށް، ރާއްޖޭގެ އިޤްތިޞާދަށް ހެޔޮ ބަދަލެއް ގެނެސްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ. ރައީސް މިފަދައިން ވިދާޅުވީ މިއަދު ފާހަގަކުރަމުންދާ ދުނިޔޭގެ ހަކަތައިގެ ދުވަހާ ގުޅިގެން މީސްމީޑިއާގައި ކުރެއްވި ޕޯސްޓެއްގައެވެ.
ރައީސުލްޖުމްހޫރިއްޔާގެ ޕޯސްޓުގައި ފާހަގަކުރެއްވި ގޮތުގައި، ރާއްޖޭގެ ރީތި ތިމާވެށި ހިމާޔަތްކޮށް، ދެމެހެއްޓެނިވި ތަރައްޤީގެ ލަނޑުދަނޑިތައް ހާސިލު ކުރެވޭނީ އިޢާދަކުރުވަނިވި ސާފު ހަކަތަ ބޭނުންކުރުން އިތުރުކޮށްގެންނެވެ. އަދި ވޭތުވެދިޔަ ދެ އަހަރަކީ ރާއްޖޭގެ ތާރީޚުގައި މި ދާއިރާއިން އެންމެ ރަނގަޅު ނަތީޖާއެއް ހާސިލްކުރި ދެ އަހަރުކަން އެމަނިކުފާނު ފާހަގަކުރެއްވިއެވެ.
މި އަމާޒާ ގުޅޭގޮތުން ރައީސް ވިދާޅުވީ، “އިރާދަކުރެއްވިއްޔާ މި 5 އަހަރުގެ ތެރޭ، އިޢާދަކުރުވަނިވި ހަކަތައިން ކަރަންޓު އުފައްދާ މިންވަރު %33 އަށް މަތިކުރުމުގެ ލަނޑުދަނޑި ހާސިލްކޮށް، ޤައުމުގެ އިޤްތިޞާދަށް ހެޔޮ ބަދަލެއް ގެނަސްދޭނަން” ކަމަށެވެ.
އިޢާދަކުރުވަނިވި ހަކަތައިގެ ދާއިރާއިން ސަރުކާރުން ކުރަމުންދާ މަސައްކަތްތަކުގެ ދަށުން، ރާއްޖޭގެ އެކި ކަންކޮޅުތަކުގައި މިފަދަ މަޝްރޫޢުތައް ދަނީ ފުޅާކުރަމުންނެވެ. އެގޮތުން، ދާދި ފަހުން ރާއްޖޭގެ 24 ރަށެއްގައި 50 މެގަވޮޓުގެ އިޢާދަކުރުވަނިވި ހަކަތަ އުފެއްދުމުގެ މަސައްކަތް ފެށުމަށް ވަނީ ތައްޔާރުވެފައެވެ.
މިކަމާ ގުޅޭގޮތުން މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީން ވިދާޅުވީ، މިއީ ރައީސް ޑރ. މުއިއްޒު ކަނޑައަޅުއްވާފައިވާ ހަކަތައިގެ އަމާޒަށް ވާސިލްވުމަށް އެޅޭ މުހިންމު ފިޔަވަޅެއް ކަމަށެވެ. ސަރުކާރުގެ މައިގަނޑު އަމާޒަކީ 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ކަރަންޓުގެ 33 އިންސައްތައަކީ ތިމާވެއްޓާ ރައްޓެހި ވަސީލަތްތައް ބޭނުންކޮށްގެން އުފައްދާ ކަރަންޓަށް ހެދުމެވެ.