ރާއްޖެއަށް މަސްތުވާތަކެތި އެތެރެކުރާ މީހުން ނުވަތަ އޭގެ ވިޔަފާރިކުރުމުގެ ކުށް ސާބިތުވާ މީހުންނަށް މަރުގެ އަދަބު ދެވޭ ގޮތަށް މަސްތުވާތަކެއްޗާ ބެހޭ ގާނޫނަށް ގެނައި އިސްލާހަށް އިއްޔެއިން ފެށިގެން އަމަލުކުރަން ފަށައިފިއެވެ. މި އިސްލާހަކީ މަސްތުވާތަކެތީގެ ވަބާއިން ގައުމު ސަލާމަތްކުރުމަށްޓަކައި އަދަބުތައް ހަރުކަށި ކުރުމަށް ސަރުކާރުން ހުށަހެޅި މުހިންމު ބަދަލެކެވެ.
މި ބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ ލ. ގަމު ދާއިރާގެ ޕީއެންސީ މެންބަރު ޔޫސުފް ރަޝީދު އެވެ. މަޖިލީހުން މި އިސްލާހު ފާސްކުރީ މިދިޔަ ޑިސެމްބަރު މަހުގެ ތިން ވަނަ ދުވަހުއެވެ. އަދި ރައީސުލްޖުމްހޫރިއްޔާ ޑރ. މުހައްމަދު މުއިއްޒު މި އިސްލާހު ތަސްދީގުކުރައްވައި، ސަރުކާރުގެ ގެޒެޓުގައި ޝާއިއުކުރެއްވީ އެ މަހުގެ ހަވަނަ ދުވަހުއެވެ. ގާނޫނުގައިވާ ގޮތުގެ މަތިން، މިއަށް އަމަލުކުރަން މި ފެށީ ގެޒެޓުގައި ޝާއިއުކުރި ތާރީހުން ފެށިގެން ތިން މަސްދުވަސް ހަމަވުމުންނެވެ.
މަރުގެ އަދަބު ދެވޭނެ ހާލަތްތައް
މަސްތުވާތަކެއްޗާ ބެހޭ ގާނޫނަށް ގެނައި އެންމެ ބޮޑު އިސްލާހަކީ، ވަކި ޝަރުތުތަކެއް ފުރިހަމަވާ ނަމަ، މަސްތުވާތަކެތި އެތެރެކުރާ މީހުންނަށް މަރުގެ އަދަބު ކަނޑައެޅުމެވެ. އެގޮތުން މަރުގެ އަދަބު ދެވޭނެ ހާލަތްތަކަކީ: 350 ގްރާމަށްވުރެ ގިނަ ކެނެބިސް އެތެރެކުރުން، 250 ގްރާމަށްވުރެ ގިނަ ޑައިމޯފިން އެތެރެކުރުން، ނުވަތަ ގާނޫނުގެ ޖަދުވަލު 1 ގައިވާ އެހެން މަސްތުވާއެއްޗެއްގެ 100 ގްރާމަށްވުރެ އިތުރު އަދަދެއް އެމީހަކު ރާއްޖެއަށް އެތެރެވިއިރު އަތުގައި ހުރުމެވެ.
މަރުގެ އަދަބު ކަނޑައެޅުމުގައި ހަރުދަނާ އުސޫލުތަކެއް ވަނީ ކަނޑައަޅާފައެވެ. އެގޮތުން މަރުގެ އަދަބު ކަނޑައަޅައިފި ނަމަ، އެ ހުކުމުގެ ހުރިހާ ގާނޫނީ ނުކުތާތަކެއް މަތީ މަރުހަލާގެ ކޯޓަކުން ބަލަންޖެހެއެވެ. އަދި އަދަބު ތަންފީޒުކުރެވޭނީ ދިވެހިރާއްޖޭގެ ސުޕްރީމް ކޯޓުގެ މައްސަލަ ބަލާ ފަނޑިޔާރުންގެ ބެންޗުގެ އިއްތިފާގުން އެގޮތަށް ހުކުމް ކުރުމުންނެވެ. މީގެ އިތުރުން މަރުގެ އަދަބު ނުވަތަ އުމުރަށް ޖަލަށްލުމުގެ އަދަބު ކަނޑައަޅާފައިވާ ކުށްތަކަކީ އެއްވެސް ގޮތަކަށް އަދަބު މައާފުކޮށްދެވޭނެ ނުވަތަ ލުއިކޮށްދެވޭނެ ކުށްތަކެއް ނޫން ކަމަށްވެސް ވަނީ ކަނޑައަޅާފައެވެ.
މަރުގެ އަދަބުގެ އިތުރުން، މަސްތުވާތަކެތި އެތެރެކުރުމާއި ބޭރުކުރުމުގައި ބައިވެރިވާ މީހުންނަށް ބޮޑެތި ޖޫރިމަނާތަކެއްވެސް ވަނީ ކަނޑައަޅާފައެވެ. އެގޮތުން މިފަދަ ކަމެއްގައި އެހީތެރިވެ ނުވަތަ ބައިވެރިވެއްޖެ ނަމަ 20 އަހަރުގެ ޖަލު ހުކުމަކާއެކު، 75,000 ރުފިޔާއިން ފެށިގެން 7.5 މިލިއަން ރުފިޔާއާ ދެމެދުގެ އަދަދަކުން ޖޫރިމަނާ ކުރެވޭނެއެވެ.