ޢީދުގެ އުފާ ބައްދަލުކުރާ މި ދަނޑިވަޅުގައި، މުސްލިމުންނަށް ބާރުވެރިކަމާއި ޤަދަރުވެރިކަމާއި ހައިބަތަށް އެދިވަޑައިގަންނަވާކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ބަރަކާތްތެރި ފިޠުރު ޢީދު ދުވަހުގެ މުނާސަބަތުގައި، ދިވެހި ރައްޔިތުންނަށް ފޮނުއްވި ޚިޠާބުގައެވެ.
މިއަދަކީ 1447 ވަނަ އަހަރުގެ ބަރަކާތްތެރި ފިޠުރު ޢީދު ދުވަހެވެ. މިއީ ރަމަޟާން މަހުގެ އަޅުކަންތައް ފުރިހަމަކުރުމަށްފަހު، މާތް ﷲ ދެއްވި ނިޢުމަތްތަކަށް ޝުކުރުވެރިވެ، އުފާފާޅުކުރުމަށް މުސްލިމުންނަށް ލިބޭ ޚާއްޞަ ދުވަހެކެވެ. ޢީދުގެ ހަގީގީ އުފަލަކީ މާތް ﷲ އަށް ޙަމްދުކުރުމާއި، އެކަކު އަނެކަކަށް ހިތްހެޔޮކޮށް، މުޖުތަމަޢުގައި އީމާންކަމާއި ލޮބުވެތިކަން އާލާކުރުމެވެ.”
ޢީދުގެ އުފާފާޅުކުރުންތައް ބައްޓަންކުރަންވާނީ އިސްލާމީ މިންގަނޑުތަކުގެ ތެރޭގައެވެ. ރަމަޟާން މަހުގެ މަދަރުސާއިން އަޅުގަނޑުމެންނަށް ދަސްކޮށްދިނީ ދޫތަކުން ހެޔޮބަސް ބުނުމަށާއި، ގުނަންތަކުން ހެޔޮ ޢަމަލުކުރުމަށާއި، އެއްބައިވަންތަކަމާއެކު ކެތްތެރިވެ ތިބުމަށެވެ. ރަމަޟާން މަސް ނިމުމަކީ އަޅުކަން ކުރުން ހުއްޓާލަންޖެހޭ ސަބަބެއް ނޫނެވެ. އޭގެ ބަދަލުގައި ޝައްވާލު މަހުގެ ހަ ރޯދައާއެކު ހެޔޮ ޢަމަލުތަކުގެ މަތީގައި ދެމިތިބުމަށް އިސްލާމްދީން ބާރުއަޅައެވެ.
މި އަހަރުގެ ޢީދު އައިއިރު އިސްލާމީ އުންމަތް އޮތީ ނުތަނަވަސްކަމެއްގެ ތެރޭގައެވެ. ޚާއްޞަކޮށް ފަލަސްޠީނާއި މެދުއިރުމަތީގެ މުސްލިމް އަޚުންނާއި އުޚުތުން ތަހައްމަލު ކުރަމުންދާ ހިތްދަތިކަމުގައި ބައިވެރިވެ، އެބައިމީހުންނަށް އަމާންކަމާއި ނަޞްރު ދެއްވުމަށް އެދި ދުޢާކުރުން މުހިންމެވެ. މުސްލިމުންނަކީ އެއް ހަށިގަނޑެއްގެ މިސާލު ކަމަށްވާއިރު، އެންމެހާ މުސްލިމުންނަށް ބާރުވެރިކަމާއި ރައްކާތެރިކަން ދެއްވުމަށް އެދި ދުޢާކުރަންޖެހެއެވެ.