ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާންގެ އަނބިކަނބަލުންނާއި 10 އަހަރުގެ ދަރިކަނބަލުން މަގުމަތިން ދަނިކޮށް، އެމްޑީޕީގެ އިސް ދެ ބޭފުޅަކު ވެގެން އެ ބޭފުޅުންގެ ވީޑިއޯ ނަގައި މީސްމީޑިއާގައި އާންމުކުރި މައްސަލައެއް ފެންމަތިވެއްޖެއެވެ. ވަޒީރު ވަނީ މިކަމަކީ އެމްޑީޕީގެ އިސް ދެ ވެރިޔަކު ހިންގި ވަރަށް ދަށު ދަރަޖައިގެ ނާތަހުޒީބު އަމަލެއްގެ ގޮތުގައި ސިފަކުރައްވާފައެވެ.
މީސްމީޑިއާގެ އެކްސް މަންސައިގައި ސީސީޓީވީ ފުޓޭޖަކާއެކު ވަޒީރު ކުރެއްވި ޕޯސްޓެއްގައި ވިދާޅުވީ، އެމްޑީޕީގެ އިސް ދެ ބޭފުޅުން ކަމަށްވާ އަކްރަމް ކަމާލުއްދީނާއި އިބްރާހިމް ވަހީދު (އިބްރޭ) އިއްޔެ ހަވީރުގެ ވަގުތެއްގައި އޭނާގެ އަނބިކަނބަލުންނާއި ދަރިކަނބަލުންގެ ވީޑިއޯ ނަގާފައިވާ ކަމަށެވެ. އަދި އެ ވީޑިއޯ ފަހުން ކާކުކަން ނޭނގޭ ފޭކު އެކައުންޓަކުން މީސްމީޑިއާގައި އާންމުކޮށްފައިވާ ކަމަށްވެސް ވަޒީރު ވިދާޅުވިއެވެ.
ވަޒީރު އާންމުކުރެއްވި ސީސީޓީވީ ފުޓޭޖުން ފެންނަ ގޮތުގައި، އަކްރަމް ހިނގާފައި ގޮސް އިބްރާހިމް ވަހީދު ކައިރިއަށް މަޑުކުރެއެވެ. އެ ވަގުތު އިބްރާހިމް ވަހީދު ސައިކަލެއްގެ މަތީގައި އިންނަ އިރު، އެ ދެ ބޭފުޅުން ވާހަކަދެއްކުމަށްފަހު އިބްރާހިމް ވަހީދު އޭނާގެ ފޯނުން ވީޑިއޯއެއް ނަގާ މަންޒަރު ފެނިގެންދެއެވެ.
މިކަމާ ގުޅިގެން ވަޒީރު އިޙްސާން ވިދާޅުވީ “ޑިމޮކްރެސީ އާއި އަންހެނުންގެ ހައްގުތަކާއި، ކުޑަކުދިންގެ ހައްގުތަކަށް ވަކާލާތު ކުރާ މި މީހުން ހިންގަމުން ދަނީ މިފަދަ ނާތަހުޒީބު އަމަލުތައް،” ކަމަށެވެ. އަދި އެމްޑީޕީއަކީ ޒަމާނުއްސުރެ މިފަދަ ދަށު ދަރަޖައިގެ ކަންކަން ކުރަމުން އަންނަ ބައެއްގެ ގޮތުގައި ވަޒީރު ވަނީ ތުހުމަތުކުރައްވާފައެވެ.
އަމިއްލަ ފަރާތްތަކުގެ ޒާތީ މިނިވަންކަމަށް އަރައިގަނެ، ހުއްދަ ނެތި އާއިލާގެ މެންބަރުންގެ ވީޑިއޯ ނަގައި އާންމުކުރުމަކީ ބަލައިގަނެވޭނެ ކަމެއް ނޫން ކަމަށް ބަޔާންކުރައްވަމުން، ވަޒީރު ވަނީ މި މައްސަލައިގައި އެ ބޭފުޅުންނަށް ވަރަށް ބޮޑަށް ފާޑުވިދާޅުވެފައެވެ