ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސިޔާސަތަކީ ރައްޔިތުންގެ މެދުގައި އެއްވެސް ތަފާތުކުރުމެއް ނެތި ޚިދުމަތް ދިނުން ކަމަށާއި، މި ދައުރު ނިމޭއިރު މާލެއާއި ހުޅުމާލެއިން ލިބޭ ހުރިހާ ފަސޭހަތަކެއް ވިލިމާލޭގެ ރައްޔިތުންނަށްވެސް ލިބިގެންދާނެ ކަމަށް އިމާރާތްކުރުމާއި ގެދޮރުވެރިކަމާ ބެހޭ ވަޒީރު ޑރ. އަބްދުﷲ މުއްތަލިބު ވިދާޅުވެއްޖެއެވެ.
ހުޅުމާލޭގައި ބޭއްވި ހައުސިންގ މަޝްރޫއެއްގެ ބިންގާ އެޅުމުގެ ރަސްމިއްޔާތުގައި ވާހަކަދައްކަވަމުން ވަޒީރު ވިދާޅުވީ، ވިލިމާލޭގެ ރައްޔިތުން މިހާރު އުފުލަމުންދާ ތަކުލީފުތައް ސަރުކާރަށް ވަރަށް ރަނގަޅަށް ފެންނަ ކަމަށެވެ. އަދި އެ ތަކުލީފުތަކަށް ދާއިމީ ހައްލެއް ހޯދައިދިނުމަކީ ސަރުކާރުގެ އަމާޒެއް ކަމަށް ވަޒީރު ފާހަގަކުރެއްވިއެވެ.
ވިލިމާލޭގެ ތަރައްގީއަށް ސަރުކާރުން ނިންމާފައިވާ މުހިންމު ކަންތައްތަކުގެ ތެރޭގައި އެ އަވަށުގައި 10 ބުރިއަށް ގެދޮރު އިމާރާތްކުރުމުގެ ހުއްދަ ދިނުމާއި، ޓާޝަރީ ހޮސްޕިޓަލެއް ގާއިމުކުރުން ހިމެނެއެވެ. މި ނިންމުންތަކަށް ފާޑުކިޔާ ފަރާތްތަކަށް ރައްދުދެއްވަމުން ވަޒީރު ވިދާޅުވީ، “10 ބުރިއަށް އިމާރާތްކުރުމުގެ ހުއްދައާއެކު ބޭންކް ފައިނޭންސް ހޯދުމަށާއި ގިނަ ޖީލުތަކަކަށް ބޯހިޔާވަހިކަން ކަށަވަރުކުރުމުގެ ފުރުސަތު ފަހިވެގެންދާނެ” ކަމަށެވެ. އަދި ހޮސްޕިޓަލުގެ ސަބަބުން ސިއްހީ ހިދުމަތް ހޯދުމަށް މާލެއަށް ކުރަންޖެހޭ ދަތުރުތަކަށް ނިމުމެއް އަންނާނެ ކަމަށްވެސް ވިދާޅުވިއެވެ.
މީގެ އިތުރުން ވިލިމާލޭގެ މަގުތައް ޒަމާނީ ފެންވަރަށް ތަރައްގީކުރުމާ ގުޅޭގޮތުން ވަޒީރު ވިދާޅުވީ، މަގުތައް ހަދާނީ ރަށުގެ ފެހިކަމާއި ހިތްގައިމުކަން ނުގެއްލޭނެ ގޮތަށް ރައްޔިތުން އެދޭ ފަދަ ގޮތަކަށް ކަމަށެވެ. މިއީ ވިލިމާލޭގެ ތިމާވެށީގެ ސިފަތައް ދަމަހައްޓަމުން ގެނެވޭނެ ތަރައްގީއެއްކަން ވަޒީރު ފާހަގަކުރެއްވިއެވެ.
ދަތުރުފަތުރުގެ ދާއިރާއިން ގެނެވޭ ބަދަލުތަކަށް އަލިއަޅުއްވާލައްވަމުން، ސަރުކާރުން އަލަށް ފަށާ ޓެކްސީ ލައިނުގެ ތެރެއިން 5 އިލެކްޓްރިކް ކާރު ވިލިމާލޭގައި އޮޕަރޭޓުކުރަން ނިންމާފައިވާކަން ވަޒީރު އިއުލާނުކުރެއްވިއެވެ. މިއީ އެ އަވަށުގައި ދިރިއުޅޭ ރައްޔިތުންނަށް ދަތުރުފަތުރުގެ ފަސޭހަކަން އިތުރުކުރުމަށް އެޅޭ މުހިންމު ފިޔަވަޅެކެވެ.
ވަޒީރު ޑރ. މުއްތަލިބުގެ ވާހަކަފުޅު ނިންމަވާލެއްވީ، މި ފަސް އަހަރުގެ ދައުރު ނިމޭއިރު ވިލިމާލެއަކީ ވަޒީފާއާއި، ތައުލީމާއި، އަދި އެހެނިހެން އަސާސީ ހިދުމަތްތައް މާލެއާއި ހުޅުމާލެއާ އެއް ފެންވަރެއްގައި ލިބޭނެ ތަނަކަށް ވެގެންދާނެ ކަމުގެ ފުރިހަމަ ޔަގީންކަން ރައްޔިތުންނަށް ދެއްވަމުންނެވެ.