އިސްލާމްދީނުގައި އަންހެނުންނާއި ފިރިހެނުންނަށް ވަރަށް ހަމަހަމަ ޙައްގުތަކެއް ކަށަވަރުކޮށްދީފައިވާ ކަމަށާއި، މި ދެ ޖިންސުގެ މެދުގައި އޮންނަ ތަފާތަކީ ހަމައެކަނި ތަބީޢީ ގޮތުން އަދާކުރަންޖެހޭ ޒިންމާތަކާއި ރޯލުތައް ކަމަށް ދީނީ ޢިލްމުވެރިޔާ ޑރ. އަނާރާ ނަޢީމު ވިދާޅުވެއްޖެއެވެ. ޑރ. އަނާރާ މިހެން ވިދާޅުވީ ރޭ ބޭއްވި އިޙްޔާ ފޯރަމްގައި “އަންހެނުންގެ މިނިވަންކަމާ އިސްލާމް ދީން” މި މައުޟޫއަށް ވާހަކަދައްކަވަމުންނެވެ.
ޑރ. އަނާރާ ވިދާޅުވީ އިސްލާމްދީނަކީ އެންމެ މަތިވެރި ދީން ކަމަށާއި ފިރިހެނުންނެކޭ އެއްހަމައަކަށް އަންހެނުންނަށްވެސް ޙައްގުތައް ކަށަވަރުކޮށްދެއްވާފައިވާ ކަމަށެވެ. ނަމަވެސް ތަފާތުވެގެންދަނީ ދިރިއުޅުމުގެ ތަބީޢަތް ކަމަށާއި އެއީ ޙައްގުތަކަށް އަންނަ ބަދަލެއް ނޫންކަން އޭނާ ފާހަގަކުރެއްވިއެވެ. އަދި ދީނާ މެދު ކުންހީތައް އުފައްދާ މީހުން މި ދެ ކަންތައް އޮޅުވާލައި، ދީން ހަތިޔާރެއްގެ ގޮތުގައި ބޭނުންކުރާކަމަށްވެސް ވިދާޅުވިއެވެ.
އަންހެނުންނާއި ފިރިހެނުންގެ ތަފާތުތަކާ ގުޅޭގޮތުން ވާހަކަދައްކަވަމުން ޑރ. އަނާރާ ވިދާޅުވީ: “އަންހެނުންނާ ފިރިހެނުން ތަފާތުވަނީ ދިރިއުޅުމުގެ ރޯލާއި ދަޢުރުގައި. ހަށިގަނޑަށް އަންނަ ބަދަލާއި، މައިންބަފައިންނަށް އަދާކުރާ ދަޢުރާއި، ދަރިން ލިބުނީމަ އަންނަ ދަޢުރުގެ ތަފާތުތަކާއި ޒިންމާތައް އެއީ ތަބީޢީ ބަދަލުތަކެއް. އަންހެނުންނަށް އަދި ފިރިހެނުންގެ ޒިންމާތައް ތަފާތުވޭ. މިއީ ޙައްގުތަކަށް އަންނަ ބަދަލެއް ނޫން.”
އިސްލާމްދީނުގެ ކުރިން ޖާހިލިއްޔަ ޒަމާނުގައި އަންހެނުންނަކީ ވަރަށް ނިކަމެތި ކޮށްލާފައި ތިބި ބައެއްކަން ފާހަގަކުރައްވައި، ޑރ. އަނާރާ ވިދާޅުވީ އަންހެނުންނަށް ދިރިހުރުމުގެ ޙައްޤާއި އަބުރުވެރި ދިރިއުޅުމެއް އުޅުމުގެ ޙައްގު ކަށަވަރުކޮށްދިނީ އިސްލާމްދީން ކަމަށެވެ. މީގެ އިތުރުން ޢިލްމު ޢުނގެނުމާއި، އިޖްތިމާޢީ ކަންކަމުގައި ޝާމިލުވެ އުޅުމުގެ ޙައްގުވެސް ދީނުގައި ފުރިހަމައަށް އޮތްކަން އޭނާ ބަޔާންކުރެއްވިއެވެ.
އިޤްތިޞާދީ ގޮތުން ބަލާއިރު، މުދާ މިލްކުކުރުމުގެ ޙައްގަކީވެސް އިސްލާމްދީން އައުމުގެ ކުރިން އަންހެނުންނަށް ލިބިދީފައި ނެތް ޙައްގެއް ކަމަށާއި، މިއީ އަންހެނުންނަށް ފިރިހެނުން އިޙްތިރާމް ކުރުމަށް ހުޅުވިގެންދިޔަ ދޮރެއް ކަމަށް ޑރ. އަނާރާ ވިދާޅުވިއެވެ. އަދި ކައިވެނިކުރުމުގައި ބައިވެރިއަކު އިޚްތިޔާރުކުރުމުގެ ފުރިހަމަ މިނިވަންކަން އަންހެނުންނަށް އޮތްކަމަށާއި، ނުރުހުމުގައި ކައިވެނިކުރުވުމަކީ އިސްލާމްދީން ބާރުއަޅާ ކަމެއް ނޫންކަމަށް ވިދާޅުވެ އޭނާގެ ވާހަކަ ނިންމަވާލެއްވިއެވެ.