ރ. އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރެއް ތަރައްޤީކުރުމަށާއި، ރ. ހުޅުދުއްފާރުގައި އެކޮމަޑޭޝަން ފެސިލިޓީއެއް ތަރައްޤީކުރުމުގެ މަޝްރޫޢު ދެ ކުންފުންޏަކާ މިއަދު ހަވާލުކޮށްފިއެވެ. މި މަޝްރޫޢުތައް ހަވާލުކުރުމަށް ބޭއްވި ރަސްމިއްޔާތުގައި މަތީ ތަޢުލީމާ ބެހޭ ވަޒީރު ޑރ. އަލީ ޙައިދަރު އަޙްމަދު ބައިވެރިވެވަޑައިގެންނެވިއެވެ.
އިންނަމާދޫގައި ޓެކްނިކަލް ވޮކޭޝަނަލް އެޑިއުކޭޝަން ސެންޓަރު ތަރައްޤީކުރުމަށް ހަވާލުކޮށްފައިވަނީ ސެންޓަރލައިން ކުންފުންޏާއެވެ. އަދި ހުޅުދުއްފާރުގައި އެކޮމަޑޭޝަން ފެސިލިޓީ ތަރައްޤީކުރުމަށް ހަވާލުކޮށްފައިވަނީ އެމްޓީސީސީ އާއެވެ. މި މަޝްރޫޢުތަކަކީ ރަށްރަށުގައި ތިބެގެން ދަރިވަރުންނަށް މަތީ ތަޢުލީމާއި ތަމްރީން ހޯދޭނެ މަގުފަހިކުރުމުގެ ގޮތުން ސަރުކާރުން ކުރިއަށްގެންދާ މުހިއްމު މަސައްކަތްތަކެކެވެ.
އިންނަމާދޫގައި ޤާއިމްކުރާ ޓިވެޓް ސެންޓަރު ޚާއްސަ ކުރެވިފައިވަނީ ބޯޓް-ބިލްޑިން ނުވަތަ އޮޑިދޯނިފަހަރު ބަނުމުގެ ދާއިރާއިން މީހުން ތަމްރީންކުރުމަށެވެ. މި މަރުކަޒު ތަރައްޤީކުރުމަށް ހަމަޖެހިފައިވަނީ ޕްރީ-ފެބް އުސޫލުން، އިންސްޓިޓިއުޓަކަށް ބޭނުންވާނެ އެންމެހާ މުހިއްމު ވަޞީލަތްތައް ހިމަނައިގެންނެވެ.
ހުޅުދުއްފާރުގައި ތަރައްޤީކުރާ އެކޮމަޑޭޝަން ފެސިލިޓީއާ ގުޅޭގޮތުން ވަޒީރު ޑރ. އަލީ ޙައިދަރު ވިދާޅުވީ، އެތަނުގައި ތަފާތު މޮޑެލްތަކުގެ އެކޮމަޑޭޝަން ހިމެނޭނެ ކަމަށެވެ. މީގެ ތެރޭގައި ދަރިވަރުން އާއިލާތަކާއެކު ތިބެވޭ ގޮތަށް 2 ކޮޓަރިއާއި 3 ކޮޓަރީގެ އެޕާޓްމަންޓްތަކުގެ އިތުރުން، ވަކިން އެކަނި ދިރިއުޅެވޭނެ ސްޓޫޑިއޯ އެޕާޓްމަންޓްތައް ހިމެނެއެވެ. “މިއިން ކޮންމެ އެޕާޓްމަންޓެއްގައިވެސް ވަކިން ކެއްކުމާއި ލޯންޑްރީ ފަދަ މުހިއްމު އަސާސީ ޚިދުމަތްތައް ޤާއިމްކުރެވޭނެ،” ވަޒީރު ވިދާޅުވިއެވެ.
ވަޒީރު އިތުރަށް ފާހަގަކުރެއްވި ގޮތުގައި، މި ދެ ރަށުގެ މަޝްރޫޢުތަކާއި މިހާރުވެސް ރ. އަލިފުއްޓާއި ދުވާފަރުގައި ކުރިއަށްދާ މަޝްރޫޢުތަކާއެކު، ރ. އަތޮޅު ވެގެންދާނީ މަތީ ތަޢުލީމާއި ތަމްރީނު ދިނުމުގައި ފާހަގަކޮށްލެވޭ އަތޮޅަކަށެވެ. މި މަޝްރޫޢުތަކުގެ މައިގަނޑު ބޭނުމަކީ ރަށުގައި ތިބެގެން ފެންވަރު ރަނގަޅު ތަޢުލީމު ހޯދުމުގެ ފުރުޞަތު ރައްޔިތުންނާ ވީހާވެސް ގާތުން ފޯރުކޮށްދިނުމެވެ.
ސަރުކާރުގެ އަމާޒަކީ ރާއްޖޭގެ ކޮންމެ ކުއްޖަކަށްވެސް އެކުއްޖަކު ހުރި ރަށަކުން ނުވަތަ ކައިރި ރަށަކުން މަތީ ތަޢުލީމުގެ ފުރުޞަތު ހޯދައިދިނުމެވެ. މިހާރުވެސް ރ. އަލިފުށީގައި ޓިވެޓް ސެންޓަރެއް ތަރައްޤީކޮށްފައިވާއިރު، ދުވާފަރުގައި ދަނާލެއް އެޅުމުގެ މަސައްކަތް ބާރުމިނުގައި ކުރިއަށްދާކަން ފާހަގަކުރެވެއެވެ.