ފިރިމީހާ ނުވަތަ އަނބިމީހާގެ ނަމުގައި ބޯހިޔާވަހިކަމެއް އޮތް ނަމަވެސް ގޯއްޗަށް ކުރިމަތިލެވޭ ގޮތަށް އައު އުސޫލެއް އެކުލަވާލައި ގެޒެޓްކޮށްފިއެވެ. މި އައު އުސޫލުގެ ދަށުން ގޯއްޗަށް އެދި ހުށަހެޅުމުގެ ފުރުސަތު މި މަހުގެ 8 ވަނަ ދުވަހު ހުޅުވާލުމަށް ވަނީ ނިންމާފައެވެ.
ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން މިހާތަނަށް ޖުމްލަ 18,399 އެޕްލިކޭޝަން ހުށަހަޅާފައިވާއިރު، މީގެ ތެރޭގައި އެންމެ ގިނައީ ފްލެޓަށް އެދި ހުށަހަޅާފައިވާ ފޯމުތަކެވެ. ހައުސިންގް މިނިސްޓަރު ޑރ. އަބްދުﷲ މުއްތަލިބު ފާހަގަކުރެއްވި ގޮތުގައި، ފްލެޓާ އަޅާބަލާއިރު ގޯއްޗަށް އޮތް ޑިމާންޑު ވަނީ ދަށްވެފައެވެ. އެހެންކަމުން ގޯއްޗަށް އޮތް ޑިމާންޑު އިތުރުކުރުމަށްޓަކައި "ގޯތި-ގެދޮރު" ގެ ނަމުގައި އައު ޕްރޮގްރާމެއް ކުރިއަށް ގެންދަން މިނިސްޓްރީން ވަނީ ނިންމާފައެވެ.
މި ސްކީމުގެ ދަށުން މާލޭގެ ރަށްވެހިންނަށާއި މާލޭގައި ދިރިއުޅޭ އެހެން ރަށްރަށުގެ މީހުންނަށް ގޯއްޗާއި ފްލެޓް ދޫކުރުމަށް ވަނީ ހަމަޖެހިފައެވެ. އެގޮތުން ގޯތި ދޫކުރާނީ ގްރޭޓަރ މާލޭ ސަރަހައްދުންނާއި ރަސްމާލެއިންނެވެ. މީގެ އިތުރުން މާލެއާއި ވިލިމާލެ ހިމެނޭހެން ޖުމްލަ 7,900 ފްލެޓް ދޫކުރުމަށް ވެސް ވަނީ ކަނޑައަޅާފައެވެ.
މި އައު އުސޫލާއެކު، މީގެ ކުރިން ބޯހިޔާވަހިކަމުގެ ސްކީމްތަކަށް ކުރިމަތިލުމުގައި ހުރި ބައެއް ހުރަސްތައް ނެތިގޮސް، ގިނަ އާއިލާތަކަކަށް ގޯއްޗަށް ކުރިމަތިލުމުގެ ފުރުސަތު ފަހިވެގެންދާނެ ކަމަށް ބެލެވެއެވެ. ސަރުކާރުގެ އަމާޒަކީ ބޯހިޔާވަހިކަމުގެ ދަތިކަން ހުރި ހުރިހާ ފަރާތްތަކަށް އިންސާފުވެރިކަމާއެކު ފުރުސަތުތައް ފޯރުކޮށްދިނުމެވެ.