މެދުއިރުމަތީގައި މިހާރު ހިނގަމުންދާ ހަމަނުޖެހުންތަކާ ގުޅިގެން ރާއްޖެއަށް ތެލާއި ކާބޯތަކެތި ގެނައުމުގައި އެއްވެސް ދަތިކަމެއް ނެތް ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ދެއްވައިފިއެވެ. ނޫސްވެރިންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، މިވަގުތު ތެލާއި ކާބޯތަކެތީގެ ރިޒާވްގެ ހާލަތު ރަނގަޅު ކަމަށާއި ކުރިއަށް އޮތް ތަނުގައިވެސް މި ތަކެތި ލިބުމުގައި ކަންބޮޑުވާންޖެހޭ ފަދަ އެއްވެސް މައްސަލައެއް ނެތް ކަމަށެވެ.
ރައީސް މުއިއްޒު ވިދާޅުވި ގޮތުގައި، ތެލާއި ކާބޯތަކެތީގެ ސަޕްލައިއަށް ބުރޫއަރާފާނެ ފަދަ އެއްވެސް އިޝޫއެއް މިވަގުތު ނެތެވެ.
“ތެލަށް އިރާދަކުރެއްވިއްޔާ އެއްވެސް ވަރެއްގެ ކަންބޮޑުވުމެއް އަޅުގަނޑުމެންނަކަށް ދިމަލެއްނުވޭ. އަޅުގަނޑުމެންނަށް ހަމަ ރަނގަޅަށް އެކަން އޮތީ ހަމަޖެހިފައި. ތެލުގެ އިޝޫއެއް ނެތް. ކާބޯތަކެތީގެ އިޝޫއެއްވެސް ނެތް،” ރައީސުލްޖުމްހޫރިއްޔާ ޑރ. މުޙައްމަދު މުއިއްޒު
މެދުއިރުމަތީގެ ހާލަތާ ގުޅިގެން ރާއްޖެއަށް ކުރާނެ އަސަރުތައް ދެނެގަނެ، އަވަސް ފިޔަވަޅުތައް އެޅުމަށްޓަކައި ރައީސުލްޖުމްހޫރިއްޔާ ވަނީ ވަޒީރުންގެ ޚާއްޞަ ކޮމެޓީއެއް އެކުލަވާލައްވާފައެވެ. މި ކޮމެޓީން ދަނީ ކަމާގުޅުންހުރި ހުރިހާ ދާއިރާތަކުން ކަންކަން ބަލައި، ރާއްޖެއިން ބޭރުގައި އުޅޭ ދިވެހިންނާއި ކިޔަވާ ކުދިންގެ ހާލަތުވެސް ވަރަށް ގާތުން އޮބްޒާވް ކުރަމުންނެވެ.
މީގެ އިތުރުން، މި ހަމަނުޖެހުންތަކުގެ ސަބަބުން ރާއްޖޭގެ އިޤްތިޞާދަށާއި ފަތުރުވެރިކަމަށް ކުރާނެ އަސަރުތައް ކުޑަކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. ރައީސް ވިދާޅުވީ ފަތުރުވެރިކަމަށް މީގެ އަސަރުކުރާނެކަން ގަބޫލުކުރައްވާ ކަމަށާއި، އެކަންކަން ހައްލުކުރުމަށް އެއަރލައިންތަކާއި އެޖެންޓުންނާ ވާހަކަދައްކަމުންދާ ކަމަށެވެ.
ޚާއްޞަގޮތެއްގައި މެދުއިރުމަތިން ޓްރާންސިޓްކޮށް އަންނަ ފްލައިޓްތައް އެހެން ގޮތްގޮތުން ރާއްޖެއަށް އާދެވޭނެ އިންތިޒާމުތައް މިހާރު ދަނީ ހަމަޖައްސަމުންނެވެ. ބައެއް ފްލައިޓްތައް މިހާރުވެސް އެގޮތަށް އޮޕަރޭޓްކުރަން ފަށާފައިވާކަން ރައީސް ފާހަގަކުރެއްވިއެވެ.
ހަމައެއާއެކު، ރާއްޖެއިން ނުފުރި ތިބި ފަތުރުވެރިންނަށްވެސް ބަދަލު ފްލައިޓްތައް (Alternative flights) ހޯދައި، އެމީހުންނަށް ރާއްޖެއިން ފުރޭނެ އިންތިޒާމުތައް ހަމަޖެއްސުމުގެ މަސައްކަތް ސަރުކާރުން ކުރިއަށްގެންދާ ކަމަށް ރައީސުލްޖުމްހޫރިއްޔާ ވިދާޅުވިއެވެ.