މާލޭގައި ހުންނަ ވެސްޓް މެނޭޖްމަންޓް ކޯޕަރޭޝަން (ވެމްކޯ) ގެ ސައިޓެއްގެ ތެރޭގައި ހިނގި ހާދިސާއެއްގައި މީހަކަށް ސީރިއަސް އަނިޔާތަކެއް ލިބި، އައިޖީއެމްއެޗްގެ ވެންޓިލޭޓަރުގައި ފަރުވާ ދޭން ފަށައިފިއެވެ.
ފުލުހުން މީޑިއާތަކަށް މައުލޫމާތު ދެއްވި ގޮތުގައި، މި ހާދިސާ ހިނގާފައިވަނީ ނިމިދިޔަ އާދިއްތަ ދުވަހުއެވެ. ނަމަވެސް، މި ހާދިސާގެ ރިޕޯޓު ފުލުހުންނަށް ހުށަހަޅާފައިވަނީ އިއްޔެގެ ވަގުތެއްގައެވެ. މި ހާދިސާގައި އަނިޔާވި މީހާގެ ހާލަތު ސީރިއަސް ވުމާ ގުޅިގެން މިހާރު އަންނަނީ އައިޖީއެމްއެޗްގެ ވެންޓިލޭޓަރުގައި އެމީހާއަށް ފަރުވާ ދެމުންނެވެ.
ވެމްކޯ ސައިޓު ތެރޭގައި ހިނގީ ކޮން ކަހަލަ ހާދިސާއެއް ކަމެއް ފުލުހުން އަދި ހާމައެއް ނުކުރެއެވެ. އަދި މި ހާދިސާގައި އަނިޔާވި މީހާއަކީ ދިވެއްސެއް ކަމެއް ނުވަތަ ބިދޭސީއެއް ކަމެއް ވެސް ފުލުހުން މިހާތަނަށް ސާފުކޮށްދީފައެއް ނުވެއެވެ.
މި މައްސަލައާ ގުޅިގެން ބަލަންޖެހޭ ކަންކަން ބަލައި، އިތުރަށް ތަހުގީގު ކުރަމުން އަންނަ ކަމަށް ފުލުހުން ވިދާޅުވިއެވެ. މި ހާދިސާއާ ގުޅޭ އިތުރު ތަފްސީލެއް ވެމްކޯގެ ފަރާތުން ވެސް އަދި ރަސްމީކޮށް ހާމަ ކޮށްފައެއް ނުވެއެވެ.