ސައުދީ އަރަބިއްޔާގެ ސަރުކާރުން ކޮންމެ ރަމަޟާން މަހަކު ދިވެހިރާއްޖެއަށް ފޯރުކޮށްދޭ އެހީތެރިކަމުގެ ދަށުން، މިއަހަރުގެ ކަދުރު ހަދިޔާގެ ފުރަތަމަ ޝިޕްމަންޓް އިސްލާމީ ކަންތައްތަކާ ބެހޭ ވުޒާރާއާ މިއަދު ހަވާލުކޮށްފިއެވެ. އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވުނު ހާއްސަ ރަސްމިއްޔާތެއްގައި، މި 15 ޓަނުގެ ކަދުރު ދިވެހި ސަރުކާރާ ހަވާލުކޮށްދެއްވީ ސައުދީ އަރަބިއްޔާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ޔަހްޔާ ހަސަން އަލް ގަހްތާނީއެވެ. ދިވެހި ސަރުކާރުގެ ފަރާތުން މި އެހީއާ ހަވާލުވެވަޑައިގަތީ އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދުއެވެ.
މި ރަސްމިއްޔާތުގައި ވާހަކަފުޅު ދައްކަވަމުން ވަޒީރު ޑރ. ޝަހީމް ވަނީ ސައުދީ ސަރުކާރުން މެދުނުކެނޑި ރާއްޖެއަށް ފޯރުކޮށްދެމުންދާ ދީލަތި އެހީތެރިކަމަށްޓަކައި ޝުކުރު އަދާކުރައްވާފައެވެ. ވަޒީރު ފާހަގަކުރެއްވި ގޮތުގައި، ކޮންމެ އަހަރަކުވެސް ރަމަޟާން މަހާ ދިމާކޮށް ސައުދީން ފޯރުކޮށްދޭ މި އެހީއަކީ ދެ ގައުމުގެ ދެމެދުގައި އޮތް ބަދަހި އަދި ތާރީހީ ގުޅުން ރަމްޒުކޮށްދޭ ކަމެކެވެ.
ސައުދީ ސަފީރު ޔަހްޔާ ހަސަން އަލް ގަހްތާނީގެ ވާހަކަފުޅުގައި، ރާއްޖެއަކީ ސައުދީ އަރަބިއްޔާއަށް ވަރަށް މުހިންމު ބައިވެރިއެއްކަން ފާހަގަކުރެއްވިއެވެ. އަދި ރާއްޖޭގެ ތަރައްޤީއަށާއި ދިވެހި ރައްޔިތުންނަށް އެހީތެރިކަން ފޯރުކޮށްދިނުމުގައި ސައުދީ އަރަބިއްޔާއިން އަބަދުވެސް ސާބިތުކަމާއެކު ދެމިއޮންނާނެ ކަމުގެ ޔަގީންކަން ވަނީ ދެއްވިއެވެ.
މިއަދު ހަވާލުކުރި 15 ޓަނުގެ ކަދުރަކީ އިސްލާމީ ކަންތައްތަކާ ބެހޭ ވުޒާރާއަށް ހަދިޔާކުރި މިންވަރެވެ. މީގެ އިތުރުން، އާންމު ރައްޔިތުންނަށް ބެހުމަށްޓަކައި ސައުދީ ސަރުކާރުން ހަދިޔާކުރާ 50 ޓަނުގެ ކަދުރުގެ ޝިޕްމަންޓެއް މިހާރު ރާއްޖެއަށް އައުމުގެ މަގުމަތީގައިވާ ކަމަށް އެ ވުޒާރާއިން މަޢުލޫމާތު ދެއެވެ. އެ ޝިޕްމަންޓް ލިބުމާއެކު، މާލެއާއި އަތޮޅުތަކުގެ ރަށްރަށުގައި ކަދުރު ބެހުމުގެ މަސައްކަތް ހަލުވިކަމާއެކު ފެށިގެންދާނެއެވެ.
ސައުދީ އަރަބިއްޔާއަކީ ކޮންމެ އަހަރަކުވެސް ރާއްޖެއަށް ގިނަ އަދަދަކަށް ކަދުރު ހަދިޔާކުރާ ގައުމެކެވެ. އެގޮތުން ނިމިދިޔަ އަހަރުވެސް އެ ގައުމުން ވަނީ 60 ޓަނުގެ ކަދުރު ހަދިޔާކޮށްފައެވެ. މީގެ އިތުރުން، ރަސްގެފާނު ސަލްމާން ބިން އަބްދުލްއަޒީޒް އަލް ސައުދުގެ ހާއްސަ އިސްނެންގެވުމުގެ ދަށުން ކުރިއަށްގެންދާ ރޯދަވީއްލުމުގެ ޕްރޮގްރާމްވެސް މިއަހަރު ރާއްޖޭގައި ވަނީ ފަށާފައެވެ.