އައްޑޫ ސިޓީގެ ކަރަންޓުގެ ޚިދުމަތް ރަނގަޅު ކުރުމަށްޓަކައި އެ ސިޓީގައި ގާއިމްކުރާ ސެންޓްރަލް ޕަވާ ސްޓޭޝަން (ސީ.ޕީ.އެސް) ގާއިމްކުރުމުގެ އަމަލީ މަސައްކަތް ރަސްމީކޮށް އިފްތިތާހް ކޮށްފިއެވެ. މި މަޝްރޫޢު އިފްތިތާހް ކޮށްދެއްވީ މިކަމަށްޓަކައި އައްޑޫ ސިޓީ ހިތަދޫގައި ރޭ ބޭއްވި ހާއްސަ ރަސްމިއްޔާތެއްގައި ދާހިލީ ސަލާމަތާއި ފަންނިއްޔަތާބެހޭ ވަޒީރު، އަލީ އިހްސާން އެވެ.
މި ރަސްމިއްޔާތުގައި ވާހަކަފުޅު ދައްކަވަމުން ފެނަކަ ކޯޕަރޭޝަންގެ މެނޭޖިންގ ޑިރެކްޓަރު، މޭޖާ (ރިޓަޔާޑް) މުހައްމަދު ނަޖާހު ވިދާޅުވީ، އައްޑޫ ސިޓީގެ ކަރަންޓުގެ މައްސަލައަކީ އެތައް ދުވަހެއްވީ މައްސަލައެއް ކަމަށާއި، މިކަމަށް ދާއިމީ ހައްލެއް މީގެ ކުރިން ހޯދައިދެވިފައި ނުވަނީ އެކަށީގެންވާ މަސައްކަތްތަކެއް ކުރެވިފައި ނުވުމުގެ ސަބަބުން ކަމަށެވެ. ނަމަވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް މިހާރު މިވަނީ މި މަސައްކަތް އައު ފަރާތަކާ ހަވާލުކޮށް އަމަލީ މަސައްކަތް ފެށިފައި ކަމަށް އޭނާ ވިދާޅުވިއެވެ.
ޑެފިނިޓް ސޮލިއުޝަންސް ކުންފުންޏާ ހަވާލުކޮށްގެން ކުރިއަށް ގެންދާ މި މަޝްރޫޢުގެ ދަށުން ބެލްޖިއަމްގެ އަންގްލޯ ބެލްޖިއަން ކޯޕަރޭޝަން (އޭ.ބީ.ސީ) ބްރޭންޑްގެ ޒަމާނީ ލޯ-ސްޕީޑް އިންޖީނުތަކެއް ބެހެއްޓުމަށް ވަނީ ހަމަޖެހިފައެވެ. މިއީ މިހާރު އައްޑޫގައި ބޭނުންކުރާ ހައި-ސްޕީޑް އިންޖީނުތަކާ ހިލާފަށް، ޔޫރަޕްގެ ގައުމުތަކުގައިވެސް ބޭނުންކުރާ ފެންވަރު ރަނގަޅު އިންޖީނުތަކެކެވެ.
މި މަޝްރޫއު އަންނަ އަހަރުގެ ނިޔަލަށް ނިންމުމަށް ތާވަލުކޮށްފައިވާއިރު، މަސައްކަތް ނިމުމުން އައްޑޫ ސީ.ޕީ.އެސްގައި 26.37 މެގަވޯޓުގެ ކަރަންޓު އުފެއްދުމުގެ ގާބިލްކަން ހުންނާނެއެވެ. މީގެ އިތުރުން މި މަޝްރޫއުގެ ތެރެއިން އިންޖީނުތައް ބަހައްޓައި އޮޕަރޭޝަނަށް ގެނައުމުގެ ހުރިހާ މަސައްކަތެއް ފުރިހަމަކުރެވޭނެ ކަމަށް ފެނަކައިން މައުލޫމާތު ދެއެވެ
އައްޑޫ ސިޓީގެ ކަރަންޓުގެ އިތުރުން ފެނާއި ނަރުދަމާގެ ޚިދުމަތް ރަނގަޅު ކުރުމަށްވެސް ގިނަ މަސައްކަތްތަކެއް ކުރެވެމުންދާކަން އެމްޑީ ނަޖާހު ފާހަގަކުރެއްވިއެވެ. އެގޮތުން ސީ.ޕީ.އެސް މަޝްރޫއު ނިމި ޚިދުމަތް ފެށޭއިރު، އައްޑޫގައި މެދުކަނޑާލާފައިވާ ފެނަކައިގެ ދެ އޮފީސް އިމާރާތުގެ މަސައްކަތް ނިންމައި، މުވައްޒަފުންނަށް އައު އޮފީސް އިމާރާތެއް ލިބިގެންދާނެ ކަމަށްވެސް އޭނާ ވިދާޅުވިއެވެ.
މި ރަސްމިއްޔާތުގައި އޭ.ބީ.ސީ ކުންފުނީގެ އޭރިއާ މެނޭޖަރު ކެޕްޓަން ވިންސެންޓް ޕިރީ އާއި، ޑެފިނިޓް ސޮލިއުޝަންސްގެ ސީ.އީ.އޯ އަބްދުﷲ ސައީދު އަދި އައްޑޫ ސިޓީ ތަމްސީލުކުރައްވާ ރައްޔިތުންގެ މަޖިލީހުގެ މެންބަރުން ބައިވެރިވެވަޑައިގެންނެވިއެވެ.