މެދުއިރުމަތީގެ ބައެއް ގައުމުތަކުގެ ވައިގެ ސަރަހައްދު ބަންދުކުރުމާ ގުޅިގެން ފްލައިޓްތައް ކެންސަލްވެ، ދަތުރުވެރިންނަށް ދިމާވެފައިވާ ދަތިތަކަށް ހައްލު ހޯދައިދިނުމުގެ ގޮތުން ރޭގެ ނިޔަލަށް 130 ފަސިންޖަރުންނަށް ޒަރޫރީ އެހީތެރިކަން ފޯރުކޮށްދީފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަދު ވިދާޅުވެއްޖެއެވެ.
އެމްއޭސީއެލް އިން ވިދާޅުވި ގޮތުގައި، ފަސިންޖަރުންނަށް ދިމާވެފައިވާ ދަތިތައް ހައްލުކުރުމަށްޓަކައި ވެލާނާ އިންޓަނޭޝަނަލް އެއާޕޯޓުގައި މިހާރު ވަނީ "ޑިސްރަޕްޝަން މެނޭޖްމެންޓް ސެންޓަރެއް" ގާއިމްކޮށް ހިދުމަތް ދޭން ފަށާފައެވެ. އަދި ފަސިންޖަރުންނަށް ލުއިފަސޭހަ އިންތިޒާމުތައް ހަމަޖައްސައިދިނުމަށްޓަކައި އެއާޕޯޓުގެ ޑޮމެސްޓިކް ޓާމިނަލް މިހާރު ބޭނުންކުރަމުންދާ ކަމަށްވެސް އެ ކުންފުނިން މައުލޫމާތު ދެއެވެ.
ފްލައިޓްތަކަށް އައި ބަދަލުތަކުގެ ތަފާސްހިސާބުތަކަށް ބަލާއިރު، އިއްޔެ އެކަނިވެސް ޖުމްލަ 9 ފްލައިޓެއް ކެންސަލްވެ، 1,716 އެއްހާ ފަސިންޖަރުންނަށް ވަނީ ދަތިތަކާ ކުރިމަތިވެފައެވެ. އަދި މިއަދު 19 ފްލައިޓެއް ކެންސަލްވެފައިވާއިރު، ގާތްގަނޑަކަށް 3,530 ފަސިންޖަރުންނަށް މިކަމުގެ އަސަރު ވަނީ ކޮށްފައެވެ.
މި ހާލަތުން އަރައިގަތުމަށްޓަކައި އެމްއޭސީއެލް އިން ދަނީ މިނިސްޓްރީ އޮފް ޓޫރިޒަމް، ވިޒިޓް މޯލްޑިވްސް، އެއާލައިންތައް އަދި ޓުއާ އޮޕަރޭޓަރުންނާ ގުޅިގެން މަސައްކަތް ކުރަމުންނެވެ. އެގޮތުން، ކެންސަލްވެފައިވާ ފްލައިޓުތަކުގެ އެއާލައިންތަކަށް ހާއްސަ ސާވިސް ކައުންޓަރުތައް ޑޮމެސްޓިކް ޓާމިނަލްގައި ގާއިމްކޮށް، އެއާލައިންތަކުގެ މަންދޫބުން ފަސިންޖަރުންނަށް އެހީތެރިކަން ފޯރުކޮށްދެމުންދާ ކަމަށް އެމްއޭސީއެލް އިން ވިދާޅުވިއެވެ.
މެދުއިރުމަތީގެ މަސްރަހަށް އައި ބަދަލުތަކާ ގުޅިގެން ބައިނަލްއަގުވާމީ ބައެއް ދަތުރުތަކަށް ބުރޫ އެރި ނަމަވެސް، ވެލާނާ އިންޓަނޭޝަނަލް އެއާޕޯޓުގެ އާންމު އޮޕަރޭޝަންތަކަށް އެއްވެސް ބަދަލެއް އައިސްފައިނުވާކަން އެމްއޭސީއެލް އިން ވަނީ ފާހަގަކޮށްފައެވެ.