ކުރިއަށް އޮތް ލޯކަލް ކައުންސިލް އިންތިހާބާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ އިންތިހާބުގައި ތާއީދު ކުރައްވާނީ ޕީއެންސީގެ ކެންޑިޑޭޓުންނަށް އެކަނި ކަމަށާއި، އެހެން އެއްވެސް ޕާޓީއެއްގެ ނުވަތަ އަމިއްލަ ކެންޑިޑޭޓަކަށް ތާއީދު ނުކުރައްވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އިންތިހާބުގެ ކެމްޕެއިންގެ ތެރެއިން ހުޅުމާލެ ދެކުނު ދާއިރާގެ ބައެއް ގޭގެއަށް ޒިޔާރަތް ކުރެއްވުމަށްފަހު ނޫސްވެރިންނާ ވާހަކަފުޅު ދައްކަވަމުން ރައީސް ވިދާޅުވީ، ކައުންސިލް އިންތިހާބުގައި އެމަނިކުފާނު ތާއީދު ކުރައްވާ ހުރިހާ ކެންޑިޑޭޓުންނަކީ ޕީއެންސީގެ ޓިކެޓުގައި ވާދަކުރައްވާ ބޭފުޅުން ކަމަށެވެ. އަދި އެމަނިކުފާނަކީ ޕާޓީގެ ނިޒާމު ގަބޫލުކުރައްވާ ބޭފުޅެއްކަން ވެސް ފާހަގަކުރެއްވިއެވެ.
ރައީސް މިހެން ވިދާޅުވީ ބައެއް ދާއިރާތަކުގެ އެމްޑީޕީ ކެންޑިޑޭޓުންނަށް އެމަނިކުފާނުގެ ތާއީދު އޮތް ކަމަށް ދެކެވޭ ވާހަކަތަކާ ގުޅިގެންނެވެ. "ހާއްސަކޮށް މި ދާއިރާގައި އަޅުގަނޑަށް ހަބަރުތަކެއް ލިބެނީ އެމްޑީޕީގެ ޓިކެޓުގައި ހުރި ކެންޑިޑޭޓު ބުނާ ކަމަށް އަޅުގަނޑުގެ ތާއީދު އޮތީ އެބޭފުޅާއަށް ކަމަށް. އެއީ ކަނޑައެޅިގެން ދޮގެއް. އަޅުގަނޑުގެ ތާއީދު އޮންނާނީ ޕީއެންސީގެ ކެންޑިޑޭޓަށް އެކަނި،" ހުޅުމާލެ ދެކުނު ދާއިރާއަށް ވާދަކުރައްވާ އަހުމަދު އުބައިދު (އުބޭ) އާއެކު ހުންނަވައި ރައީސް ވިދާޅުވިއެވެ.
އިތުރަށް ވާހަކަފުޅު ދައްކަވަމުން ރައީސް ވިދާޅުވީ، އެމްޑީޕީގެ އިތުރުން އެހެން ސިޔާސީ ޕާޓީތަކާއި އަމިއްލަ ގޮތުން ވާދަކުރައްވާ އެއްވެސް ކެންޑިޑޭޓަކަށް އެމަނިކުފާނުގެ ތާއީދު ނޯންނާނެ ކަމަށެވެ. އަދި ކުރިއަށް އޮތް އިންތިހާބުގައި ޕީއެންސީގެ ކެންޑިޑޭޓުންނަށް ބޮޑު ކާމިޔާބީއެއް ލިބުމަކީ އެމަނިކުފާނުގެ އުންމީދެއް ކަމަށް ވެސް ވިދާޅުވިއެވެ.
އަންނަ މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ މި އިންތިހާބުގައި ޖުމްލަ 294,876 މީހުންނަށް ވޯޓުލުމުގެ ހައްގު ލިބިގެންވާ ކަމަށް އިލެކްޝަންސް ކޮމިޝަނުން ވަނީ ބުނެފައެވެ. މީގެ ތެރޭގައި ހިމެނެނީ 144,506 އަންހެނުންނާއި 150,370 ފިރިހެނުންނެވެ. ލޯކަލް ކައުންސިލް އިންތިހާބުގައި 1,592 ކެންޑިޑޭޓުން ވާދަކުރާއިރު، އަންހެނުންގެ ކޮމިޓީތަކަށް 1,368 ކެންޑިޑޭޓުން ވާދަކުރެއެވެ.
މި އިންތިހާބުގައި އެންމެ ގިނަ ކެންޑިޑޭޓުން ނެރެފައިވަނީ ވެރިކަން ކުރާ ޕީއެންސީންނެވެ. އިންތިހާބާ ދިމާކޮށް، ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއް ދުވަހެއްގައި ބޭއްވުމާ މެދު ރައްޔިތުންގެ ހިޔާލު ހޯދުމުގެ އާންމު ވޯޓެއް ނެގުމަށް ވެސް ވަނީ ހަމަޖެހިފައެވެ.