ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އަންހެނުންގެ ގޮފިން އިސްނަގައިގެން، ކުރިއަށް އޮތް ރިފަރެންޑަމް ނުވަތަ ފެންނަ ނުފެންނަ ވޯޓާ ގުޅޭގޮތުން ރައްޔިތުން ހޭލުންތެރިކުރުވުމުގެ ކެމްޕޭނެއް ހުވަދުއަތޮޅުގެ ރަށްތަކުގައި ކުރިއަށް ގެންގޮސްފިއެވެ.
މި ކެމްޕޭނުގެ ދަށުން މިހާތަނަށް ގދ. ނަޑެއްލާ، ގދ. ފިޔޯރީ، ގދ. ރަތަފަންދޫގެ އިތުރުން ތިނަދޫ ސިޓީގައި ވަނީ މައުލޫމާތު ދިނުމުގެ ޕްރޮގްރާމްތައް ކުރިއަށް ގެންގޮސްފައެވެ. އިއްޔެ ނަޑެއްލާގައި ކުރިއަށް ގެންދިޔަ ހަރަކާތްތަކަށްފަހު، މިއަދު އެ ޓީމުން ވަނީ ފިޔޯރީގެ ރައްޔިތުންނާ ބައްދަލުކޮށްފައެވެ.
ކެމްޕޭން ޓީމުގެ ފަރާތުން ހުވަދޫ މީޑިއާއަށް މައުލޫމާތު ދެއްވަމުން ވިދާޅުވީ، މި ހަރަކާތުގެ މައިގަނޑު މަގްސަދަކީ އަންނަ އޭޕްރީލް މަހުގެ 4 ވަނަ ދުވަހު ބޭއްވުމަށް ހަމަޖެހިފައިވާ ރިފަރެންޑަމް ވޯޓާ ގުޅޭގޮތުން ރައްޔިތުންނަށް ސައްހަ މައުލޫމާތު ފޯރުކޮށްދިނުން ކަމަށެވެ. "ރައްޔިތުންނަށް މިބުނެދެނީ ސަރުކާރުން މިނަގާ ފިޔަވަޅަކީ ރައްޔިތުންނަށް އޭގެ ފައިދާ އޮތް ކަމެއްކަން،" ކަމަށް އެ ޓީމުން ބުންޏެވެ.
އިދިކޮޅު ފަރާތްތަކުން ދެ އިންތިޚާބު އެއްކޮށްލަނީ ކަމަށް ބުނެ ފަތުރަމުންދާ ވާހަކަތަކަކީ ހަގީގަތެއް ނޫންކަން މި ކެމްޕޭނުގެ ތެރެއިން އޮޅުންފިލުވައިދެއެވެ. ޕީއެންސީގެ އަންހެނުންގެ ގޮފިން ބުނާ ގޮތުގައި، ދެ އިންތިޚާބު ކުރިއަށް ގެންދާނީ އެއް ދުވަހެއްގެ ދެ ވަގުތެއްގައެވެ. މި ބަދަލުގެ ސަބަބުން ދައުލަތުގެ ބަޖެޓުން ކުރާ ހޭދަ ކުޑަވެ، ސިޔާސީ ނުތަނަވަސްކަން ކުޑަވާނެ ކަމަށް ސަރުކާރަށް ތާއީދުކުރާ ފަރާތްތަކުން ބުނެއެވެ.
ޕީއެންސީގެ އަންހެނުންގެ ގޮފިން އިސްނަގައިގެން ރިފަރެންޑަމް ވޯޓަށް ހޭލުންތެރި ކުރުވުމުގެ ކެމްޕޭނުގެ ތެރެއިން
ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމާ މެދު ގޮތެއް ނިންމުމަށް އަންނަ އޭޕްރިލް މަހުގެ 4 ވަނަ ދުވަހު އާންމު ފެންނަނުފެންނަ ވޯޓެއް ނެގުމަށް ވަނީ ނިންމާފައެވެ. މި ބަދަލު ގެނައުމަށް ރައްޔިތުން ނިންމައިފިނަމަ، ދެ އިންތިޚާބު އެއްކޮށްލުމުގެ ގޮތުން މިހާރު ހިނގަމުންދާ މަޖިލީހުގެ ދައުރުން ހަ މަސް ދުވަސް އުނިވާނެއެވެ.
ސަރުކާރާއި ޕީއެންސީން މި ބަދަލަށް ތާއީދުކުރަނީ އޭގެ ސަބަބުން ދައުލަތުގެ ބަޖެޓުން ކުރާ ހޭދަ ކުޑަވެ، ސިޔާސީ ނުތަނަވަސްކަން މަދުވާނެތީއެވެ. އަދި މިކަމުގެ ސަބަބުން ސަރުކާރާއި މަޖިލީހާ ދެމެދު އޮންނަ ގުޅުން ރަނގަޅުވެ، މަސައްކަތްތަކަށް ފަސޭހަވާނެ ކަމަށް އެ ފަރާތްތަކުން ދެކެއެވެ.
ނަމަވެސް އިދިކޮޅު އެމްޑީޕީން މި ހުށަހެޅުމާ ދެކޮޅެވެ. އެ ޕާޓީން ގަބޫލުކުރާ ގޮތުގައި މިއީ ވެރިކަން ކުރާ ޕާޓީއަށް ހުރިހާ ބާރުތަކެއް އެއްފަހަރާ ހޯދުމަށް ކުރާ މަސައްކަތެކެވެ. އަދި މީގެ ސަބަބުން ދައުލަތުގެ ބާރުތައް ވަކިވެފައި އޮންނަ އޮތުމަށް ބުރޫއަރައި، ޑިމޮކްރެޓިކް ނިޒާމަށް ނޭދެވޭ އަސަރުތަކެއް ކުރާނެ ކަމަށް އެ ޕާޓީން ބުނެއެވެ.
ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އަންހެނުންގެ ގޮފިން އިސްނަގައިގެން، ކުރިއަށް އޮތް ރިފަރެންޑަމް ވޯޓާ ގުޅޭގޮތުން ހޭލުންތެރިކަން އިތުރުކުރުމުގެ ހަރަކާތްތަކަކީ އިދިކޮޅުގެ މިބުނުމުގެ ދޮގުކަން ބުނެދީ، ސަރުކާރުން، އެއްދުވަހެއްގައި ދެ އިންތިހާބު ބޭއްވުމަކީ ސަރުކާރަށައި ރައްޔިތުންނަށްވެސް އޭގެއިން ފައިދާ ވާނެކަމެއްކަން ރައްޔިތުންނަށް ފަހުމުކޮށްދިނުމެވެ.