ރޭ އަލިފާން ރޯވި މާފަންނު ފުލޫނިޔާމަގުގައި ހުރި ގުދަނަކީ ގަސްކާނާ އާއި އެ ނޫންވެސް ނުރައްކާތެރި މާއްދާތަކެއް ހުރި ތަނަކަށް ވާތީވެ
އާންމުން ސަމާލުވުމަށް، ދިވެހި ފުލުހުންގެ ޚިދުމަތާއި އެމްއެންޑީއެފް ފަޔަރ އެންޑް ރެސްކިއު ސަރވިސް އިން އިލްތިމާސް ކޮށްފިއެވެ.
ފުލުހުން ބުނި ގޮތުގައި އަލިފާން ރޯވި ގުދަނަކީ ގަސްކާނާ އާއި އެ ނޫންވެސް ނުރައްކާތެރި މާއްދާތައް ހުރި ތަނެކެވެ. އެހެންކަމުން، އާންމުންގެ ސަލާމަތާއި ރައްކާތެރިކަމަށްޓަކައި އެ ސަރަހައްދުގައި އުޅޭ ފަރާތްތަކުން ހާއްސަ ސަމާލުކަމެއް ދިނުމަށް ފުލުހުން ވަނީ އިލްތިމާސްކޮށްފައެވެ.
އަލިފާން ފެތުރުމުގެ ފުރުސަތު އޮތުމާއި، ދުމުގެ އަސަރުގެ އިތުރުން ނުރައްކާތެރި ކެމިކަލް މާއްދާތަކެއް ހުރުމުން ކުރިމަތިވެދާނެ ނުރައްކަލަކުން ސަލާމަތްވުމަށްޓަކައި، އެ ސަރަހައްދަށް އެއްނުވުމަށް ފުލުހުން ވަނީ އަންގާފައެވެ. އަދި އެ ސަރަހައްދުގައި ދިރިއުޅޭ ފަރާތްތަކާއި ވިޔަފާރިތަކުން ދޮރުތައް ލައްޕައިގެން ތިބުމަށާއި، ބޭރަށް ނުކުމެ އުޅުން މަދުކުރުމަށް ވެސް ވަނީ އިރުޝާދު ދީފައެވެ.
މީގެ އިތުރުން، ދުމުގެ އަސަރުކުރާނަމަ މާސްކު އެޅުމަށް ނުވަތަ ނޭފަތާއި އަނގަ ނިވާކުރުމަށް ވަނީ ބުނެފައެވެ. ދަތުރުފަތުރު ކުރާ ފަރާތްތަކުން ފުލޫނިޔާމަގު ނޫން އެހެން މަގުތައް ބޭނުންކުރުމަށާއި، އެ ސަރަހައްދުގައި ހަރަކާތްތެރިވާ ފުލުހުންގެ އިރުޝާދުތަކަށް ފުރިހަމައަށް ބޯލެނބުމަށް ފުލުހުން ވަނީ އެދިފައެވެ.