މެދުއިރުމަތީގައި މިހާރު ހިނގަމުންދާ ހަނގުރާމައާ ގުޅޭ ޚަބަރާއި މަޢުލޫމާތު ފެތުރުމުގައި ޒިންމާދާރުވުމަށް މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން އިލްތިމާސްކޮށްފިއެވެ. އެ ކޮމިޝަނުން މިކަމަށް އިލްތިމާސްކުރީ މެދުއިރުމަތީގެ މަސްރަޙު ނުތަނަވަސްވެ، ހަނގުރާމައެއްގެ ބިރުވެރިކަން ބޮޑުވެފައިވާ ދަނޑިވަޅެއްގައެވެ.
މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުން ނެރުނު ނޫސްބަޔާނެއްގައި ވިދާޅުވީ، މިފަދަ ޚައްސާސް ދަނޑިވަޅެއްގައި މީޑިއާތަކުން ރައްޔިތުންނަށް މަޢުލޫމާތު ފޯރުކޮށްދިނުމުގައި ވަރަށް ބޮޑަށް ސަމާލުވާންޖެހޭ ކަމަށެވެ. ޚާއްޞަކޮށް ޚަބަރު ފެތުރުމުގައި ކަނޑައެޅިފައިވާ ސުލޫކީ މިންގަނޑުތަކަށް ބޯލަނބައި، ޤައުމީ ސަލާމަތާއި ރައްކާތެރިކަން ދެމެހެއްޓުމަށް އިސްކަންދިނުމަށް ކޮމިޝަނުން ވަނީ އެދިފައެވެ.
މީގެ އިތުރުން، އެކި ފަރާތްތަކުން ހޯދާ ކޮންޓެންޓް ބޭނުންކުރުމުގައި އެ ފަރާތްތަކުން ދެއްކި ވާހަކައިގެ އަސްލު މަފްހޫމު ނުގެއްލޭނެހެން ގެނެސްދިނުމަށް ކޮމިޝަނުން ވަނީ ނޫސްވެރިންނަށް އިރުޝާދު ދީފައެވެ. އަދި ހަޤީޤަތާ ޚިލާފަށް މެނިޕިއުލޭޓް ކޮށްފައިވާ ނުވަތަ ފެބްރިކޭޓް ކޮށްފައިވާ ފޮޓޯއާއި އޯޑިއޯ އަދި ވީޑިއޯ، ނަފްރަތު އުފެއްދުމުގެ ބޭނުމުގައި ބޭނުންނުކުރުމަށް ޚާއްޞަ ސަމާލުކަމެއް ދިނުމަށްވެސް ވަނީ އިލްތިމާސްކޮށްފައެވެ.
ކޮމިޝަނުން މިފަދަ އިލްތިމާސެއް ކުރައްވާފައި މިވަނީ، މެދުއިރުމަތީގެ ހަނގުރާމައާ ގުޅިގެން ބައެއް މީޑިއާތަކުން ހަޤީޤަތާ ޚިލާފު ދޮގު ޚަބަރުތަކާއި މަޢުލޫމާތު ފަތުރަމުންދާ ކަމުގެ ޝަކުވާތައް ލިބެމުންދާ ދަނޑިވަޅެއްގައެވެ. އަދި މިފަދަ މަޢުލޫމާތު ފެތުރުމުގައި ސައްޙަ ނޫން މަސްދަރުތައް ބޭނުންކުރާކަން ފާހަގަކުރެވޭ ކަމަށްވެސް ކޮމިޝަނުން ވިދާޅުވިއެވެ.
ނޫސްބަޔާން ނިންމާލަމުން، މީޑިއާތަކުން އެފަރާތްތަކުގެ ފަރުދީ ޒިންމާ ޒިންމާދާރުކަމާއެކު އަދާކުރުމަށް ދިވެހި އެންމެހައި ނޫސްވެރިންނަށް ކޮމިޝަނުން ވަނީ ހަނދާންކޮށްދީފައެވެ.