އދ. ދިގުރަށުގައި ހިނގި ނުރައްކާތެރި އަލިފާނުގެ ހާދިސާގައި ބަންގްލަދޭޝްގެ ފަސް ރައްޔިތަކު ނިޔާވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ބަންގްލަދޭޝްގެ ބޮޑުވަޒީރު ތާރިޤް ރަޙްމާނަށް ތަޢުޒިޔާގެ މެސެޖެއް ފޮނުއްވައިފިއެވެ.
ރައީސުލްޖުމްހޫރިއްޔާ ފޮނުއްވި ސިޓީގައި، މި ހާދިސާގެ ސަބަބުން ލިބިވަޑައިގެންނެވީ ނުހަނު ފުން ހިތާމައެއްކަން ފާހަގަކުރެއްވިއެވެ. އަދި މި ހިތާމަވެރި ދަނޑިވަޅުގައި، ބަންގްލަދޭޝްގެ ސަރުކާރަށާއި ރައްޔިތުންނަށް، އަދި ވަކިން ޚާއްޞަކޮށް ހާދިސާގައި ނިޔާވި މީހުންގެ އާއިލާތަކަށް ދިވެހި ސަރުކާރާއި ރައްޔިތުންގެ ނަމުގައި އިޚްލާޞްތެރި ތަޢުޒިޔާ ރައީސް ވަނީ ރައްދުކުރައްވާފައެވެ.
ރައީސުލްޖުމްހޫރިއްޔާގެ ސިޓީގައި އިތުރަށް ވިދާޅުވީ، ދިވެހި މުޖުތަމަޢުގައި ބަންގްލަދޭޝްގެ ރައްޔިތުން އަދާކުރަމުންދާ ދައުރަކީ އަގުނުކުރެވޭނެ ފަދަ މުހިންމު ދައުރެއް ކަމަށެވެ. އަދި މި ހާދިސާގެ ސަބަބުން ލިބުނު ބޮޑު ގެއްލުމާއި ހިތާމައިގައި ދިވެހި ރައްޔިތުން ބައިވެރިވާކަމުގެ ޔަޤީންކަން އެމަނިކުފާނު ދެއްވިއެވެ. މީގެ އިތުރުން، މި ހާދިސާގައި އަނިޔާވި މީހުންނަށް އަވަސް ޝިފާއަކަށް އެދިވަޑައިގެން، މަރުވި މީހުންގެ އާއިލާތަކާއެކު ދިވެހިން ތިބިކަން ހާމަކުރެއްވިއެވެ.
މި ހާދިސާއާ ގުޅިގެން ރައީސުލްޖުމްހޫރިއްޔާ ވަނީ މުހިންމު އިރުޝާދުތަކެއްވެސް ދެއްވާފައެވެ. އެގޮތުން މި ހާދިސާ ފުރިހަމައަށް ތަހުގީގުކުރުމަށާއި، ކުރިއަށް އޮތް ތަނުގައި މިފަދަ ހިތާމަވެރި ހާދިސާތައް ތަކުރާރުވިޔަ ނުދިނުމަށްޓަކައި އަޅަންޖެހޭ ފިޔަވަޅުތައް އެޅުމަށް ކަމާބެހޭ އިދާރާތަކަށް އެމަނިކުފާނު ވަނީ އަންގަވާފައެވެ.
ދިގުރަށުގައި މިދިޔަ ހުކުރު ދުވަހުގެ ރޭ އަލިފާނުގެ ހާދިސާ ހިނގާފައިވަނީ ބިދޭސީން ދިރިއުޅޭ އެކޮމޮޑޭޝަން ބްލޮކެއްގައެވެ. މި ހާދިސާގައި ޖުމްލަ 8 މީހުންނަށް އެކިވަރުގެ އަނިޔާ ލިބިފައިވާއިރު، އޭގެ ތެރެއިން 5 މީހަކު ހޮސްޕިޓަލަށް ގެންދިޔައިރުވެސް ވަނީ ނިޔާވެފައެވެ.
މި ހާދިސާގައި އަނިޔާވި އިތުރު ދެ މީހަކަށް އައިޖީއެމްއެޗްގެ ވެންޓިލޭޓަރުގައި މިހާރުވެސް ދަނީ ފަރުވާ ދެމުންނެވެ. އެ ހޮސްޕިޓަލުން މައުލޫމާތު ދޭ ގޮތުގައި، ވެންޓިލޭޓަރުގައި ތިބި ދެ މީހުންގެ ހާލަތަށް އަދި ބަދަލެއް ނާދެއެވެ. އެ ދެ މީހުންގެ ހާލު އަދިވެސް ސީރިއަސް ކަމަށް ހޮސްޕިޓަލުން ބުނެއެވެ.