ދައުލަތުގެ މީޑިއާ، ޕަބްލިކް ސަރވިސް މީޑިއާ (ޕީއެސްއެމް) ގެ މެނޭޖިންގ ޑިރެކްޓަރ އުމްރާގެ އަޅުކަމަށް ސައުދީ އަރަބިއްޔާގައި ހުންނެވިކަން ރަސްމީކޮށް އަންގާފައިވަނިކޮށް، އެ މުއައްސަސާގެ ހިންގުމަށް ހުރަސްއެޅޭ ގޮތަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އަމަލުކުރަމުންދާ ކަމަށް ބުނެ އެކަން ހުއްޓާލުމަށް ޕީއެސްއެމް އިން އިލްތިމާސްކޮށްފިއެވެ. ޕީއެސްއެމް އިން މިކަމަށް އެދިފައިވަނީ އެކްސްގައި މިއަދު ކުރި ޕޯސްޓެއްގައެވެ.
ޕީއެސްއެމް އިން ހާމަކުރި ގޮތުގައި، އެމްޑީޕީގެ ފަރާތުން އެ ކުންފުނީގެ މެނޭޖިންގ ޑިރެކްޓަރާ ބައްދަލުކުރެއްވުމަށް މިއަދު މެންދުރު 13:00 އަށް ވަޑައިގަންނަވާނެ ކަމަށް ރޭގެ ވަގުތެއްގައި ސިޓީއަކުން ވަނީ އަންގާފައެވެ. ނަމަވެސް، އެމްޑީ މިވަގުތު ރާއްޖޭގައި ނޫޅުއްވާކަމާއި، ހުންނެވީ އުމްރާގެ އަޅުކަމުގައިކަން ސިޓީއަކުން އެމްޑީޕީއަށް ޖަވާބުދީފައިވާނެ ކަމަށް އެ މުއައްސަސާއިން ވަނީ ބުނެފައެވެ. އެމްޑީ އެނބުރި ރާއްޖެ ވަޑައިގަތުމަށް ހަމަޖެހިފައިވަނީ މި މަހުގެ ފަހުކޮޅުގައެވެ.
ޕީއެސްއެމްގެ އެކްސް ޕޯސްޓުގައި ބުނެފައިވަނީ އެމްޑީޕީގެ މި އަމަލުތަކުގެ ސަބަބުން މުވައްޒަފުންގެ ހިތްތަކުގައި ބިރުވެރިކަން އުފެދި، މުއައްސަސާގެ ހިންގުމަށް ދަތިތަކެއް ކުރިމަތިވަމުންދާ ކަމަށެވެ. އެހެންކަމުން، މުއައްސަސާގެ އަގުވެއްޓޭ ފަދަ ވާހަކަތައް ނުދެއްކުމަށާއި، މުވައްޒަފުންނަށް ބިރުދެއްކުން ފަދަ ކަންކަން ވަގުތުން ހުއްޓާލުމަށް ޕީއެސްއެމް އިން ވަނީ ގޮވާލާފައެވެ.
ޕީއެސްއެމް އިން އެމްޑީޕީއަށް ފޮނުވި ސިޓީގައި، މެނޭޖިންގ ޑިރެކްޓަރ ރާއްޖޭގައި ނޫޅުއްވާތީ، އަދި އެނބުރި ވަޑައިގެންނެވުމަށް ހަމަޖެހިފައިވަނީ މި މަހުގެ ފަހުކޮޅުގެ ތާރީޚެއްގައިކަމަށާއޮ މެނޭޖިންގ ޑިރެކްޓަރ އެނބުރި ރާއްޖެ ވަޑައިގެންނެވުމުން އެދިލައްވާފައިވާ ބައްދަލުވުމަށް އެދުމަށް ބުނެފައިވެއެވެ. ހަމަމިއާއެކު ލޯކަލް ކައުންސިލް އިންތިޚާބާ ގުޅިގެން ކުރިއަށްގެންދާ ހޭލުންތެރިކުރުވުމުގެ ޕްރޮގްރާމްތަކާ ގުޅޭގޮތުން ވެސް ޕީއެސްއެމް އިން ވަނީ އެމްޑީޕީއަށް ފޮނުވި ސިޓީގައި ތަފްސީލު ދީފައެވެ. އެ ސިޓީގައި ރައްޔިތުންގެ ޚިޔާލު ހޯދުމުގެ ވޯޓާ ގުޅޭ ޕްރޮގްރާމްތަކަކީ ފަންނީ އަދި އިޖުރާއީ މަޢުލޫމާތު ފޯރުކޮށްދިނުމަށް ތައްޔާރުކުރާ ޕްރޮގްރާމްތަކެއް ކަމަށެވެ. އެހެންކަމުން، މިވަގުތު ސިޔާސީ ޕާޓީތަކަށް ފުރުޞަތު ދިނުމުގެ ބަދަލުގައި އިސްކަންދެނީ ރައްޔިތުންގެ ޚާއްޞަ މަޖިލީހުގެ ކުރީގެ މެންބަރުން ފަދަ ތަޖުރިބާކާރު ބޭފުޅުން މެދުވެރިކޮށް މަޢުލޫމާތު ގެނެސްދިނުމަށް ކަމަށް ޕީއެސްއެމް އިން އެމްޑީޕީއަށް ފޮނުވި ސިޓީގައި ބުނެފައިވެއެވެ.
“މި މުއައްސަސާގެ މިނިވަންކަމާއި ގުޅުވާ މި ކުންފުންޏާ މެދު ރައްޔިތުންގެ މެދުގައި ނަފްރަތު އުފެދޭ ގޮތަށް، ހަޤީގަތާ ޚިލާފު ވާހަކަތައް ނުފެތުރުމަށް އިލްތިމާސްކުރަމެވެ،“ ޕީއެސްއެމްގެ ސިޓީގައި ބަޔާންކޮށްފައިވެއެވެ. އަދި މިހާތަނަށް އެއްވެސް ސިޔާސީ ޕާޓީއަކަށް އެ ހައިސިއްޔަތުން އެ ފުރުޞަތު ދީފައިނުވާނެ ކަމަށް ވެސް އެ ކުންފުނިން ސިޓީގައި ހާމަކޮށްފައިވެއެވެ.
އެމްޑީޕީއަށް ފޮނުވި ސިޓީގައި ޕީއެސްއެމް އިން ބުނީ، އެ ކުންފުނިން އަބަދުވެސް މަސައްކަތް ކުރަމުންދަނީ ޕަބްލިކް ސަރވިސް މީޑިއާގެ ޤާނޫނާ އެއްގޮތަށް، ވަކިފަރާތަކަށް ނުޖެހި މިނިވަންކަމާއެކު ތެދު މަޢުލޫމާތު ފޯރުކޮށްދިނުމަށް ކަމަށެވެ. އަދި އެމްޑީޕީން ވެރިކަން ކުރިއިރުވެސް ދައުލަތުގެ މީޑިއާ ދެމިއޮތީ މި އުސޫލުގެ މަތީގައިކަން އެ ކުންފުނިން ފާހަގަކޮށްފައިވޭމެއެވެ.