ގއ. ގެމަނަފުށީގެ މަގުތައް ޒަމާނީ ފެންވަރަށް ތަރައްޤީކުރުމަށް ސަރުކާރުން ކުރިއަށްގެންދާ މަޝްރޫޢުގެ އަމަލީ މަސައްކަތް ރަސްމީކޮށް ފަށައިފިއެވެ. މި މަސައްކަތް ސަރުކާރުން ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާއެވެ.
ގެމަނަފުށީ މަގު ހެދުމުގެ މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށަށް ކުރެއްވި ދަތުރުފުޅުގައި ރައްޔިތުންނަށް ވެވަޑައިގެންފައިވާ ވަޢުދުފުޅުގެ ދަށުން ކުރިއަށްދާ މަސައްކަތެކެވެ. ރައީސް ވިދާޅުވެފައިވަނީ ރަށުގެ މައި އިދާރާތައް ހުރި މަގުތަކާއި، ސިނާޢީ ސަރަޙައްދުތަކަށް ބޭނުންކުރާ މައި މަގުތަކުގައި ތާރުއަޅައި ޒަމާނީ ފެންވަރަށް ތަރައްޤީކޮށްދެއްވާނެ ކަމަށެވެ.
މި މަޝްރޫޢުގެ ދަށުން ގެމަނަފުށީގެ ޖުމްލަ 5 މަގެއްގައި ތާރުއަޅައިގެން ތަރައްޤީކުރުމަށް ވަނީ ނިންމާފައެވެ. މި މަސައްކަތުގެ ތެރޭގައި ދުވާރު ހެދުމާއި، މަގު ބައްތި ޖެހުމާއި، ފެންބޮޑުވުމުގެ މައްސަލައަށް ޙައްލެއް ހޯދުމަށްޓަކައި ސްޓޯމް ވޯޓާ މެނޭޖްމަންޓް ސިސްޓަމެއް ޤާއިމުކުރުން ހިމެނެއެވެ. މީގެ އިތުރުން، ކޭބަލްތަކަށް ބޭނުންވާ ޖަންކްޝަންތައް ބެހެއްޓުމާއި، ގަސް އިންދާ ވަޅުގަނޑުތައް ހެދުމާއި، މަގުގެ ނިޝާންތައް ކުރެހުމުގެ މަސައްކަތްވެސް ކުރިއަށްދާނެއެވެ.
ޖުމްލަ 76.1 މިލިޔަން ރުފިޔާ ޚަރަދުކޮށްގެން ކުރިއަށްގެންދާ މި މަޝްރޫޢަކީ 2023 ވަނަ އަހަރުގެ ޖޫން މަހު އާރްޑީސީއާ ހަވާލުކޮށްފައިވާ މަޝްރޫޢެކެވެ. މަސައްކަތުގެ އަމަލީ މަރުޙަލާ މި މަހުގެ 18 ވަނަ ދުވަހު ފަށާފައިވާއިރު، މިއީ ރަށުގެ އުމްރާނީ ތަރައްޤީއަށް ލިބިގެންދާނެ ބޮޑު ކުރިއެރުމެކެވެ.
ސަރުކާރުން ބުނެފައިވަނީ ރަށްރަށުގެ މަގުތައް ތާރުއަޅައިގެން ތަރައްޤީކުރުމުގައި ރައްޔިތުންނަށް މަޖުބޫރުކުރުމެއް ނޯންނާނެ ކަމަށެވެ. ޚާއްޞަކޮށް ލޯކަލް ޓޫރިޒަމް ފުޅާވެފައިވާ ރަށްތަކުގައި ވެލި މަގުތައް ބޭއްވުމަށް ބޭނުންވާނަމަ، އެ މަގުތައް ބެލެހެއްޓުމަށް ބޭނުންވާ އާލާތްތަކާއި ފެންބޮޑުވުން ހައްލުކުރާނެ ވަސީލަތްތައް ފޯރުކޮށްދިނުމަށް ސަރުކާރުން އިސްކަންދޭނެއެވެ.