ވެރިކަން ކުރާ ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) އިން އިންތިޒާމުކުރާ ހާއްސަ ތަރާވީހެއް މާދަމާރޭ މާލޭގެ އާޓިފިޝަލް ބީޗުގައި ބޭއްވުމަށް ނިންމައިފިއެވެ. މި ތަރާވީހުގައި ރައީސުލްޖުމްހޫރިއްޔާ އަދި ޕީއެންސީގެ ރައީސް ޑރ. މުހައްމަދު މުއިއްޒު ބައިވެރިވެވަޑައިގަންނަވާނެއެވެ.
ޕީއެންސީން މައުލޫމާތު ދީފައިވާ ގޮތުގައި މި ތަރާވީހު އޮންނާނީ މާދަމާރޭ 9:30 ގައި އާޓިފިޝަލް ބީޗުގައެވެ. މި ހަރަކާތުގައި ބައިވެރިވުމަށް އެ ޕާޓީގެ މެމްބަރުންނާއި ސަރުކާރަށް ތާއީދުކުރާ ހުރިހާ ފަރާތްތަކަށް ޕީއެންސީން ވަނީ ދައުވަތު އަރުވާފައެވެ.
އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގެ ކެމްޕެއިން ފޯރި ގަދަވެފައިވާ މި ދަނޑިވަޅުގައި، ޕީއެންސީން ދަނީ މާލެ އާއި އަތޮޅުތެރޭގައި ފުޅާދާއިރާއެއްގައި ކެމްޕެއިން ހަރަކާތްތައް ހިންގަމުންނެވެ. އެގޮތުން ރައީސް ޑރ. މުއިއްޒު ގެންދަވަނީ މާލޭގެ އެކި ދާއިރާތަކުގެ ގެތަކަށް ޒިޔާރަތް ކުރައްވައި ރައްޔިތުންނާ ބައްދަލު ކުރައްވަމުންނެވެ.
ރައީސްގެ މި ޒިޔާރަތްތަކުގައި ދައުލަތުގެ ވަޒީރުންނާއި، ޕީއެންސީގެ ލީޑަޝިޕްގެ ބޭފުޅުންގެ އިތުރުން ރައްޔިތުންގެ މަޖިލީހުގެ ގިނަ މެމްބަރުންވެސް ބައިވެރިވެވަޑައިގަންނަވައެވެ. މި އިންތިހާބުގައި ޕީއެންސީން މަދުވެގެން 800 އާއި 900 އާ ދެމެދުގެ އަދަދަކަށް ގޮނޑި ކާމިޔާބު ކުރާނެ ކަމަށް އެ ޕާޓީގެ ކެމްޕެއިން މެނޭޖަރު އަދި ޕީޖީ ލީޑަރު އިބްރާހިމް ފަލާހް ވަނީ ވިދާޅުވެފައެވެ.
މި އިންތިހާބުގެ ވާދަވެރިކަން އެންމެ ބޮޑަށް ފެންނަނީ ޕީއެންސީ އާއި އިދިކޮޅު އެމްޑީޕީއާ ދެމެދުގައެވެ. އިންތިހާބުގެ ވޯޓުލުމުގެ ކުރިންވެސް، ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ 70 ގޮނޑި ޕީއެންސީއަށް ވަނީ ކަށަވަރުވެފައެވެ. އަނެއްކޮޅުން އިދިކޮޅު އެމްޑީޕީއަށް މިހާތަނަށް ކަށަވަރުވެފައިވަނީ އެންމެ 6 ގޮނޑިއެވެ