ނިއުރޯ ސާޖަރީ ނުވަތަ ނާރުގެ އޮޕަރޭޝަންތަކުގައި ބޭނުންކުރާ އެންމެ ޒަމާނީ ވަސީލަތެއް ކަމަށްވާ “އިންޓްރާ އޮޕަރޭޓިވް ނިއުރޯމޮނިޓަރިން” އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި ތަޢާރަފްކޮށްފިއެވެ. މިއީ ސާޖަރީ ކުރަމުންދާ ވަގުތު ބަލިމީހާގެ ނާރުތަކުގެ މަސައްކަތް ހުރި ގޮތް ވަގުތުން ބަލައިލެވޭނެ މުހިންމު ވަސީލަތެކެވެ.
މި ވަސީލަތް ބޭނުންކުރަން ފެށުމުން އޮޕަރޭޝަން ކުރަމުންދާއިރު ނާރުތަކަށް ލިބިދާނެ ގެއްލުންތައް ވަގުތުން ދެނެގަނެވި، އެފަދަ ނުރައްކާތަކުން ބަލިމީހާ ސަލާމަތްކުރުމަށް ބޮޑު އެހީތެރިކަމެއް ލިބިގެންދާނެއެވެ. މިއީ ރާއްޖޭގެ ޞިއްޙީ ދާއިރާގައި ނާރުގެ ބަލިތަކަށް ދެވޭ ފަރުވާގެ ފެންވަރު މަތިކުރުމަށް ކުރަމުންދާ މަސައްކަތުގެ ތެރެއިން ލިބުނު ބޮޑު ކުރިއެރުމެއްގެ ގޮތުގައި އައިޖީއެމްއެޗުން ފާހަގަކުރެއެވެ.
އައިޖީއެމްއެޗްގެ ސީނިއާ ކޮންސަލްޓަންޓް ސަބް ސްޕެޝަލިސްޓް އިން ނިއުރޯ ސާޖަރީ، ޑރ. އަލީ ނިޔާފް ވިދާޅުވީ އިންޓްރާ އޮޕަރޭޓިވް ނިއުރޯ މޮނިޓަރިންއަކީ ބަލިމީހާގެ ރައްކާތެރިކަމަށްޓަކައި ކޮންމެހެން ހުރުން މުހިންމު ވަސީލަތެއް ކަމަށެވެ. “އޮޕަރޭޝަން ކުރަމުންދާ ގަޑީގައި ނާރުތައް މަސައްކަތްކުރާ ގޮތް މިމެޝިނުން ދައްކާނެ. އެގޮތުން އޮޕަރޭޝަން ކުރަމުންދާއިރު ނާރަކާ ގާތްވެ ނާރަކަށް ގެއްލުން ލިބޭފަދަ ބަދަލެއް އަންނަނަމަ އެމެޝިނުން ޕަސެންޓޭޖާއެކު ދައްކާނެ” ޑރ. ނިޔާފް ވިދާޅުވިއެވެ.
މީގެ އިތުރުން، އާންމުކޮށް ކުރާ ކަނދުރާގެ ޑިސްކް ސާޖަރީއާއި މައިބަދައިގެ އޮޕަރޭޝަންތަކުގައިވެސް މި ވަސީލަތުގެ މުހިންމުކަން ޑރ. ނިޔާފް ފާހަގަކުރެއްވިއެވެ. އެގޮތުން މައިބަދައިގެ އޮޕަރޭޝަންތަކުގައި އިސްކުރު ޖަހާއިރު، އެ އިސްކުރުގެ ސަބަބުން އެހެން ނާރަކަށް ފިތޭނަމަ އެކަންވެސް މި މެޝިނުގެ އެހީގައި ދެނެގަނެވޭނެ ކަމަށް އޭނާ ވިދާޅުވިއެވެ.
އައިޖީއެމްއެޗުން ވިދާޅުވީ މިއީ ސާޖަރީތަކުގައި ނާރުތަކަށް ލިބިދާނެ ގެއްލުންތައް ކުޑަކޮށް، ބަލިމީހާގެ ރައްކާތެރިކަން އިތުރަށް ކަށަވަރުކުރުމަށް އެޅުނު މުހިންމު ފިޔަވަޅެއް ކަމަށެވެ. މިއީ ހޮސްޕިޓަލުގެ ޚިދުމަތްތައް ޒަމާނީކޮށް، ފެންވަރު ރަނގަޅު ކުރުމަށް ކުރަމުންދާ މަސައްކަތުގެ ބައެކެވެ.
ފާއިތުވި އަހަރުތަކުގައި އައިޖީއެމްއެޗުން ވަނީ ޚިދުމަތްތައް ފުޅާކުރުމުގެ ގޮތުން ބަރުދަން ލުއިކުރުމަށް ކުރާ ބެރިއަޓްރިކް ސަރޖަރީއާއި، ލޮލުގެ ފަރުވާއަށް ޚާއްސަ ވިޓްރިއޯރެޓިނަލް ސާޖަރީގެ ޚިދުމަތްވެސް ތަޢާރަފްކޮށްފައެވެ.