މުސްލިމެއްގެ މުސީބާތެއް ފިލުވައިދީފި މީހާއަށް ގިޔާމަތް ދުވަހުގެ މުސީބާތްތަކުގެ ތެރެއިން މުސީބާތެއް މާތް ﷲ ފިއްލަވައި ދެއްވާނެކަމަށް މިއަދުގެ ފިތުރު އީދު ހުތުބާގައި ހާމަކޮށްފިއެވެ. މިއަދަކީ ބަރަކާތްތެރި ރޯދަ މަހުގެ އަޅުކަން އަދާކުރުމަށްފަހު، މާތް ﷲ ދެއްވި ހިދާޔަތަށް ޝުކުރުވެރިވެ، އުފާފާޅުކުރަންވީ ދުވަސްކަން ހުތުބާގައި ފާހަގަކުރެއްވިއެވެ.
އެއްބައިވަންތަކަމާއި އަޚުވަންތަކަން އީދުގެ އުފާ ފާޅު ކުރާއިރު، މުސްލިމުންގެ މެދުގައި އޮންނަންޖެހޭ އެއްބައިވަންތަކަމާއި އަޚުވަންތަކަން ދެމެހެއްޓުމުގެ މުހިންމުކަމުގެ މައްޗަށް ހުތުބާގައި ބާރުއެޅުއްވިއެވެ. ހަސަދަވެރިކަމާއި ބައިބައިވުމުން ދުރުހެލިވެ، އެކަކު އަނެކަކަށް ހެޔޮކޮށްހިތައި، މޫނުމަތިން އުފާވެރިކަން ފާޅުކުރުމަށް ވަނީ ނަސޭހަތްތެރިވެފައެވެ. މީގެ އިތުރުން މައިންބަފައިންގެ ހައްގުތަކާއި ރަހިމުގެ ގުޅުން ދެމެހެއްޓުމަށް ހާއްސަ ސަމާލުކަމެއް ދިނުމަށް ވެސް ގޮވާލެއްވިއެވެ.
އީދު ނަމާދާއި ފިތުރު ޒަކާތުގެ މަގްސަދު
ހުތުބާގައި ބަޔާންކުރި ގޮތުގައި އީދު ނަމާދާއި ފިތުރު ޒަކާތަކީ މުޖުތަމައުގެ އެންމެހައި ފަންތިތަކެއްގެ މީހުން އުފަލުގައި ބައިވެރިކުރުވުމަށް އޮތް މަތިވެރި ވަސީލަތްތަކެވެ. އީދުގެ ހަރަކާތްތައް ކުރިއަށް ގެންދަންވާނީ އިސްލާމީ ޝަރީއަތުގެ މިންގަނޑުތަކުގެ ތެރޭގައި ކަމަށާއި، ރޯދައިގެ މަދަރުސާއިން ލިބިދިން ތަރުބިއްޔަތުގެ ބޭނުމަކީ އެކަކު އަނެކަކަށް އެހީތެރިވާ، އަމާން އަދި ބަދަހި މުޖުތަމައެއް ބިނާކުރުން ކަމަށް ހުތުބާގައި ބުންޏެވެ.
ކީރިތި ރަސޫލާ ﷺ ގެ ހަދީޘްފުޅު
މުސްލިމުންގެ މެދުގައި އޮންނަންޖެހޭ ގުޅުން ސިފަކޮށްދެއްވަމުން ހުތުބާގައި ކީރިތި ރަސޫލާ ﷺ ގެ ހަދީޘްފުޅެއްގެ މާނަ ވިދާޅުވެދެއްވިއެވެ. “ކޮންމެ މުސްލިމަކީ އަނެއް މުސްލިމާގެ އަޚެކެވެ. އޭނާ އޭނާގެ އަޚާއަށް އަނިޔާވެރިއެއް ނުވާނެއެވެ. އަދި އޭނާއަށް އަނިޔާވެރިވުމަށް ދުޝްމަނުންގެ އަތްމައްޗަށް ދޫކޮށެއް ވެސް ނުލާނެއެވެ.”
މީގެ އިތުރުން، އަޚާގެ ބޭނުން ފުއްދައިދިނުމުގައި ދެމިހުރި މީހާގެ ބޭނުން ފުއްދައިދެއްވުމުގައި މާތް ﷲ ވޮޑިގެންވާނެ ކަމަށާއި، މުސްލިމެއްގެ އައިބެއް ފޮރުވައިދީފި މީހާގެ އައިބުތައް ގިޔާމަތް ދުވަހުން މާތް ﷲ ފޮރުވައިދެއްވާނެ ކަމަށް ވެސް ހަދީޘްގައިވެއެވެ.
ހުތުބާގައި ބުނީ، ރައްޔިތުންގެ މެދުގައި އަމާންކަމާއި ފުދުންތެރިކަން އޮތުމަކީ ނުހަނު މުހިންމު ކަމެއް ކަމަށެވެ. އަދި އެކަންކަމަށްޓަކައި ރަސޫލުބޭކަލުން ދުއާކުރެއްވިކަން ހުތުބާގައި ހަނދާންކޮށްދެއްވިއެވެ.