ލެ ސިޓީ އަންހެނުންގެ ތަރައްޤީއަށް މަސައްކަތްކުރާ ކޮމެޓީ (ޑަބްލިއުޑީސީ) ގެ ރައީސާ ކަމަށް ޕީއެންސީގެ ފަރާތުން ވާދަކުރައްވާ އަލްއުސްތާޛާ އާޝިޔަތު އަލައިކާ އަދުނާންގެ ކެމްޕެއިން ހަރަކާތްތަކުގެ ތެރެއިން “އަލައިކާ އެނގޭތަ؟” ނަމުގައި ހާއްސަ ކުއިޒެއް ރަސްމީކޮށް އިފްތިތާހުކޮށްފިއެވެ. މި ކުއިޒް އިފްތިތާހުކުރުމަށް ބޭއްވި ހާއްސަ ހަރަކާތް އޮތީ މިދިޔަ ހޯމަ ދުވަހުގެ ރޭ މާފަންނު ބިސްބުރު ސަރަހައްދުގައެވެ.
މި ކުއިޒަކީ މާލެ ސިޓީގެ ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިހާބުގައި ވޯޓުލާ ފަރާތްތަކަށް ކެންޑިޑޭޓް އަލައިކާ ތައާރަފްކޮށްދިނުމަށާއި، މާލެ ސިޓީއާ މެދު އޭނާ ގެންގުޅުއްވާ ތަސައްވަރު ވީހާވެސް ގިނަ ފަރާތްތަކަށް ހާމަކޮށްދިނުމުގެ މަގްސަދުގައި ފެށި ހަރަކާތެކެވެ. މި ކުއިޒް ކުރިއަށްގެންދަން ހަމަޖެހިފައިވަނީ 10 މާރޗް 2026 އިން ފެށިގެން 29 މާރޗް 2026 ގެ ނިޔަލަށެވެ.
މި ކުއިޒްގައި ކޮންމެ ދުވަހަކުވެސް އަލައިކާއާ ގުޅޭ ސުވާލެއް އާންމު ކުރާނެއެވެ. މި ސުވާލުތަކަށް ޖަވާބު ދިނުމުގެ ފުރުސަތު ކޮންމެ ދުވަހެއްގެ ރޭގަނޑު 00:00 އާ ހަމައަށް ހުޅުވާލެވިފައިވާނެއެވެ. ބައިވެރީން ޖަވާބު ފޮނުވަން ޖެހޭނީ www.alaika.mv ވެބްސައިޓް މެދުވެރިކޮށެވެ. ކޮންމެ ދުވަހަކުވެސް ރަނގަޅު ޖަވާބު ފޮނުވާ ފަރާތްތަކުގެ މެދުގައި ގުރުއަތުލައި، ހޮވޭ ފަރާތްތަކަށް ދުވަހުގެ އިނާމު ދިނުމަށް ވަނީ ހަމަޖެހިފައެވެ.
މުޅި ކުއިޒްގެ އެންމެ ހާއްސަ އިނާމެއްގެ ގޮތުގައި ހުށަހަޅާފައިވަނީ އުމްރާ ދަތުރެކެވެ. މި އިނާމު ލިބޭނީ ކުއިޒްގެ ސުވާލުތަކަށް ރަނގަޅު ޖަވާބު ފޮނުވާފައިވާ ހުރިހާ ފަރާތްތަކުގެ މެދުގައި ނެގޭ ގުރުއަތަކުން ހޮވޭ ނަސީބުވެރިއަކަށެވެ. ދުވަހުގެ އިނާމު ލިބޭ ފަރާތްތައް ޖެހިގެން އަންނަ ދުވަހު ވެބްސައިޓުގައި އިއުލާންކުރާނެ ކަމަށް ކެމްޕެއިން ޓީމުން މައުލޫމާތުދެއެވެ.
މި ކުއިޒްގެ މީޑިއާ ޕާޓްނަރެއްގެ ގޮތުގައި އެމް.އެމް.ޓީ.ވީ ހަރަކާތްތެރިވާއިރު، ކުއިޒްގެ އިނާމުތައް ސްޕޮންސަރ ކޮށްފައިވަނީ VAV Pvt Ltd ގެ ފަރާތުންނެވެ. މި ހަރަކާތަކީ ކެމްޕެއިންގެ ތެރެއިން އާންމުންނާ ގާތުން މައުލޫމާތު ހިއްސާކުރުމަށް ކުރިއަށްގެންދާ އުފެއްދުންތެރި ހަރަކާތެކެވެ.