މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެފައިވާ ގޮތުގެ މަތިން، އެމަނިކުފާނު ނޫސްވެރިންނާ ބައްދަލުކުރައްވާ ފުރަތަމަ ޕްރެސް ކޮންފަރެންސް މާދަމާ ހެނދުނު 10:00 ގައި ބޭއްވުމަށް ނިންމައިފިއެވެ. މިކަން ހާމަކުރެއްވީ ރައީސް އޮފީހުގެ ތަރުޖަމާނު ހީނާ ވަލީދެވެ.
ހީނާ ވަލީދު އެކްސްގައި ކުރެއްވި ޕޯސްޓެއްގައި ވިދާޅުވީ، ރިޔާސީ ބަޔާނުގައި ރައީސުލްޖުމްހޫރިއްޔާ ވައުދުވެވަޑައިގެންފައިވާ ފަދައިން، އެމަނިކުފާނު ދެއްވާ ފުރަތަމަ ޕްރެސް ކޮންފަރެންސް މާދަމާ ހެނދުނު އޮންނާނެ ކަމަށެވެ. "މިއަހަރުގެ ރިޔާސީ ބަޔާނުގައި ރައީސުލްޖުމްހޫރިއްޔާ ވިދާޅުވެފައިވާ ގޮތުގެ މަތިން އެމަނިކުފާނު ދެއްވާ ފުރަތަމަ ޕްރެސް ކޮންފަރެންސް މާދަމާ ހެނދުނު 10:00 ގައި އޮންނާނެ. ހަމަ އެއާއެކު ވަޒީރުން ބާއްވާ ޕްރެސް ކޮންފަރެންސްތައް މިއަދު ވަނީ ފެށިފައި،" ހީނާ ވިދާޅުވިއެވެ.
ސަރުކާރުން ކުރަމުންދާ މަސައްކަތްތަކުގެ މަޢުލޫމާތު ދިނުމަށާއި ނޫސްވެރިންނާ އޮންނަ ގުޅުން ބަދަހިކުރުމަށްޓަކައި، މި މާޗް މަހުން ފެށިގެން ކޮންމެ ހަފްތާއެއްގެ ހޯމަ ދުވަހު ނޫސްވެރިންނާ ބައްދަލުކުރެއްވުމަށް ރައީސުލްޖުމްހޫރިއްޔާ ނިންމަވައި އެކަން އިޢުލާން ކުރެއްވީ މިއަހަރުގެ ރިޔާސީ ބަޔާނުގައެވެ. މި ބައްދަލުވުންތައް އާންމު އުސޫލުން ކުރިއަށްދާނީ ކޮންމެ ހޯމަ ދުވަހެއްގެ ހެނދުނު 10:00 އިން 11:00 އަށެވެ.
މީގެ އިތުރުން، ކޮންމެ ހަފްތާއަކު އެއްފަހަރު ވަޒީރަކުވެސް ނޫސްވެރިންނާ ބައްދަލުކުރައްވާނެ ކަމަށް ރައީސް ވަނީ ވިދާޅުވެފައެވެ. އެގޮތުގެ މަތިން ވަޒީރުން ނޫސްވެރިންނާ ބައްދަލުކުރައްވާ ސިލްސިލާ ބައްދަލުވުންތައް މިއަދު މެންދުރުފަހު ވަނީ ފަށާފައެވެ.
ސަރުކާރުން މީޑިއާއާ މަޢުލޫމާތު ހިއްސާކުރުމަށް ކުރަމުންދާ މަސައްކަތްތަކަށް އަލިއަޅުވާލައްވަމުން ރައީސް ރިޔާސީ ބަޔާނުގައި ވިދާޅުވީ، ނިމިދިޔަ އަހަރު ވަޒީރުން 424 ފަހަރު އަދި ވުޒާރާތަކުގެ އިސްވެރިން 493 ފަހަރު މީޑިއާތަކަށް މަޢުލޫމާތު ދެއްވާފައިވާ ކަމަށެވެ. އަދި ސޯޝަލް މީޑިއާ މެދުވެރިކޮށް 40,875 އަށްވުރެ ގިނަ ޕޯސްޓު ޝާއިޢުކޮށްފައިވާކަންވެސް އެމަނިކުފާނު ފާހަގަކުރެއްވިއެވެ.