މިއަހަރުގެ ފިތުރު ޒަކާތުގެ ގޮތުގައި ލިބުނު ފައިސާގެ ތެރެއިން، ހާލުގައި ޖެހިފައިވާ ފަލަސްތީނުގެ ރައްޔިތުންނަށް ކާބޯތަކެތީގެ އެހީތެރިކަން ފޯރުކޮށްދިނުމަށްޓަކައި 500,000 (ބައި މިލިއަން) ރުފިޔާ އިސްރާ އެސޯސިއޭޝަނާ ހަވާލުކޮށްފިއެވެ. މި އެހީއަކީ ފަލަސްތީނުގެ ރައްޔިތުންނަށް ބޭނުންވާ ޒަރޫރީ ކާބޯތަކެތި ފޯރުކޮށްދިނުމަށް ދިން އެހީއެކެވެ.
އިސްލާމިކް މިނިސްޓްރީން ހާމަކޮށްފައިވާ ގޮތުގައި މިއަހަރުގެ ފިތުރު ޒަކާތުގެ ގޮތުގައި ޖުމްލަ 14 މިލިއަނަށް ވުރެ ގިނަ ރުފިޔާ ވަނީ ލިބިފައެވެ. މިއީ މިހާތަނަށް ފިތުރު ޒަކާތުގެ ގޮތުގައި އެންމެ ގިނައިން ފައިސާ ލިބުނު އަހަރުކަންވެސް އެ މިނިސްޓްރީން ފާހަގަކުރެއެވެ.
ފަލަސްތީނަށް ފޮނުވި އެހީގެ އިތުރުން، ރާއްޖޭގައި ދަތި ހާލުގައި އުޅޭ ފަރާތްތަކަށް އެހީވުމަށްޓަކައި ސޯޝަލް މިނިސްޓްރީގެ އިޖުތިމާއީ ޓްރަސްޓް ފަންޑަށްވެސް ވަނީ ފައިސާ ހަވާލުކޮށްފައެވެ. އެގޮތުން 423,749 ރުފިޔާ ރޭގެ ވަގުތެއްގައި ސޯޝަލް މިނިސްޓްރީއާ ހަވާލުކޮށްފައިވާ ކަމަށް އިސްލާމިކް މިނިސްޓްރީން ބުނެއެވެ.
ރާއްޖޭގައި ޒަކާތް ބެހުމުގެ މަސައްކަތާ ގުޅޭގޮތުން މިނިސްޓްރީން ބުނީ، މިއަހަރު ރާއްޖޭގައި ޒަކާތް ބަހާފައިވަނީ ބޮލަކަށް 6,000 ރުފިޔާގެ މަގުންނެވެ. މިއީ މިހާތަނަށް ރާއްޖޭގައި ބޮލަކަށް އެންމެ ގިނައިން ފައިސާ ބެހި އަހަރުކަންވެސް އެ މިނިސްޓްރީގެ ތަފާސްހިސާބުތަކުން ދައްކައެވެ.
މި އެހީތަކަކީ ޒަކާތުގެ ފައިސާ އޭގެ ހައްގުވެރިންނަށާއި، ދަތި ހާލުގައި ތިބި މުސްލިމް އަޚުންނަށް ފޯރުކޮށްދިނުމަށް ސަރުކާރުން ކުރަމުންދާ މަސައްކަތުގެ ދަށުން ދެވުނު އެހީތަކެކެވެ.