މާލޭ ވޯޓަރ އެންޑް ސުވަރޭޖް ކޮމްޕެނީ (އެމް.ޑަބްލިޔު.އެސް.ސީ) ގެ އިޖުތިމާޢީ ޒިންމާގެ ދަށުން، 2026 ވަނަ އަހަރުގެ ބަރަކާތްތެރި ރަމަޟާން މަހަށް ޚާއްޞަކޮށްގެން ކުރިއަށްގެންދާ “އެމް.ޑަބްލިޔު.އެސް.ސީ ރޯދަ ސުފުރާ 1447” ޕްރޮގްރާމް ރަމަޟާން މަހުގެ ފުރަތަމަ ދުވަހުން ފެށިގެން މިއަދު ފަށައިފިއެވެ.
ނިމިދިޔަ އަހަރުގެ ރަމަޟާން މަހު އާންމުންގެ ފަރާތުން މި ޕްރޮގްރާމަށް ލިބުނު ބޮޑު ތަރުޙީބާއި އެއްބާރުލުމަށް ރިޢާޔަތްކޮށް، މިއަހަރުވެސް މި ޙަރަކާތް މުޅި ރަމަޟާން މަހަށް ބަހާލައިގެން ކުރިއަށް ގެންދިއުމަށް އެ ކުންފުނިން ވަނީ ނިންމާފައެވެ. މި ޕްރޮގްރާމްގެ މައިގަނޑު މަޤްޞަދަކީ ރަމަޟާން މަހުގެ މަތިވެރި ރޫޙާ އެއްގޮތަށް، އެކަކު އަނެކަކަށް އެހީތެރިވެ، ދިވެހިންގެ މެދުގައި އޮންނަ އެއްބައެއްވަންތަކަމާއި އޯގާތެރިކަމުގެ ބަދަހި ގުޅުން އިތުރަށް ވަރުގަދަކުރުމެވެ.
މި ޙަރަކާތުގެ ދަށުން ކޮންމެ ދުވަހަކުވެސް ރޯދަވީއްލުމަށް ބޭނުންވާ “އިފްތާރ މީލް ޕެކް” ބެހުމުގެ މަސައްކަތް ކުރިއަށްދާނެއެވެ. މި ތަކެތި ބެހުމުގެ އިންތިޒާމު ހަމަޖައްސާފައިވަނީ މާލޭގައި ހުންނަ ފެން ބިލްޑިންގގެ މައި ދޮރުމަތީގައި މިކަމަށް ޚާއްޞަކޮށް ތައްޔާރުކޮށްފައިވާ ޓެންޓުގައެވެ.
އެމް.ޑަބްލިޔު.އެސް.ސީ އިން ހާމަކުރި ގޮތުގައި، މި ޕްރޮގްރާމުގައި ބައިވެރިވެ ރޯދަވީއްލުމަށް ބޭނުންވާ ތަކެތި ހަދިޔާކުރުމުގެ ފުރުސަތު އެ ކުންފުނީގެ މުވައްޒަފުންނަށާއި އާންމު ރައްޔިތުންނަށް މިހާރު ވަނީ ހުޅުވާލެވިފައެވެ. ގޭގައި ތައްޔާރުކުރާ ކާބޯތަކެތި ހަދިޔާކުރަން ބޭނުންވާ ފަރާތްތަކުން ކޮންމެ ދުވަހަކު ހަވީރު 4:30 އިން 5:45 އާ ދެމެދު ފެން ބިލްޑިންގ ކައިރީގައި ހުރި ޓެންޓަށް ތަކެތި ގެންދިއުމަށް އެ ކުންފުނިން އެދެއެވެ. ސިއްޙީ ރައްކާތެރިކަމަށް އިސްކަންދިނުމުގެ ގޮތުން، ހަދިޔާކުރާ ތަކެތި ހުންނަންވާނީ ފޮއިލް ކޮންޓޭނަރުގައި ރަނގަޅަށް ބަންދުކޮށްފައެވެ.
މިއީ ފެނާއި ނަރުދަމާގެ ޚިދުމަތް ފޯރުކޮށްދިނުމުގެ އިތުރުން، މުޖުތަމަޢަށް ފައިދާހުރި ކަންކަމުގައި އެމް.ޑަބްލިޔު.އެސް.ސީ އިން ބައިވެރިވެ، އިޖުތިމާޢީ ކަންކަމަށް ދޭ ސަމާލުކަން ހާމަކޮށްދޭ މުހިންމު މަސައްކަތެކެވެ.