ލޯކަލް ކައުންސިލް އިންތިޚާބު 2026، އެޕްރިލް 4 ގައި ބާއްވާކަން އިލެކްޝަންސް އިން އިޢުލާން ކުރުމާއި އެކު އެހެން ރަށް ތަކެކޭވެސް އެއްފަދައިން ތިނަދޫ ސިޓީގައި ވެސް އިންތިޚާބުގެ އާ މޫސުމަށް ޢަލި ވިލުނެވެ. ޕާޓީ ތަކުން ކުރިމަތިލާނެ މީހުންގެ ޝައުގުވެރިކަން ފާޅުކޮށް ތުންތުންމަތިންނާއި މީސްމީޑިއާ ތަކުގައި ފާޅު ކުރަން ފެށި އެވެ. ސަރުކާރު ހިންގާ ޕާޓީ، ޕީއެންސީ އަދި އިދިކޮޅު އެމްޑީޕީ ގެ އިތުރުން އަމިއްލަ ފަރާތަކުން އެކި ނަންތައް ތިލަ ކުރަން ފެށިއެވެ. މާގިނަ ދުވަސްތަކެއް ނުވަނީސް އިންތިޚާބީ ކޮޅިގަނޑުގައި ކާމިޔާބުގެ އައްސޭރިއަށް ވާސިލުވުމަށް އެންމެން ވެސް ސީދާ ދަތުރު ފަށައިފިއެވެ.
ޖެހިޖެހިގެން 3 ދައުރަށް ވުރެ ގިނަ ދުވަސް ވަންދެން އެމްޑީޕީ އިން ތިނަދޫ ކައުންސިލްގެ ރައީސާއެކު ކުރަމުން އަންނަ މެޖޯރިޓީ ވެރިކަން އެއްކޮށް ބަދަލުކޮށް ތަރައްޤީގެ ތަފާތު މިސްރާބަކަށް ގެންދިޔުމަށް މިފަހަރު ކުރަމުންދާ ކެމްޕއިން ފެންނަނީ ވަރަށް ތަފާތު ކޮށެވެ. ސަރުކާރުގެ ފުރިހަމަ އާރާއި ބާރާއެކު ސިޓީގެ 2 ދާއިރާގެ މެމްބަރުން އެކުގައި ކުރާ މަސައްކަތް ފެންނަނީ ވަރަށް ފުޅާކޮށެވެ. 150 އަށް ވުރެ ގިނަ މީހުން ހިމެނޭ ބޮޑު ކެމްޕެއިން ޓީމަކާއެކު ވަރަށް ފުޅާ ކޮށެވެ. ހިތާ ރޫޙުން ވަރަށް ޖޯޝާއި ފޯރީގައެވެ. ތަޢުލީމާއި ތަޖުރިބާ އަދި ތަހުޒީބީ ވިސްނުން ހުރި މޭޔަރ ކެނޑިޑޭޓަކާ އެކު ޕީއެންސީގެ ކެމްޕެއިން ތިނަދޫ ސިޓީގައި ރުކުކުރުވާލައި ކުރިޔަށް ގެންދާ ކަމީ އިންތިޚާބު ކާމިޔާބު ކުރުމަށް ލިބުނު ބޮޑު ހިތްވަރެއް ކަމަށް ކެމްޕެއިންގައި މަސައްކަތް ކުރާ އަދި ޕީއެންސީ އަށް ތާއީދު ކުރާ ހުރިހާ ފަރާތްތަކުން އިއްތިފާޤުވެއެވެ.
ތިނަދޫ ސިޓީ ގައި ޕީއެންސީ ގެ ފަރާތުން ކުރިޔަށް ގެންދާ ދޮރުން ދުރަށް ހަރަކާތްތުގެ ތެރެއިން.
ސިޔާސީ ޕާޓީތައް ވުޖޫދު ވި ފަހުން ބޭއްވި ހުރިހާ އިންތިޚާބެއްގައި ގަނޑުކޮށް އެމްޑީޕީން ނަގަމުން އެ ޕާޓީގެ ފިކުރުގައި ހިނގަމުން އަންނަތާ 17 އަހަރު ވެފައިވާ އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ޒަމާންވީ ފަލްސަފާ އެއްކޮށް ބަދަލުކޮށް ތަފާތު ހެޔޮ ބަދަލެއް ތަޖުރިބާ ކުރުމުގެ ފުރުސަތު ރައްޔިތުންނަށް ދިނުމަށް ޕީއެންސީގެ ޑަބްލިއުޑީސީ ކެނޑިޑޭޓުން މިފަިްރު ދައްކާ ރޫޙަކީވެސް ތިނަދޫ ސިޓީން މިފަހަރު ފެންނަ ވަރަށް ތަފާތު މަންޒަރެކެވެ. ކައުންސިލާއި ޑަބްލިއުޑީސީ ކެނޑިޑޭޓުންނާއި މުޅި ކެމްޕޭން ޓީމުން ޑޯޓުޑޯއިން ފެށިގެން މަގުތަކުގައި ކުރިޔަށް ގެންދާ ހަރަކާތްތަކާއި ސޯޝަލްމީޑިއާ ވެސް އެހާ ވަރުގަދަކަން މުޅި ރާއްޖެވެސް ފާހަގަ ކުރެއެވެ. ސަރުކާރާއި އިދިކޮޅުން ކުރާ ކެމްޕެއިންގައި ޢަމަލީ ގޮތުން މަސައްކަތް ކުރާ މީހުން މަދުކަމާއި ޙަޤީޤީ ރޫޙެއް ފެންނަން ނެތް ކަމީ ޕީއެންސީ އަށް ހުރިހާ ގޮނޑިތައް ކާމިޔާބު ކޮށް ތާރީޚީ ނަތީޖާއެއް ނެރޭނެކަން ފެންނަ ހެއްކެއް ކަމަށް އެ ސިޓީގެ ރައްޔިތުން ބުނެއެވެ.
ވަރަށް މަދު ބައެއް ފިޔަވައި ހުރިހާ ރައްޔިތުން ސިޔާސީ ވިސްނުން އެއްފަރާތްކޮށް ބުނުމުން ދަނީ "17 އަހަރު ވަންދެން ރީދޫ ފިކުރަށް" ފުރުސަތު ދެމިއްޖެ ކަމަށެވެ. އިނގިލިން ގުނާލެވޭ އަދަދުގެ ބަޔަކަށް މަންފާ ވާހެން ކުރަމުން އަންނަ "ރަށު ވެރިކަން ނިމުމަކަށް" ގެނެސް މުޅި ރައްޔިތަށް މަންފާ އަދި ހުރިހައި ދިމާއަކުން ސިޓީއެއްގެ ހައިބަތު ފެންނަން އެބަޖެހޭކަމަށެވެ.
ރައްޔިތުން އިޙުތިރާމް ކުރާ ކައުންސިލެއް އޮތް ކަމުގެ އިޙުސާސް ވާން އެބަ ޖެހޭ ކަމަށެވެ. ހުރިހާ ކުރެހުމެއް އެކަކުގެ ސިކުނޑީ އޮންނަ އޮތުން ނިމުމަކަށް ގެނެސް މަޝްވަރާ ކޮށް، ފަންނީ މީހުންގެ އަޑު އެހުމުގެ ޤާބިލުކަން ހުރި ވެރިއެއްގެ މޭސްތިރި ކަމަށް ތިނަދޫ ސިޓީގެ މިސްރާބު ބަދަލު ކުރަން ޖެހޭ ކަމަށް ތިނަދޫއަށް ނިސްބަތްވާ އެމްޑީޕީގެ މެމްބަރުން ވެސް އިއްތިފާޤުވެއެވެ. މި ވިސްނުމަކީ ކުރިޔަށް އޮތް ލޯކަލް ކައުންސިލް އަދި ޑަބްލިއުޑީސީ އިންތިޚާބުގައި ތިނަދޫ ސިޓީގެ ޕީއެންސީއަށް ތާއީދު ކުރާ މީހުން މުޅިން ތަފާތު ރޫޙެއްގައި ކެމްޕެއިން ކުރުމުގައި ކާމިޔާބުގެ މިސްރާބަށް ދަތުރުކުރުމަށް ލިބޭ އެންމެ ބޮޑު ހިތްވަރު ކަމުގައި ވެއެވެ.