ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން ރާއްޖޭގައި ހިންގާ ފުރަތަަމަ މަޝްރޫޢު ކަމުގައިވާ ފްލޯޓިން ސޯލަރ މަޝްރޫޢު ކުރިއަށް އޮތް ދެ އަހަރު ދުވަހުގެ ތެރޭގައި ނިންމާލެވޭނެ ކަމަށް މޫސުމީ ބަދަލުތަކާއި، ތިމާވެއްޓާއި ހަކަތައާ ބެހޭ ވަޒީރު ޠާރިޤު އިބްރާހިމް ވިދާޅުވެއްޖެއެވެ. ވަޒީރު ވިދާޅުވީ މި މަސައްކަތް މިހާރު ބާރު މިނެއްގައި ކުރިއަށްދާ ކަމަށެވެ.
މާލެ ސަރަހައްދުގައި ޤާއިމްކުރާ މި “ސޯލާ ސިޓީ” އަކީ ސަރުކާރުގެ އެސްއީޒެޑް މަޝްރުޢޫތަކުގެ ތެރެއިން ހުއްދަދެވުނު ފުރަތަމަ މަޝްރޫޢުއެވެ. މި މަޝްރޫއު ކުރިއަށް ގެންދިއުމަށް ނިންމާފައިވަނީ މާލެ ސަރަހައްދުގައި އޮންނަ ކުޑަބަނޑޮހުގެ އިރުމަތީ ފަރާތުގައެވެ. މި މަސައްކަތް ކުރިއަށް ގެންދާނީ އެކި ފިޔަވަހިތަކަށް ބަހާލައިގެން ކަމަށްވެސް ވަޒީރު ފާހަގަކުރެއްވިއެވެ.
ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވަޒީރު ޠާރިޤު ވިދާޅުވީ، މިއީ ޔޫޓިލިޓީ ސްކޭލް ސިސްޓަމެއް ކަމަށާއި، މީގެ ސަބަބުން ރާއްޖޭގެ ހަކަތައިގެ ރައްކާތެރިކަން އިތުރުވެގެންދާނެ ކަމަށެވެ. “މިވަގުތު މާލޭގައި ލޯޑަކީ ގާތްގަޑަކަށް 120 މެގަވޯޓު. އެ މައްޗަށް އަރަމުން މިދަނީ. މިކަހަލަ ސިސްޓަމެއްގައި ވަރަށް ބޮޑަށް އެނާޖީ ސެކިއުރިޓީ އިތުރުވެގެންދާނެ،” ވަޒީރު ވިދާޅުވިއެވެ.
މި މަޝްރޫޢުގެ ދަށުން ހަމައެކަނި ސޯލާ ޕެނަލްތައް ހަރުކުރުމުގެ އިތުރުން، މުޅި ނިޒާމު ހިންގުމަށް ބޭނުންވާ ޓްރާންސްފޯމަރުތަކާއި ބެޓަރީ ސްޓޯރޭޖް ޤާއިމްކުރެވޭނެއެވެ. އަދި އުފައްދާ ކަރަންޓު މާލޭގެ ގްރިޑާ ގުޅާލުމަށްޓަކައި 4.5 ކިލޯމީޓަރުގެ ސަބްމެރިން ކޭބަލެއް ހުޅުމާލެއާ ހަމައަށް އެޅުމަށް ވަނީ ނިންމާފައެވެ. މިއީ ރާއްޖޭގައި ކަރަންޓު ފޯރުކޮށްދިނުމަށް މިފަދަ ބޮޑު ސަބްމެރިން ކޭބަލެއް އަޅާ ފުރަތަމަ ފަހަރެވެ.
ބޭރުގެ އިންވެސްޓަރުން މެދުވެރިކޮށް ހިންގާ މި މަޝްރޫޢުން އުފައްދާ ކަރަންޓު، ޕަވަރ ޕާޗޭޒިން އެގްރިމެންޓެއްގެ ދަށުން ސްޓެލްކޯއަށް ވިއްކުމަށް ވަނީ ހަމަޖެހިފައެވެ. ވަޒީރު ވިދާޅުވީ ޓެކްނިކަލް އެއްވެސް މައްސަލައެއް ނުޖެހި ކުރިއަށްދާނަމަ، ދެ އަހަރު ތެރޭގައި މަސައްކަތް ނިންމާލެވޭނެ ކަމަށެވެ. މީގެ އިތުރުން ރާއްޖޭގެ އެހެން ރަށްތަކުގައިވެސް ސޯލާ ނިޒާމުތައް ޤާއިމްކުރުމުގެ މަސައްކަތް ސަރުކާރުން ބާރަށް ކުރިއަށް ގެންދާކަން ވަޒީރު ވަނީ ފާހަގަކުރައްވާފައެވެ.