ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު، ދިވެހިރާއްޖޭގައި ތިއްބަވާ ބޭރުގެ ސަފީރުންނަށާއި ބައިނަލްއަޤްވާމީ ޖަމާޢަތްތަކުގެ މަންދޫބުންނަށް ޚާއްޞަ ރޯދަ ވީއްލުމެއް ބާއްވަވައިފިއެވެ.
މިއަދު ރައީސުލްޖުމްހޫރިއްޔާގެ ރަސްމީ ގެކޮޅު، މުލީއާގޭގައި ބޭއްވި މި ޙަފުލާގައި ބައިވެރިވެ ވަޑައިގެންނެވި ބޭރުގެ ޢިއްޒަތްތެރިން ވަނީ ރައީސުލްޖުމްހޫރިއްޔާގެ ދެކަނބަލުންނާ ބައްދަލުކުރައްވައި، ރަމަޟާން މަހުގެ ހެޔޮއެދުންތައް އަރިސްކުރައްވައި އިޙްތިރާމް އަދާކުރައްވާފައެވެ.
ރާއްޖޭގައި ޤާއިމުވެ ތިއްބަވާ ބޭރުގެ ޑިޕްލޮމެޓުންނާއި، ޖަމުޢިއްޔާތަކުގެ އިސްވެރިންނަށް އަމާޒުކޮށްގެން ކޮންމެ އަހަރަކު ރައީސުލްޖުމްހޫރިއްޔާގެ ދެކަނބަލުން ބާއްވަވާ މި ރޯދަ ވީއްލުމަކީ، ބޭރުގެ ޤައުމުތަކާއެކު އޮންނަ ޚާރިޖީ ގުޅުންތައް ބަދަހިކުރުމަށް ބާއްވާ މުހިންމު ހަރަކާތެކެވެ.
ރައީސް އޮފީހުން މަޢުލޫމާތު ދެއްވި ގޮތުގައި، މިފަދަ ހަރަކާތްތަކުގެ ސަބަބުން ދީނީ އަދި ސަޤާފީ ކަންކަމުގެ ތެރެއިން ބައިނަލްއަޤްވާމީ މުޖުތަމަޢުއާއެކު އޮންނަ އެކުވެރިކަން އާލާވެގެންދާނެއެވެ.