ދަރިފުޅުގެ އުމުރުން 2 އަހަރު ވަންދެން ޑިއުޓީ ވަގުތުން، ވަގުތު ދޭން ޤާނޫނަށް ހުށަހެޅި އިސްލާހު މަޖިލީހުން ފާސްކޮށްފި
ދަރިފުޅުގެ އުމުރުން 2 އަހަރު ވަންދެން ޑިއުޓީ ވަގުތުން އެ ދަރިފުޅަށް ވަގުތު ދޭން ވަޒީފާއާ ބެހޭ ޤާނޫނަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފިއެވެ. މި ބިލު މަޖިލީހުން ފާސްކޮށްފައިވަނީ ޤައުމީ ތަރައްޤީއާއި ތަރިކައިގެ ކޮމިޓީން ދިރާސާކޮށް ނިންމި ގޮތަށް، ޖަލްސާއަށް ހާޒިރުވެވަޑައިގެންނެވި 62 މެންބަރުންގެ އިއްތިފާގުންނެވެ.
ސަރުކާރުގެ ފަރާތުން މަޑަވެލި ދާއިރާގެ މެންބަރު މުޙައްމަދު ޝަމީޒް ހުށަހެޅުއްވި މި އިސްލާހުގައިވާ ގޮތުން، ވިހެއުމާ ގުޅިގެން ލިބޭ ޗުއްޓީއަށްފަހު މުވައްޒަފު އެނބުރި ވަޒީފާއަށް ނުކުންނަ ދުވަހުން ފެށިގެން ދަރިފުޅުގެ އުމުރުން 2 އަހަރު ވަންދެން، ދަރިފުޅުގެ ކަންކަން ބެލެހެއްޓުމަށް ޚާއްޞަ ވަގުތު ދޭންޖެހޭނެއެވެ. މިހާރު ޤާނޫނުގައި އޮންނަ ގޮތުން މި ވަގުތު ދޭން ޖެހެނީ ދަރިފުޅަށް 1 އަހަރު ވަންދެނެވެ.
މި އިސްލާހުގެ ދަށުން، މުސާރައިން އެއްވެސް މިންވަރެއް ނުކެނޑޭ ގޮތަށް، ކޮންމެ ދުވަހަކުވެސް ދަރިފުޅު ގާތަށް ދިއުމަށް 30 މިނެޓުގެ ދެ ހުސްވަގުތުކޮޅު މުވައްޒަފަށް ދޭންޖެހޭނެއެވެ. މިއީ ކޮންމެ މުވައްޒަފަކަށްވެސް ޑިއުޓީ ވަގުތުގެ ތެރެއިން މިހާރު ލިބޭ 1 ގަޑިއިރުގެ ހުސްވަގުތުގެ އިތުރުން ދޭންޖެހޭ ވަގުތެކެވެ. މި ވަގުތު 45 މިނެޓަށް އިތުރުކުރުމަށް ތޮއްޑޫ ދާއިރާގެ މެންބަރު ހުސައިން ސަމީރު ހުށަހެޅުއްވި ނަމަވެސް، މަޖިލީހުން އެ އިސްލާހު ފާސްކޮށްފައެއް ނުވެއެވެ.
މީގެ އިތުރުން، ވަޒީފާއިން ވަކިކުރުމުގައި ދޭންޖެހޭ ނޯޓިސްގެ މުއްދަތަށްވެސް މި ބިލުން ވަނީ ބަދަލުތަކެއް ގެނެސްފައެވެ. އެގޮތުން، 1 އަހަރަށްވުރެ ދިގު ނޫން މުއްދަތެއްގައި ވަޒީފާ އަދާކުރާ ކޮންމެ މުވައްޒަފަކު ވަޒީފާއިން ވަކިކުރާނަމަ 2 ހަފުތާގެ ނޯޓިސް ދޭންޖެހޭނެ ކަމަށް މިހާރު ވަނީ ކަނޑައަޅާފައެވެ.
މި ބިލުގައި އިތުރަށް ހިމެނޭ މުހިންމު ކަމަކީ، ކުދި އަދި މެދު ފަންތީގެ ވިޔަފާރިތައް ކުރިއެރުވުމަށާއި އައު ވިޔަފާރިތަކަށް ފުރުސަތު ދިނުމަށްޓަކައި، ބައެއް ބާވަތްތަކުގެ ވިޔަފާރިތަކަށް ބިދޭސީން ގެނައުމަށް ދައްކަންޖެހޭ ކޯޓާ ފީ ދެއްކުން އިސްތިސްނާ ކުރުމުގެ ބާރު ވަޒީރުންގެ މަޖިލީހަށް ދިނުމެވެ. މި ބަދަލަކީ ވިޔަފާރީގެ ވާދަވެރިކަން އުފެއްދުމަށް މަގުފަހިކުރުމަށް ގެނެވުނު އިސްލާހެކެވެ.