ދައުލަތުގެ ބެލުމުގެދަށުގައި ތިބި ކުދިންނާއި ހާއްސަ އެހީއަށް ބޭނުންވާ ފަރާތްތައް އީދު އުފަލުގައި ބައިވެރިކުރުމަށްޓަކައި އިސްލާމީ ކަންކަމާ ބެހޭ ވުޒާރާއިން 40,780.44 އެމެރިކާ ޑޮލަރު ހަދިޔާކޮށްފިއެވެ. މި ފައިސާއަކީ ޔުނައިޓެޑް އަރަބި އެމިރޭޓްސް (ޔޫއޭއީ) ގެ އެމިރޭޓްސް ރެޑް ކްރެސެންޓުން ފިތުރު ޒަކާތުގެ ގޮތުގައި ހަދިޔާކޮށްފައިވާ ފައިސާއެކެވެ.
އިޖްތިމާއީ އަދި އާއިލީ ތަރައްގީއާއި ބެހޭ ވުޒާރާއިން މައުލޫމާތު ދެއްވި ގޮތުގައި، ޔޫއޭއީގެ ހެޔޮއެދުންތަކާއެކު ލިބުނު މި އެހީ މިހާރު ވަނީ އެ ވުޒާރާއާ ރަސްމީކޮށް ހަވާލުކޮށްފައެވެ. މި އެހީގެ މައިގަނޑު މަގްސަދަކީ ދައުލަތުގެ ބެލުމުގެ ދަށުގައި ތިބޭ ކުދިންނާއި މުޖުތަމައުގެ އެހީތެރިކަން ބޭނުންވާ ފަރާތްތަކަށް އީދުގެ އުފާވެރިކަން ފޯރުކޮށްދިނުމެވެ.
މި އެހީގެ ދަށުން ކުރިއަށް ގެންދިއުމަށް ރޭވިފައިވާ ކަންކަމުގެ ތަފްސީލް ހާމަކުރައްވަމުން އިޖްތިމާއީ ވުޒާރާއިން ވިދާޅުވީ، ކުދިންނަށް އީދު ހެދުން ހޯދައިދިނުމާއި، ބޭނުންޖެހިފައިވާ އާއިލާތަކަށް ކާބޯތަކެތީގެ ޕެކޭޖު ފޯރުކޮށްދިނުން ހިމެނޭ ކަމަށެވެ. މީގެ އިތުރުން އީދު އުފަލުގައި ބައިވެރިކުރުމަށްޓަކައި ހާއްސަ ހަރަކާތްތަކެއް ކުރިއަށް ގެންދިއުމަށް ވެސް ވަނީ ކަނޑައަޅާފައެވެ.
އިޖްތިމާއީ ވުޒާރާއިން އިތުރަށް ވިދާޅުވީ، މި ހަރަކާތްތައް ހަމައެކަނި މާލެ ސަރަހައްދަށް ހާއްސަ ނުކުރާނެ ކަމަށާއި، އަތޮޅުތެރޭގައި ވެސް މި ހަރަކާތްތައް ކުރިއަށް ގެންދާނެ ކަމަށެވެ. މިއީ ދައުލަތުގެ ބެލުމުގެ ދަށުގައި ތިބި ކުދިންނަށް އުފާވެރި މާހައުލެއް ގާއިމުކޮށްދިނުމަށް ކުރެވޭ މުހިންމު މަސައްކަތެއްގެ ގޮތުގައި އެ ވުޒާރާއިން ފާހަގަކުރެއެވެ.
ދައުލަތުގެ ބެލުމުގެ ދަށުގައިވާ ކުދިންގެ އުފަލަށްޓަކައި ޔޫއޭއީ ސަރުކާރާއި، އެމިރޭޓްސް ރެޑް ކްރެސެންޓުގެ އިތުރުން އިސްލާމީ ކަންތައްތަކާ ބެހޭ ވުޒާރާއިން ވެދެއްވި ދީލަތި އެހީތެރިކަން ފާހަގަކޮށް، އިޖްތިމާއީ އަދި އާއިލީ ތަރައްގީއާއި ބެހޭ ވުޒާރާއިން ވަނީ އެ ފަރާތްތަކަށް ޝުކުރު އަދާކޮށްފައެވެ.