ފޯޅަވައްސަކީ ތާރީޚީ ގޮތުން ރާއްޖެއާ ގުޅިފައިވާ ތަނެއް ކަމަށާއި، އެތަނުގެ ސިޔާދަތީ ބާރު ހޯދުމަށް އިނގިރޭސިވިލާތާއެކު މަޝްވަރާތައް ކުރަމުންދާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހާމަކުރައްވައިފިއެވެ. ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ރައީސް ވިދާޅުވީ، ކުރީގެ ސަރުކާރުން މި މައްސަލައިގައި މޮރިޝަސްއަށް ފޮނުވި ސިޓީ އަނބުރާ ގެންދިއުމަށް ނިންމަވައި، ގެއްލިފައިވާ ކަނޑުގެ ސަރަޙައްދު ހޯދުމަށް ޚާއްޞަ ކޮމިޓީއެއް މިހާރު އެކުލަވާލާފައިވާ ކަމަށެވެ.
ފޯޅަވައްސަކީ ރާއްޖޭގެ ތަނެއްކަން ސާބިތުކޮށްދޭ ތާރީޚީ ގިނަ ހެކިތަކެއް ހުރިކަން ރައީސް ފާހަގަކުރެއްވިއެވެ. އޭގެ ތެރޭގައި 16 ވަނަ ޤަރުނުގެ 9 ވަނަ ޙަސަން ރަސްގެފާނުގެ ސިޓީއަކާއި ޗާޓެއްގެ އިތުރުން، އެ ރަށްތަކުން ފެނިފައިވާ ދިވެހިބަހުން ލިޔެފައިވާ މަހާނަގާތަކާއި ދިވެހި ފުލޯކު ވާހަކަތައް ހިމެނެއެވެ. މިއީ މޮރިޝަސްގައި މީހުން އާބާދުވުމުގެ މާ ކުރީގެ ތާރީޚީ ހެކިތަކެއް ކަމަށް ރައީސް ވިދާޅުވިއެވެ.
ޖުގުރާފީ ގޮތުން ބަލާއިރުވެސް ފޯޅަވައްސާ އެންމެ ކައިރީގައި އޮތީ ރާއްޖެކަން ރައީސް ފާހަގަކުރެއްވިއެވެ. މޮރިޝަސްއާ 1,300 މޭލު ދުރުގައި ފޯޅަވަހި އޮތްއިރު، ރާއްޖޭގެ މާލެއާ އެތަނާ ދެމެދު ހުރީ އެންމެ 310 މޭލެވެ. މީގެ އިތުރުން، ފޯޅަވަހީގެ އަސްލު ވަޒަންވެރިންގެ ޑީ.އެން.އޭ އިންވެސް އެމީހުންގެ ކިބައިގައި ދިވެހި ނަސްލުގެ ހިއްސާ އޮތްކަން ސައިންޓިފިކް ހެކިތަކުން ކަށަވަރުވާކަމަށް އެމަނިކުފާނު ވިދާޅުވިއެވެ.
މޮރިޝަސްއިން ރާއްޖެއާ ސިޔާސީ ގުޅުން ކަނޑާލަން ނިންމި ނިންމުމާ ގުޅޭގޮތުން ރައީސް ވިދާޅުވީ، އެއީ މަޝްވަރާއެއް ނެތި ނިންމި، ތާކުންތާކުނުޖެހޭ އަދި "އިމެޗުއަރ" ނިންމުމެއް ކަމަށެވެ. "ގައުމަކާ ގުޅުން ކަނޑާލިޔަސް މޮރިޝަސްއަށް ހައްގު ނޫން ތަނެއް، މޮރިޝަސްއަކަށް ހައްގެއް ނުވާނެ. އެއްވެސް ގައުމަކާ ޗާގޯސް ހަވާލުކުރާ ކަމަށް ވަންޏާ އެތަން ހަވާލުކުރަންޖެހޭނީ އެތަނުގެ ހައްގުވެރި ފަރާތް، ރާއްޖެއާ،" ރައީސް މުޢިއްޒު ވިދާޅުވިއެވެ.
ރައީސް އިތުރަށް ވިދާޅުވީ، މޮރިޝަސްއިން ގުޅުން ކަނޑާލިޔަސް ރާއްޖޭގެ ނިންމުން ބަދަލު ނުވާނެ ކަމަށާއި، ސަރުކާރުން ކުރިއަށްދާނީ "މޯލްޑިވްސް ފަސްޓް" ސިޔާސަތުގެ ދަށުން ބައިނަލްއަޤްވާމީ މިންގަނޑުތަކާ އެއްގޮތަށް ކަމަށެވެ. ރާއްޖެ އާއި މޮރިޝަސްއާ ދެމެދު ސިޔާސީ ގުޅުން ގާއިމްކުރީ 15 ޖެނުއަރީ 1981 ގައެވެ. މިހާރު ރާއްޖޭގެ ފަރާތުން އެ ގައުމަށް ކަނޑައަޅާފައި ހުންނަ ސަފީރަކީ ސްރީ ލަންކާގައި ހުންނަވާ ދިވެހި ސަފީރު މަސްއޫދު އިމާދެވެ.