ދިވެހިރާއްޖޭގައި އިންތިހާބުތައް ގިނަވުމުގެ ސަބަބުން ކުރިމަތިވާ ގޮންޖެހުންތަކަށް ހައްލެއް ހޯދުމަށްޓަކައި، ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމަކީ ސިޔާސީ ހަމަޖެހުން ގާއިމުކުރުމަށް އެޅޭ މުހިންމު ފިޔަވަޅެއް ކަމަށް ބަންޑާރަނައިބު އަހްމަދު އުޝާމު ވިދާޅުވެއްޖެއެވެ. މިއީ ދައުލަތުގެ ހިންގުން ހަރުދަނާކުރުމަށް ރައީސުލްޖުމްހޫރިއްޔާ ގެންގުޅުއްވާ ތަސައްވުރުގެ ދަށުން ކުރިއަށްގެންދާ މަސައްކަތެއްކަން އޭނާ ފާހަގަކުރެއްވިއެވެ.
އަބަދު އިންތިހާބުތަކުގެ ތެރޭގައި ގައުމު އޮތުމަކީ އިގުތިސާދަށް ނޭދެވޭ އަސަރުކުރާ ކަމެއްކަން ފާހަގަކުރައްވައި، ބަންޑާރަނައިބު ވިދާޅުވީ އިންތިހާބުތަކާ ގުޅިގެން އުފެދޭ ސިޔާސީ ހަލަބޮލިކަމުގެ ސަބަބުން ރާއްޖޭގައި އިންވެސްޓުކުރަން ބޭނުންވާ ފަރާތްތަކުގެ ކަންބޮޑުވުންތައް ހުރި ކަމަށެވެ. މި އިސްލާހުގެ ސަބަބުން ވޭތުވެދިޔަ 15 އަހަރު ތެރޭގައި އުފެދިފައިވާ ސިޔާސީ ދެކޮޅުވެރިކަމަށް ބޮޑު ހައްލެއް ލިބޭނެ ކަމަށް އޭނާ ގަބޫލުކުރައްވައެވެ.
އިންތިހާބުތަކުގެ ތަރުތީބަށް އަލިއަޅުއްވާލައްވަމުން އުޝާމް ވިދާޅުވީ، “އަޅުގަނޑުމެންނަށް މިފެންނަ މަންޒަރަކީ ރިޔާސީ އިންތިހާބު ނިންމާފައި އޭގެ ހައެއްކަ މަސްފަހުން މިއޮންނަނީ ރައްޔިތުންގެ މަޖިލީހުގެ އިންތިހާބު. އަނެއެެއްކާ އޭގެ އަހަރެއް ދެ އަހަރެއް ފަހުން މިއޮންނަނީ ލޯކަލް ކައުންސިލުތަކުގެ އިންތިހާބު. މިދެންނެވިހެން ރައްޔިތުންނަށް ހިދުމަތްކުރަން ފަސް އަހަރު ލިބޭއިރު އަބަދުވެސް އިންތިހާބެއްގެ ތެރޭގައި އުޅެންޖެހުމުން ދިމާވާ ގޮންޖެހުންތައް ހަމަ ވަރަށް ބޮޑެތި.”
ގާނޫނުއަސާސީ އިސްލާހުކުރުމަށް މަޖިލީހަށް ހުށަހެޅި ބިލުން ހާސިލުކުރަން ބޭނުންވާ ދެ އަމާޒެއް ބަންޑާރަނައިބު ފާހަގަކުރެއްވިއެވެ. އެއީ ރިޔާސީ އިންތިހާބާއި މަޖިލިސް އިންތިހާބު އެއް ދުވަހެއްގައި ބޭއްވުމާއި، މަޖިލީހުގެ މެންބަރުން ހުވައިކުރައްވާ ތާރީހު ޑިސެންބަރު އެއްވަނަ ދުވަހަށް ބަދަލުކުރުމެވެ. މިގޮތަށް ހަމަޖެހުމުން ރައީސުލްޖުމްހޫރިއްޔާ ހުވައިކުރައްވާތާ ދެ ހަފުތާއެއްހައި ދުވަސްފަހުން މަޖިލީހުގެ މެންބަރުން މަގާމުގެ ހުވައިކުރައްވާނެއެވެ.
މި އިސްލާހުތައް ގެނައުމުގައި އެކަށީގެންވާ ވަރަށް ދިރާސާކޮށް، މަޖިލީހުގެ ތަޅުމުގައާއި ކޮމިޓީ މަރުހަލާގައި ފުޅާދާއިރާއެއްގައި ބަހުސްކުރެވިފައިވާ ކަމަށް ބަންޑާރަނައިބު ވިދާޅުވިއެވެ. އަދި ރައްޔިތުންގެ ހިޔާލު ހޯދުމުގެ ވޯޓާ ހަމައަށް އޮތް މުއްދަތުގައި މިކަމާ ގުޅޭގޮތުން ހޭލުންތެރިކަން އިތުރުކުރުމާއި މަޝްވަރާކުރުމުގެ ފުރުސަތު އޮތްކަން އޭނާ ފާހަގަކުރެއްވިއެވެ.