މެލޭޝިޔާގައި ހުންނަ ދިވެހިރާއްޖޭގެ ހައިކޮމިޝަނުން އިންތިޒާމްކޮށްގެން އިޤްރައުލް ޤުރްއާން 1447 މުބާރާތް 28 ފެބްރުއަރީ 2026 ވީ ހޮނިހިރު ދުވަހު ހެދުނު ހައިކޮމިޝަނުގައި ވަނީ ބޭއްވިފައެވެ.
އިޤްރައުލް ޤުރްއާން މުބާރާތަކީ އެހެން އަހަރުތަކެކޭވެސް އެއްގޮތަށް މެލޭޝިޔާގައި ހުންނަ ދިވެހި ހައިކޮމިޝަނުން އިންތިޒާމްކޮށްގެން ކޮންމެ ރަމަޟާން މަހަކު މެލޭޝިޔާގައި ދިރިއުޅޭ ދިވެހި ދަރިވަރުންނަށް އަމާޒުކޮށްގެން ބާއްވަމުން އަންނަ މުބާރާތެކެވެ. މި އަހަރުގެ މުބާރާތުގައި އެކި އުމުރު ފުރާއިން 5 ކެޓަގަރީއަކުން ޖުމްލަ 42 ކުދީން ބައިވެރިވެފައިވެއެވެ.
މި މުބާރާތުގެ މަޤްސަދަކީ، މޭލޭޝިޔާގައި ދިރިއުޅޭ ދަރިވަރުންގެ ހިތްތަކުގައި ކީރިތި ޤުރުއާނާ މެދު ލޯބި އުފައްދާ، ތަޖުވީދުމަގުން ޤުރުއާން ކިޔެވުމަށް ބާރުއަޅައި، ދިރިއުޅުމުގައި ޤުރުއާނުގެ މުހިންމުކަން އަންގައިދީ ހަނދާން ކޮށްދިނުމެވެ.
މުބާރާތުގެ ބައިވެރިންނާއި އަދި ބެލެނިވެރިންނާ މުހާތަބްކުރައްވާ ވާހަކަފުޅުދައްކަވަމުން މެލޭޝިޔާއަށް ކަނޑައަޅާފައި ހުންނަވާ ދިވެހިރާއްޖޭގެ ސަފީރު، ޑރ.މަރިޔަމް ޝަބީނާ އަހުމަދު ދެއްކެވި ވާހަކަ ފުޅުގައި މުބާރާތުން ވަނަވަނައަށް ދިޔަ ދަރިވަރުންނަށް މަރްހަބާ ދަންނަވައި، މުބާރާތުގައި ބައިވެރިވި ހުރިހާ ދަރިވަރުންނަށް އައްސަރިބަހާއި ސާބަސްދެއްވިއެވެ. އަދި ކާމިޔާބީއަކީ ހަމައެކަނި ލިބޭ މެޑެއްޔެއް ނޫންކަމާއި އަސްލު ކާމިޔާބީ އަކީ ކީރިތި ޤުރުއާނާ ގާތްވުމަށް ދަރިވަރުން ކުރެއްވި މުހިންމު މަސައަކަތް ކަމުގައި ސަފީރު ފާހަގަކުރެއްވި އެވެ.
އިޤްރައުލް ޤުރުއާން 1447 މުބާރާތް
މީގެ އިތުރުން، ސަފީރު ވިދާޅުވިގޮތުގައި ދިވެހިރާއްޖެއާ ދުރުގައި، ބޭރު ގައުމެއްގައި ދިރިއުޅޭއިރު، ދިވެހީންގެ ދީނީ ސަގާފަތް ހިފެހެއްޓުމަކީ ވަރަށް މުހިއްމު ކަމެއްކަމާއި، ޚާއްސަކޮށް ކީރިތި ޤުރުއާނަކީ އަޅުގަނޑުމެންގެ ދިރިއުޅުމުގެ ކޮންމެ ފިޔަވަޅެއްގައިވެސް މަގުދައްކައިދޭ ނޫރު ކަމުގައި ވިދާޅުވިއެވެ.
އަދި އަޅުގަނޑުމެންގެ އީމާންތެރިކަން ވަރުގަދަކޮށްދީ، ރަނގަޅު މަގުގައި ސާބިތުކަމާއެކު ތިބުމަށްޓަކައި ކީރިތި ޤުރުއާނުގައި ހިފެހެއްޓުމަކީ ކޮންމެހެން ކުރަންޖެހޭނެ ކަމެއް ކަމާއި، ޚާއްޞަކޮށް ބަރަކާތްތެރި ރަމަޟާން މަހަކީ ޤުރުއާނުގެ މައްސަރުކަން ހަނދާންކުރަންޖެހޭކަމުގައި އާއި މި ބަރަކާތްތެރި މައްސަރުގައި ޤުރުއާން ކިޔެވުމާއި، އޭގެ މާނަ ދެނެގަތުމަށް އިތުރު ވަގުތު ހުސްކުރުމަކީ އަޅުގަނޑުމެންގެ ރޫޙާނީ ދިރުން އިތުރުކޮށްދޭނެ ކަމެއް ކަމުގައި ސަފީރު ވިދާޅުވިއެވެ. ސަފީރުގެ ވާހަކަ ފުޅުގައި ފާހަގަކުރެއްވި މުހިންމު އެއްކަމަކީ، ހައިކޮމިޝަނުން އިންތިޒާމްކޮށްގެ ބާއްވަން ފެށުނު މި ޤުރުއާން މުބާރާތް ފެށިފަހުން އަހަރަކަށްފަހު އަހަރެއް މި މުބާރާތުގައި ބައިވެރިވާ ކުދީންގެ އަދަދު ގިނަވަމުންދާކަން ކަމެވެ. އަދި އެކަމަށްޓަކައި ބެލެނިވެރީންނަށް ސަފީރު ޝުކުރު ދަންނަވައި ދަރިންނަށް ދީނީ ތަރުބިއްޔަތު ދިނުމަކީ މުޅި މުޖުތަމައަށް އޭގެ ފައިދާ ކުރާނެ ކަމެއް ކަމުގައި ވިދާޅުވިއެވެ.
ސަފީރު ވިދާޅުވިގޮތުގައި، މެލޭޝިޔާގައި ދިރިއުޅޭ ދަރިވަރުންނަށް ޤުރުއާން ކިޔަވައިދިނުމަކީ ހައިކޮމިޝަނުގެ ފަރާތުން ވަރަށް މުހިންމުކަމެއް ދޭކަމެއް ކަމާއި، މިގޮތުން، ކީރިތި ޤުރުއާނާ ބެހޭ ޤައުމީ މަރުކަޒުން އޮންލައިކޮށް ކިޔަވައިދެމުން
އައި ޤުރުއާން ކްލާހަށް މިދިޔަ އަހަރުގެ އޮކްޓޯބަރު މަހުން ފެށިގެން ބަދަލުގެނެވި، މިހާރު އެކްލާސްތައް ހައިކޮމިޝަނުގެ ދަށުން ޤާއިމް ކުރެވިފައިވާ މޯލްޑިވްސް ސެންޓަރުން ސީދާ ބަލަހައްޓާގޮތަށް ހަމަޖެހިފައިވާކަމުގައި ފާހަގަކުރެއްވިއެވެ.
މިފަހަރުގެ މުބާރާތުގެ އިންތިޒާމްތައް ހަމަޖެހިފައިވަނީ އެހެން އަހަރުތަކުގައި ބާއްވަމުން އަންނަ ޤުރުއާން މުބަރާތާ ތަފާތުކޮށް، ޒަމާނަށް އައިސްފައިވާ ހެޔޮ ބަދަލާއެކު ޓެކްނޮލޮޖީގެ އެހީ ބޭނުންކޮށްގެންނެވެ. މީގެއިތުރުން، ޚާއްސަ ކެޓަގަރީގެ" ނަމުގައި ޚާއްސަ އެހީއަށް ބޭނުންވާ ދަރިވަރުންނަށް މުބާރާތުގައި ބައިވެރިވުމަށް ފުރުސަތު ހުޅުވާލެވުނެވެ. އަދި ކުރިއަށް އޮންނަ މުބާރާތްތަކުގައިވެސް މި ކެޓަގަރީ ހިމެނިގެންދާނެއެވެ.
މި މުބާރާތް އިންސާފްކޮށްދެއްވީ މެލޭޝިޔާގައި ދިރިއުޅޭ ކޮމިއުނިޓީގެ ފަރާތުން 2 ބޭފުޅެކެވެ. މީގެ އިތުރުން، މެލެޝިޔާގެ އިންޓަރނޭޝަމަލް އިސްލާމިކް ޔުނިވާރސިޓީ (އައި.އައި.ޔޫ.އެމް) ގެ ފަރާތުން ޚާއްސަ އޮބްޒާވަރެއް ވަނީ މިމުބާރާތުގައި ބައިވެރިވެފައެވެ.
މި މުބާރާތުގެ ވަނަތައް ހާސިލްކުރި ދަރިވަރުންނަށް ޓްރޮފީ، މެޑަލް އަދި ސެޓްފިކެޓް ދެވުނެވެ. ހުރިހާ ކެޓަގަރީއަކުން އެއް ވަނަ ހާސިލް ކުރައްވާފައިވާ ދަރިވަރުންނަށް އިނާމު ދެއްވީ ހައިކޮމިޝަނަރ، ޑރ. މަރިޔަމް ޝަބީނާ އަހުމަދެވެ.