ކުރިއަށް އޮތް ލޯކަލް ކައުންސިލް އިންތިޚާބުގައި ސަރުކާރު ހިންގާ ޕާޓީ، ޕީއެންސީގެ ފަރާތުން ވާދަކުރާ ކެނޑިޑޭޓުންގެ ކެމްޕެއިން ހަރަކާތްތަކުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު މިއަދު ހެނދުނު ތިނަދޫ ސިޓީއަށް ވަޑައިގެންފިއެވެ.
މެޑަމް ސާޖިދާ ތިނަދޫ ސިޓީއަށް ވަޑައިގަތުމުން އެ ސިޓީގެ ބަނދަރު ސަރަޙައްދުން އެކަމަނާއަށް ވަނީ ވަރަށް ހޫނު މަރުޙަބާއެއް ދަންނަވާފައެވެ. އެގޮތުން އެކަމަނާއަށް މަރުޙަބާ ދެންނެވުމަށްޓަކައި ތިނަދޫގެ ގިނަ އަދަދެއްގެ ރައްޔިތުންނާއި ޕީއެންސީއަށް ތާއީދުކުރާ ފަރާތްތަކުން ވަނީ ޖެޓީ ސަރަޙައްދުގައި ދިގު ކިއުއެއް ދަމާލާފައެވެ.
ފަސްޓް ލޭޑީގެ މި ދަތުރުފުޅަކީ ކުރިއަށް އޮތް ކައުންސިލް އިންތިޚާބުގައި ޕީއެންސީގެ ޓިކެޓުގައި ތިނަދޫ ސިޓީ ކައުންސިލަށް ވާދަކުރައްވާ ކެންޑިޑޭޓުންނަށް ތާއީދު ހޯއްދެވުމަށް ކުރައްވާ ދަތުރުފުޅެކެވެ. މި ދަތުރުފުޅުގެ ތެރެއިން މިއަދު މެންދުރުފަހު ކުރިއަށްދާ ޑޯ-ޓު-ޑޯ ހަރަކާތްތަކުގައި އެކަމަނާ އަމަލީގޮތުން ބައިވެރިވެވަޑައިގަންނަވާނެއެވެ.
މީގެ އިތުރުންވެސް، އިންތިޚާބަށް ތައްޔާރުވުމުގެ ގޮތުން ޕީއެންސީން ރާވާފައިވާ ކެމްޕެއިންގެ އިތުރު ހަރަކާތްތަކެއް މިއަދު ތިނަދޫ ސިޓީގައި ކުރިއަށް ގެންދިއުމަށް ވަނީ ހަމަޖެހިފައެވެ. މި ހަރަކާތްތަކުގެ ތެރެއިން ކެނޑިޑޭޓުންގެ ކެމްޕެއިން ވަރުގަދަކުރުމަށް ގިނަ މަސައްކަތްތަކެއް ކުރެވިގެންދާނެއެވެ