ކުރިއަށް އޮތް ލޯކަލް ކައުންސިލް އިންތިޚާބާއެކު، ކައުންސިލްތަކުގެ މަސައްކަތްތައް އިތުރަށް ހަރުދަނާވެ، ސަރުކާރާ ގުޅިގެން ރަށްވެހި ތަރައްޤީ ގެނައުމުގައި ރައްޔިތުންގެ އުންމީދުތައް ޙަޤީޤަތަކަށް ވެގެންދިއުމަކީ އުންމީދެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިކަން ހާމަކުރެއްވީ މިއަދު ފާހަގަކުރަމުންދާ ލާމަރުކަޒީ ދުވަހުގެ މުނާސަބަތުގައި ފޮނުއްވި ޚިޠާބުގައެވެ.
ރައީސުލްޖުމްހޫރިއްޔާގެ ޚިޠާބުގައި، ރާއްޖޭގެ ޖިއޮގްރަފީ އުފެދިފައިވާ ގޮތުން އެންމެ އިހު ޒަމާނުއްސުރެވެސް ދައުލަތުގެ ޚިދުމަތްތައް ފޯރުކޮށްދީފައިވަނީ ލާމަރުކަޒީ އުސޫލުންކަން ތާރީޚީ ލިޔުންތަކުން އެނގެން އޮތްކަން ފާހަގަކުރެއްވިއެވެ. އަދި މިހާރުގެ ޤާނޫނުއަސާސީގެ ދަށުން މި ނިޒާމު އިތުރަށް ހަރުދަނާކުރުމުގެ ފުރުޞަތު ފަހިވެފައިވާކަމަށް އެމަނިކުފާނު ބަޔާންކުރެއްވިއެވެ. ވޭތުވެދިޔަ ދެ އަހަރުގެ ތެރޭގައި ލާމަރުކަޒީ ޚިދުމަތްތައް ފުޅާކޮށް، ރައްޔިތުންގެ އިތުބާރު ހޯދުމަށް ސަރުކާރުން މުހިންމު މަސައްކަތްތަކެއް ކޮށްފައިވާކަންވެސް ރައީސް ފާހަގަކުރެއްވިއެވެ.
ކައުންސިލްތަކަށް ދިމާވެފައިވާ ގިނަ ދުވަސްވީ ކަންބޮޑުވުންތަކަށް ޙައްލު ހޯދައިދީފައިވާކަން ފާހަގަކުރައްވަމުން ރައީސް ވިދާޅުވީ، ކައުންސިލްތަކަށް އާމްދަނީ ލިބޭނެ މަގުތައް އިތުރަށް ފަހިކޮށްދިނުމާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކަށް ޙައްޤު މަޤާމު ހޯދައިދިނުމުގެ އިތުރުން، ކައުންސިލް މުވައްޒަފުންގެ މުސާރަ ބޮޑުކުރުމުގެ މަސައްކަތް ކުރެވިފައިވާ ކަމަށެވެ. މީގެއިތުރުން، ކައުންސިލްތަކަށް ބޭނުންވާ ވަސީލަތްތަކާއެކު ޒަމާނީ އައު އިމާރާތްތައް ބިނާކޮށްދިނުމަށް ސަރުކާރުން އިސްކަންދެއްވާކަމަށްވެސް ވިދާޅުވިއެވެ.
ރަށްތަކުގެ އަސާސީ ޚިދުމަތްތަކާ ގުޅޭގޮތުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ކޮންމެ ރަށެއްގައި ފުލުހުންގެ ޚިދުމަތާއި އޭޓީއެމްގެ ޚިދުމަތް ޤާއިމުކުރުމުގެ އިތުރުން، ކޮންމެ އަތޮޅަކުން އައިޑީކާޑާއި ޕާސްޕޯޓު ހެދޭނެ އިންތިޒާމު މިހާރު ހަމަޖެހިފައިވާ ކަމަށެވެ. އަދި ހުރިހާ ރަށެއްގައި ފެނާއި ނަރުދަމާގެ ޚިދުމަތް ފުރިހަމަކޮށްދެއްވާނެ ކަމުގެ ޔަޤީންކަން ދެއްވަމުން، މަގުހެދުމާއި ބަނދަރު ތަރައްޤީކުރުން ފަދަ ޢުމްރާނީ ބޮޑެތި މަޝްރޫޢުތައް މިހާރުވެސް ރާއްޖޭގެ އެކި ކަންކޮޅުތަކުގައި ބާރުމިނުގައި ހިނގަމުންދާކަން ފާހަގަކުރެއްވިއެވެ.
ރައްޔިތުން އެންމެ ބޮޑަށް ކަންބޮޑުވާ މައްސަލަތައް ކަމަށްވާ، ގަވާޢިދާ ޚިލާފަށް އުޅޭ ބިދޭސީންގެ މައްސަލައާއި، މަސްތުވާތަކެތީގެ ވިޔަފާރި އަދި ގޭންގު ކުށްތަކަށް ދާއިމީ ޙައްލެއް ހޯދުމުގެ މަސައްކަތް ހުރިހާ ރަށެއްގައި ކުރިއަށްދާކަމަށް ރައީސް ވިދާޅުވިއެވެ. “މޯލްޑިވްސް 2.0 ގެ އަމާޒުތަކާއެކު ޑިޖިޓަލް ދިވެހިރާއްޖެއެއް ބިނާވެގެންދާއިރު، ރަށްތަކުގައި ތިބެގެން ޚިދުމަތްތައް ހޯދުމާއި އާމުދަނީ ހޯދުމުގެ ފުރުޞަތުތައް ރައްޔިތުންނަށް ފަހިވެގެންދާނެ” ކަމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ ޚިޠާބު ނިންމަވާލެއްވީ، ކުރިއަށް އޮތް ލޯކަލް ކައުންސިލް އިންތިޚާބާއެކު ކައުންސިލްތަކުގެ ދައުރު އިތުރަށް ވަރުގަދަވެ، ސަރުކާރާއި ރައްޔިތުން ގުޅިގެން ރަށްވެހި ތަރައްޤީގެ އައު އުންމީދުތަކެއް ޙަޤީޤަތަކަށް ވެގެންދާނެ ކަމުގެ ޔަޤީންކަމާއެކުގައެވެ.