މާލޭގެ “ޕްރައިމް ގޯޑައުން” ގައި ރޭ ހިނގި ނުރައްކާތެރި އަލިފާނުގެ ހާދިސާއާ ގުޅިގެން، އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ތިން އިންތިޚާބުގެ މަސައްކަތްތަކަށް އެއްވެސް ބުރުލެއް ނާރާނެ ކަމުގެ ޔަގީންކަން އިލެކްޝަންސް ކޮމިޝަންގެ ރައީސް މުހައްމަދު ޒާހިދު ދެއްވައިފިއެވެ.
އަލިފާނުގެ ހާދިސާ ހިނގާފައިވަނީ އިލެކްޝަންސް ކޮމިޝަންގެ އިންތިޚާބީ މަރުކަޒު ހުންނަ އިމާރާތުގެ ކައިރީގައި ކަމަށްވާތީ، އެކަމާ ގުޅިގެން އާންމުންގެ މެދުގައި އުފެދިފައިވާ ކަންބޮޑުވުންތަކަށް ޖަވާބު ދެއްވަމުން ޕީއެސްއެމް ނިއުސްއަށް ދެއްވި އިންޓަވިއުއެއްގައި ޒާހިދު ވިދާޅުވީ، އިންތިޚާބާ ގުޅޭ އެއްވެސް ކަމަކަށް މި ހާދިސާގެ ސަބަބުން ހުރަހެއް ނޭޅޭނެ ކަމަށެވެ.
ކޮމިޝަންގެ ރައީސް އިތުރަށް ވިދާޅުވީ، އިންތިޚާބީ މަރުކަޒުގައި ހުރި ހުރިހާ މުހިންމު ލިޔެކިއުންތަކާއި، އިންތިޚާބާ ގުޅޭ އެހެނިހެން ތަކެތި ވެސް ހުރީ ރައްކާތެރިކަމާއެކު ކަމަށެވެ. އަލިފާނުގެ ހާދިސާގެ ސަބަބުން އެ ތަކެއްޗަށް އެއްވެސް ގެއްލުމެއް ލިބިފައި ނުވާކަން އޭނާ ފާހަގަކުރެއްވިއެވެ.
މި ހާދިސާއާ ގުޅިގެން ވޯޓަރސް ލިސްޓުގައި ކެންޑިޑޭޓުންނާއި ކެންޑިޑޭޓުންގެ މަންދޫބުން ސޮއިކުރުމުގެ މަސައްކަތް މިވަގުތަށް މެދުކަނޑާލާފައިވީ ނަމަވެސް، މާދަމާއިން ފެށިގެން އެ މަސައްކަތް ސޯޝަލް ސެންޓަރުގައި ކުރިއަށްދާނެ ކަމަށް ޒާހިދު ވިދާޅުވިއެވެ. “މާދަމާއިން ފެށިގެން ސޯޝަލް ސެންޓަރުގައި ސޮއިކުރުން ކުރިއަށްދާނެ،” އޭނާ ވިދާޅުވިއެވެ.
އަލިފާން ރޯވި ސަރަހައްދުގައި ހުރި އިންތިޚާބީ މަރުކަޒަށް ވަދެ މަސައްކަތް ކުރުމުގެ ހުއްދަ އެމްއެންޑީއެފުން ދެވެންދެން، އިންތިޚާބުގެ ހުރިހާ އިދާރީ މަސައްކަތްތަކެއް ވަގުތީ ގޮތުން ކުރިއަށް ގެންދާނީ ސޯޝަލް ސެންޓަރުގައި ކަމަށް ވެސް އިލެކްޝަންސް ކޮމިޝަނުން ވަނީ ބުނެފައެވެ.